Gintí 35
35
1Phir Ḳhudáwand ne Moáb ke maidánoṉ meṉ, jo Yaríhú ke muqábil Yardan ke kanáre wáqi‘ haiṉ, Músá se kahá, ki 2Baní Isráíl ko hukm kar, ki apní mírás meṉ se jo un ke tasarruf meṉ áe Láwíoṉ ko rahne ke liye shahr deṉ, aur un shahroṉ kí nawáhí bhí tum Láwíoṉ ko de dená. 3Yih shahr un ke rahne ke liye hoṉ; un kí nawáhí un ke chaupáyoṉ, aur mál aur sáre jánwaroṉ ke liye hoṉ. 4Aur shahroṉ kí nawáhí, jo tum Láwíoṉ ko do, wuh har shahr kí díwár se shurú‘ karke báhar chároṉ taraf hazár hazár háth ke pher meṉ hoṉ. 5Aur tum shahr ke báhar mashriq kí taraf do hazár háth, aur junúb kí taraf do hazár háth, aur mag̣rib kí taraf do hazár háth, aur shimál kí taraf do hazár háth, is tarah paimáish karná ki shahr un ke bích meṉ á jáe. Un ke shahroṉ kí itní hí nawáhí hoṉ. 6Aur Láwíoṉ ke un shahroṉ meṉ se, jo tum un ko do, chha panáh ke shahr ṭhahrá dená, jin meṉ ḳhúní bhág jáeṉ. In shahroṉ ke ‘aláwa biyálís shahr âur un ko dená; 7ya‘ní sab milákar aṛtálís shahr Láwíoṉ ko dená, aur in shahroṉ ke sáth in kí nawáhí bhí hoṉ. 8Aur wuh shahr baní Isráíl kí mírás meṉ se yúṉ diye jáeṉ. Jin ke qabze meṉ bahut se shahr hoṉ un se bahut, aur jin ke pás thoṛe hoṉ un se thoṛe shahr lená. Har qabíla apní mírás ke mutábiq jis ká wuh wáris ho Láwíoṉ ke liye shahr de.
9Aur Ḳhudáwand ne Músá se kahá, ki 10Baní Isráíl se kah de, ki Jab tum Yardan ko ‘ubúr karke mulk i Kan‘án meṉ pahuṉch jáo, 11to tum kaí aise shahr muqarrar karná, jo tumháre liye panáh ke shahr hoṉ, táki wuh ḳhúní, jis se sahwan ḳhún ho jáe, waháṉ bhág já sake. 12In shahroṉ meṉ tum ko intiqám lenewále se panáh milegí, táki ḳhúní jab tak wuh faisale ke liye jamá‘at ke áge házir na ho, tab tak márá na jáe. 13Aur panáh ke jo shahr tum doge, wuh chha hoṉ. 14Tín shahr to Yardan ke pár, aur tín mulk i Kan‘án meṉ dená. Yih panáh ke shahr hoṉge. 15In chhaoṉ shahroṉ meṉ baní Isráíl ko aur un musáfiroṉ aur pardesíoṉ ko, jo tum meṉ búdobásh karte haiṉ, panáh milegí; táki jis kisí se sahwan ḳhún ho jáe, wuh waháṉ bhág já sake. 16Aur agar koí kisí ko lohe ke hathyár se aisá máre, ki wuh mar jáe, to wuh ḳhúní ṭhahregá, aur wuh ḳhúní zarúr márá jáe. 17Yá agar koí aisá patthar háth meṉ lekar jis se ádmí mar saktá ho, kisí ko máre, aur wuh mar jáe, to wuh ḳhúní ṭhahregá, aur wuh ḳhúní zarúr márá jáe. 18Yá agar koí chobí ála háth meṉ lekar jis se ádmí mar saktá ho, kisí ko máre aur wuh mar jáe, to wuh ḳhúní ṭhahregá, aur wuh ḳhúní zarúr márá jáe. 19Ḳhún ká intiqám lenewálá ḳhúní ko áp hí qatl kare: jab wuh use mile tab hí use már ḍále. 20Aur agar koí kisí ko ‘adáwat se ḍhakel de, yá ghát lagákar kuchh us par pheṉk de, aur wuh mar jáe; 21yá dushmaní se use apne háth se aisá máre, ki wuh mar jae; to wuh jis ne márá ho zarúr qatl kiyá jáe, kyúṉki wuh ḳhúní hai. Ḳhún ká intiqám lenewálá is ḳhúní ko, jab wuh use mile, már ḍále. 22Phir agar koí kisí ko bag̣air ‘adáwat ke nágahán ḍhakel de, yá bag̣air ghát lagáe us par koí chíz ḍál de, 23yá use bag̣air dekhe koí aisá patthar us par pheṉke, jis se ádmí mar saktá ho, aur wuh mar jáe, par yih na to us ká dushman, aur na us ke nuqsán ká ḳhwáháṉ thá; 24to jamá‘at aise qátil aur ḳhún ke intiqám lenewále ke darmiyán in hí ahkám ke muwáfiq faisala kare; 25aur jamá‘at us qátil ko ḳhún ke intiqám lenewále ke háth se chhuṛáe, aur jamá‘at hí use panáh ke us shahr meṉ, jaháṉ wuh bhag gayá thá, wápas pahuṉchwá de, aur jab tak sardár káhin, jo muqaddas tel se mamsúh húá thá, mar na jáe, tab tak wuh wahíṉ rahe. 26Lekin agar wuh ḳhúní apne panáh ke shahr kí sarhadd se, jaháṉ wuh bhágkar gayá ho, kisí waqt báhar nikle, 27aur ḳhún ke intiqám lenewále ko wuh panáh ke shahr kí sarhadd ke báhar mil jáe, aur intiqám lenewálá qátil ko qatl kar ḍále, to wuh ḳhún karne ká mujrim na hogá; 28kyúṉki ḳhúní ko lázim thá, ki sardár káhin kí wafát tak usí panáh ke shahr meṉ rahtá, par sardár káhin ke marne ke ba‘d ḳhúní apní maurúsí jagah ko lauṭ jáe. 29So tumhárí sab sukúnatgáhoṉ meṉ nasl dar nasl yih báteṉ faisale ke liye qánún ṭhahreṉgí. 30Agar koí kisí ko már ḍále, to qátil gawáhoṉ kí shahádat par qatl kiyá jáe, par ek gawáh kí shahádat se koí márá na jáe. 31Aur tum us qátil se, jo wájibu’l qatl ho, diyat na lená, balki wuh zarúr hí márá jáe. 32Aur tum us se bhí, jo kisí panáh ke shahr ko bhág gayá ho, is g̣araz se diyat na lená, ki wuh sardár káhin kí maut se pahle phir mulk meṉ rahne ko lauṭne páe. 33So tum us mulk ko, jaháṉ tum rahoge, nápák na karná; kyúṉki ḳhún mulk ko nápák kar detá hai; aur us mulk ke liye, jis meṉ ḳhún baháyá jáe siwá qátil ke ḳhún ke, âur kisí chíz ká kaffára nahíṉ liyá já saktá. 34Aur tum apní búdobásh ke mulk ko, jis ke andar maiṉ rahúṉgá, gandá bhí na karná; kyúṉki maiṉ jo Ḳhudáwand húṉ, so baní Isráíl ke darmiyán rahtá húṉ.
Currently Selected:
Gintí 35: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
