Gintí 34
34
1Phir Ḳhudáwand ne Músá se kahá, ki 2Baní Isráíl ko hukm kar, aur un ko kah de, ki Jab tum mulk i Kan‘án meṉ dáḳhil ho; (yih wuhí mulk hai, jo tumhárí mírás hogá, ya‘ní Kan‘án ká mulk ma‘ apní hudúd i arb‘a ke,) 3to tumhárí junúbí simt dasht i Sín se lekar mulk i Adom ke kanáre kanáre ho, aur tumhárí junúbí sarhadd daryá e Shor ke áḳhir se shurú‘ hokar mashriq ko jáe. 4Waháṉ se tumhárí sarhadd ‘Aqrábbím kí chaṛháí ke junúb tak pahuṉchkar muṛe, aur Sín se hotí húí Qádis Barní‘a ke junúb meṉ jákar nikle, aur Hasar Addár se hokar ‘Azmún tak pahuṉche. 5Phir yihí sarhadd ‘Azmún se hokar ghúmtí húí Misr kí nahr tak jáe, aur samundar ke sáhil par ḳhatm ho. 6Aur mag̣ribí simt meṉ baṛá samundar aur us ká sáhil ho. So yihí tumhárí mag̣ribí sarhadd ṭhahre. 7Aur shimálí simt meṉ tum baṛe samundar se koh i Hor tak apní hadd rakhná. 8Phir koh i Hor se Hammát ke madḳhal tak tum is tarah apní hadd muqarrar karná ki wuh Sidád se já mile. 9Aur waháṉ se hotí húí Zifrún ko nikal jáe, aur Hasar ‘Enán par jákar ḳhatm ho. Yih tumhárí shimálí sarhadd ho. 10Aur tum apní mashriqí sarhadd Hasar ‘Enán se lekar Safám tak báṉdhná. 11Aur yih sarhadd Safám se Riblah tak jo ‘Ain ke mashriq meṉ hai jáe; aur waháṉ se níche ko utartí húí Kinnarat kí jhíl ke mashriqí kanáre tak pahuṉche: 12aur phir Yardan ke kanáre kanáre níche ko jákar daryá e Shor par ḳhatm ho. In hudúd ke andar ká mulk tumhárá hogá. 13So Músá ne baní Isráíl ko hukm diyá, ki Yihí wuh zamín hai, jise tum qur‘a ḍálkar mírás meṉ loge, aur isí kí bábat Ḳhudáwand ne hukm diyá hai, ki wuh sáṛhe nau qabíloṉ ko dí jáe. 14Kyúṉki baní Rúbin ke qabíle ne apne ábáí ḳhándánoṉ ke muwáfiq, aur baní Jadd ke qabíle ne bhí apne ábáí ḳhándánoṉ ke mutábiq mírás pá lí, aur baní Munassí ke ádhe qabíle ne bhí apní mírás pá lí; 15ya‘ní in ḍháí qabíloṉ ko Yardan ke isí pár Yaríhú ke muqábil mashriq kí taraf jidhar se súraj nikaltá hai, mírás mil chukí hai.
16Aur Ḳhudáwand ne Músá se kahá, ki 17Jo ashḳhás is mulk ko mírás ke taur par tum ko báṉṭ deṉge un ke nám yih haiṉ, ya‘ní Ilí‘azar káhin, aur Nún ká beṭá Yashú‘. 18Aur zamín ko mírás ke taur par báṉṭne ke liye har qabíle se ek sardár ko lená. 19Aur un ádmíoṉ ke nám yih hain: Yahúdáh ke qabíle se Yufannah ká beṭá Kálib; 20aur baní Shama‘ún ke qábile se ‘Ammíhúd ká beṭá Samúel; 21aur Binyamín ke qabíle se Kislún ká beṭá Ilídád; 22aur baní Dán ke qabíle se ek sardár Búqqí bin Yuglí; 23aur baní Yúsuf meṉ se, ya‘ní baní Munassí ke qabíle se ek sardár Hanníel bin Afúd; 24aur baní Ifráím ke qabíle se ek sardár Qamúel bin Siftán; 25aur baní Zabúlún ke qabíle se ek sardár Ilísafan bin Farnák; 26aur baní Ishkár ke qabíle se ek sardár Faltíel bin ‘Azzán; 27aur baní Áshar ke qabíle se ek sardár Aḳhíhúd bin Shalúmí. 28Aur baní Naftálí ke qabíle se ek sardár Fidáhel bin ‘Ammíhúd. 29Yih wuh log haiṉ, jin ko Ḳhudáwand ne hukm diyá ki mulk i Kan‘án meṉ baní Isráíl ko mírás taqsím kar deṉ.
Currently Selected:
Gintí 34: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)