Amsál 26
26
1Jis tarah aiyám i garmí meṉ barf aur dirau ke waqt bárish,
Usí tarah ahmaq ko ‘izzat zeb nahíṉ detí.
2Jis tarah gauraiyá áwára phirtí aur abábíl urṭí rahtí hai,
Usí tarah besabab la‘nat bemahall hai.
3Ghoṛe ke liye chábuk aur gadhe ke liye lagám:
Lekin ahmaq kí píṭh ke liye chhaṛí hai.
4Ahmaq ko us kí hamáqat ke mutábiq jawáb na de,
Mabádá tú bhí us kí mánind ho jáe.
5Ahmaq ko us kí hamáqat ke mutábiq jawáb de,
Mabádá wuh apní nazar meṉ dáná ṭhahre.
6Jo ahmaq ke háth paig̣ám bhejtá hai,
Apne páṉwoṉ par kulháṛá mártá aur nuqsán ká piyála pítá hai.
7Jis tarah laṉgṛe kí ṭáṉg laṛkhaṛátí hai,
Usí tarah ahmaq ke muṉh meṉ tamsíl hai.
8Ahmaq kí ta‘zím karnewálá
Goyá jawáhir ko pattharoṉ ke ḍher meṉ rakhtá hai.
9Ahmaq ke muṉh meṉ tamsíl,
Sharábí ke háth meṉ chubhnewále káṉṭe kí mánind hai.
10Jo ahmaqoṉ aur ráhguzaroṉ ko mazdúrí par lagátá hai,
Us tírandáz kí mánind hai jo sab ko zaḳhmí kartá hai.
11Jis tarah kuttá apne ugle húe ko phir khátá hai,
Usí tarah ahmaq apní hamáqat ko duhrátá hai.
12Kyá tú us ko jo apní nazar meṉ dáná hai dekhtá hai?
Us ke muqábale meṉ ahmaq se ziyáda ummed hai.
13Sust ádmí kahtá hai, Ráh meṉ sher hai,
Sher i babar galiyoṉ meṉ hai.
14Jis tarah darwáza apní chúloṉ par phirtá hai,
Usí tarah sust ádmí apne bistar par karwaṭ badaltá rahtá hai.
15Sust ádmí apná háth thálí meṉ ḍáltá hai,
Aur use phir muṉh tak láná us ko thaká detá hai.
16Káhil apní nazar meṉ dáná hai,
Balki dalíl lánewále sát shaḳhsoṉ se baṛhkar.
17Jo rásta chalte húe paráye jhagṛe meṉ daḳhl detá hai,
Us kí mánind hai jo kutte ko kán se pakaṛtá hai.
18Jaisá wuh díwána jo jaltí lakṛiyáṉ
Aur maut ke tír pheṉktá hai,
19Waisá hí wuh shaḳhs hai jo apne hamsáye ko dag̣á detá hai,
Aur kahtá hai, Maiṉ to dillagí kar rahá thá.
20Lakṛí na hone se ág bujh játí hai,
So jaháṉ g̣íbatgo nahíṉ waháṉ jhagṛá mauqúf ho játá hai.
21Jaise angároṉ par koele aur ág par índhan hai,
Waisá hí jhagṛálú jhagṛá barpá karne ke liye hai.
22G̣íbatgo kí báteṉ lazíz nawále haiṉ,
Aur wuh ḳhúb hazm ho játí haiṉ.
23Ulfatí lab badḳhwáh dil ke sáth
Us ṭhíkre kí mánind haiṉ jis par khoṭí chándí maṉḍhí ho.
24Kínawar dil meṉ dag̣á rakhtá hai,
Lekin apní bátoṉ se chhipátá hai.
25Jab wuh míṭhí míṭhí báteṉ kare to us ká yaqín na kar,
Kyúṉki us ke dil meṉ kamál nafrat hai.
26Agarchi us kí badḳhwáhí makr meṉ chhipí hai,
Taubhí us kí badí jamá‘at ke rúbarú fásh kí jáegí.
27Jo gaṛhá khodtá hai áp hí us meṉ giregá;
Aur jo patthar ḍhalkátá hai wuh palaṭkar usí par paṛegá.
28Jhúṭhí zabán un ká kína rakhtí hai jin ko us ne gháyal kiyá hai;
Aur cháplús muṉh tabáhí kartá hai.
Currently Selected:
Amsál 26: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
