Zabúr 147
147
1 Ḳhudáwand kí hamd karo;
Kyúṉki Ḳhudá kí madhsaráí karná bhalá hai,
Is liye ki yih dilpasand, aur sitáish zebá hai.
2 Ḳhudáwand Yarúshalem ko ta‘mír kartá hai:
Wuh Isráíl ke jiláwatanoṉ ko jama‘ kartá hai.
3Wuh shikastadiloṉ ko shifá detá hai,
Aur un ke zaḳhm báṉdhtá hai.
4Wuh sitároṉ ko shumár kartá hai,
Aur un sab ke nám rakhtá hai.
5Hamárá Ḳhudáwand buzurg aur qudrat meṉ ‘azím hai:
Us ke fahm kí intihá nahíṉ.
6 Ḳhudáwand halímoṉ ko sambháltá hai:
Wuh sharíroṉ ko ḳhák meṉ milá detá hai.
7 Ḳhudáwand ke huzúr shukrguzárí ká gít gáo:
Sitár par hamáre Ḳhudá kí madhsaráí karo;
8Jo ásmán ko bádaloṉ se mulabbas kartá hai;
Jo zamín ke liye meṉh taiyár kartá hai;
Jo paháṛoṉ par ghás ugátá hai;
9Jo haiwánát ko ḳhurák detá hai,
Aur kauwe ke bachchoṉ ko jo káeṉ káeṉ karte haiṉ.
10Ghoṛe ke zor meṉ us kí ḳhushnúdí nahíṉ:
Na ádmí kí ṭáṉgoṉ se use koí ḳhushí hai.
11 Ḳhudáwand un se ḳhush hai jo us se ḍarte haiṉ,
Aur un se jo us kí shafaqat ke ummedwár haiṉ.
12Ai Yarúshalem, Ḳhudáwand kí sitáish kar;
Ai Siyyún, apne Ḳhudá kí sitáish kar.
13Kyúṉki us ne tere pháṭakoṉ ke beṉḍoṉ ko mazbút kiyá hai;
Us ne tere andar terí aulád ko barakat dí hai.
14Wuh terí hudúd meṉ amn rakhtá hai;
Wuh tujhe achchhe se achchhe gehúṉ se ásúda kartá hai.
15Wuh apná hukm zamín par bhejtá hai;
Us ká kalám niháyat tezrau hai.
16Wuh barf ko ún kí mánind girátá hai,
Aur pále ko rákh kí mánind bakhertá hai.
17Wuh yaḳh ko luqmoṉ kí mánind pheṉktá hai:
Us kí ṭhanḍ ko kaun sah saktá hai?
18Wuh apná kalám názil karke un ko pighlá detá hai:
Wuh hawá chalátá hai aur pání bahne lagtá hai.
19Wuh apná kalám Ya‘qúb par záhir kartá hai,
Aur apne áín o ahkám Isráíl par.
20Us ne kisí âur qaum se aisá sulúk nahíṉ kiyá:
Aur us ke ahkám ko unhoṉ ne nahíṉ jáná.
Ḳhudáwand kí hamd karo.
Currently Selected:
Zabúr 147: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
