Amsál 27
27
1Kal kí bábat ghamanḍ na kar,
Kyúṉki tú nahíṉ jántá ki ek hí din meṉ kyá hogá.
2G̣air terí sitáish kare, na ki terá hí muṉh:
Begána kare, na ki tere hí lab.
3Patthar bhárí hai, aur ret wazndár hai:
Lekin ahmaq ká jhuṉjhláná in donoṉ se giráṉtar hai.
4G̣azab saḳht berahmí aur qahr sailáb hai:
Lekin hasad ke sámne kaun khaṛá rah saktá hai?
5Chhipí mahabbat se
Khulí malámat bihtar hai.
6Jo zaḳhm dost ke háth se lageṉ purwafá haiṉ,
Lekin dushman ke bose báifrát haiṉ.
7Ásúda ján ko shahd ke chhatte se bhí nafrat hai:
Lekin bhúke ke liye har ek kaṛwí chíz míṭhí hai.
8Apne makán se áwára insán
Usí chiṛiyá kí mánind hai jo apne áshiyáne se bhaṭak jáe.
9Jaise tel aur ‘itr se dil ko farhat hotí hai
Waise hí dost kí dilí mashwarat kí shíríní se.
10Apne dost aur apne báp ke dost ko tark na kar,
Aur apní musíbat ke din apne bháí ke ghar na já:
Kyúṉki hamsáya jo nazdík ho us bháí se jo dúr ho bihtar hai.
11Ai mere beṭe, dáná ban, aur mere dil ko shád kar,
Táki maiṉ apne malámat karnewále ko jawáb de sakúṉ.
12Hoshyár balá ko dekhkar chhip játá hai,
Lekin nádán baṛhe chale játe aur nuqsán uṭháte haiṉ.
13Jo begáne ká zámin ho us ke kapṛe chhín le,
Aur jo ajnabí ká zámin ho us se kuchh girau rakh le.
14Jo subh sawere uṭhkar apne dost ke liye baland áwáz se du‘á e ḳhair kartá hai,
Us ke liye yih la‘nat mahsúb hogí.
15Jhaṛí ke din ká lagátár ṭapká
Aur jhagṛálú bíwí yaksán haiṉ;
16Jo us ko roktá hai hawá ko roktá hai,
Aur us ká dahiná háth tel ko pakaṛtá hai.
17Jis tarah lohá lohe ko tez kartá hai,
Usí tarah ádmí ke dost ke chihre kí áb usí se hai.
18Jo anjír ke daraḳht kí nigahbání kartá hai us ká mewa kháegá;
Aur jo apne áqá kí ḳhidmat kartá hai ‘izzat páegá.
19Jis tarah pání meṉ chihra chihre se mushábih hai,
Usí tarah ádmí ká dil ádmí se.
20Jis tarah pátál aur halákat ko ásúdagí nahíṉ,
Usí tarah insán kí áṉkheṉ ser nahíṉ hotíṉ.
21Jaise chándí ke liye kuṭhálí aur sone ke liye bhaṭṭí hai,
Waise hí ádmí ke liye us kí sitáish hai.
22Agarchi tú ahmaq ko anáj ke sáth ukhlí meṉ ḍálkar músal se kúṭe,
Taubhí us kí hamáqat us se kabhí judá na hogí.
23Apne rewaṛoṉ ká hál daryáft karne meṉ dil lagá,
Aur apne galloṉ ko achchhí tarah se dekh;
24Kyúṉki daulat sadá nahíṉ rahtí,
Aur kyá tájwarí pusht dar pusht qáim rahtí hai?
25Súkhí ghás jama‘ kí játí hai, phir sabza numáyáṉ hotá hai,
Aur paháṛoṉ par se chára káṭkar faráham kiyá játá hai.
26Barre terí poshish ke liye haiṉ,
Aur bakriyáṉ tere maidánoṉ kí qímat haiṉ:
27Aur bakriyoṉ ká dúdh terí aur tere ḳhándán kí ḳhurák,
Aur terí lauṉḍiyoṉ kí guzrán ke liye káfí hai.
Currently Selected:
Amsál 27: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
