Gintí 24
24
1Jab Bal‘ám ne dekhá, ki Ḳhudáwand ko yihí manzúr hai, ki Isráíl ko barakat de, to wuh pahle kí tarah shugún dekhne ko idhar udhar na gayá, balki biyábán kí taraf apná muṉh kar liyá. 2Aur Bal‘ám ne nigáh kí aur dekhá, ki baní Isráíl apne apne qabíle kí tartíb se muqím haiṉ, aur Ḳhudá kí rúh us par názil húí. 3Aur us ne apní masal shurú‘ kí, aur kahne lagá:
Ba‘or ká beṭá Bal‘ám kahtá hai,
Ya‘ní wuhí shaḳhs, jis kí áṉkheṉ band thíṉ, yih kahtá hai,
4Balki yih usí ká kahná hai, jo Ḳhudá kí báteṉ suntá hai,
Aur sijde meṉ paṛá húá khulí áṉkhoṉ se
Qádir i Mutlaq kí royá dekhtá hai.
5Ai Ya‘qúb, tere ḍere,
Ai Isráíl, tere ḳhaime kaise ḳhushnumá haiṉ!
6Wuh aise phaile húe haiṉ jaise wádíáṉ
Aur daryá ke kanáre bág̣,
Aur Ḳhudáwand ke lagáe húe ‘úd ke daraḳht
Aur nadiyoṉ ke kanáre deodár ke daraḳht.
7Us ke charsoṉ se pání bahegá,
Aur seráb khetoṉ meṉ us ká bíj paṛegá.
Us ká bádsháh Ajáj se baṛhkar hogá,
Aur us kí saltanat ko ‘urúj hásil hogá.
8Ḳhudá use Misr se nikálkar liye á rahá hai.
Us meṉ janglí sáṉḍ kí sí táqat hai.
Wuh un qaumoṉ ko, jo us ki dushman haiṉ, chaṭ kar jáegá,
Aur un kí haḍḍiyoṉ ko toṛ ḍálegá,
Aur un ko apne tíroṉ se chhed chhedkar máregá.
9Wuh dabakkar baiṭhá hai. Wuh sher kí tarah,
Balki sherní kí mánind leṭ gayá hai; ab kaun use chheṛe?
Jo tujhe barakat de, wuh mubárak,
Aur jo tujh par la‘nat kare, wuh mal‘ún ho.
10Tab Balaq ko Bal‘ám par baṛá taish áyá, aur wuh apne hath píṭne lagá. Phir us ne Bal‘ám se kahá, Maiṉ ne tujhe buláyá, ki tú mere dushmanoṉ par la‘nat kare: lekin tú ne tínoṉ bár un ko barakat hí barakat dí. 11So ab tú apne mulk ko bhág já. Maiṉ ne to sochá thá, ki tujhe ‘álá mansab par mumtaz karúṉ, par Ḳhudáwand ne tujhe aise i‘záz se mahrúm rakkhá. 12Bal‘ám ne Balaq ko jawáb diyá, Kyá maiṉ ne tere un elchíoṉ se bhí, jin ko tú ne mere pás bhejá thá, yih nahíṉ kah diyá thá, ki 13Agar Balaq apná ghar chándí aur sone se bharkar mujhe de, taubhí maiṉ apní marzí se bhalá yá burá karne kí ḳhátir Ḳhudáwand ke hukm se tajáwuz nahíṉ kar saktá; balki jo kuchh Ḳhudáwand kahe, maiṉ wuhí kahúṉgá? 14Aur ab maiṉ apní qaum ke pás lauṭkar játá húṉ: so tú á, maiṉ tujhe ágah kar dúṉ, ki yih log terí qaum ke sáth áḳhirí dinoṉ meṉ kyá kyá kareṉge. 15Chunáṉchi us ne apní masal shurú‘ kí, aur kahne lagá:
Ba‘or ká beṭá Bal‘ám kahtá hai,
Ya‘ní wuhí shaḳhs, jis kí áṉkheṉ band thíṉ, yih kahtá hai,
16Balki yih usí ká kahná hai, jo Ḳhudá kí báteṉ suntá hai,
Aur Haqq Ta‘álá ká ‘irfán rakhtá hai,
Aur sijde meṉ paṛá húá khulí áṉkhoṉ se
Qádir i Mutlaq kí royá dekhtá hai.
17Maiṉ use dekhúṉgá to sahí, par abhí nahíṉ:
Wuh mujhe nazar bhí áegá, par nazdík se nahíṉ:
Ya‘qúb meṉ se ek sitára niklegá,
Aur Isráíl meṉ se ek ‘asá uṭhegá,
Aur Moáb kí nawáhí ko már márkar sáf kar degá
Aur sab hangáma karnewáloṉ ko halák kar ḍálegá.
18Aur us ke dushman Adom aur Sha‘ír
Donoṉ us ke qabze meṉ hoṉge;
Aur Isráíl diláwarí karegá.
19Aur Ya‘qúb hí kí nasl se wuh farmánrawá uṭhegá,
Jo shahr ke báqímánda logoṉ ko nábúd kar ḍálegá.
20Phir us ne ‘Amálíq par nazar karke apní yih masal shurú‘ kí, aur kahne lagá:
Qaumoṉ meṉ pahlí qaum ‘Amálíq kí thí,
Par us ká anjám halákat hai.
21Aur Qíníoṉ kí taraf nigáh karke yih masal shurú‘ kí, aur kahne lagá:
Terá maskan mazbút hai,
Aur terá áshiyána bhí chaṭán par baná húá hai.
22Taubhí Qín ḳhánaḳharáb hogá,
Yaháṉ tak ki Asúr tujhe asír karke le jáegá.
23Aur us ne yih masal bhí shurú‘ kí, aur kahne lagá:
Háe, afsos! Jab Ḳhudá yih karegá, to kaun jítá bachegá?
24Par Kittím ke sáhil se jaház áeṉge,
Aur wuh Asúr aur ‘Ibr donoṉ ko dukh deṉge.
Phir wuh bhí halák ho jáegá.
25Is ke ba‘d Bal‘ám uṭhkar rawána húá, aur apne mulk ko lauṭá, aur Balaq ne bhí apní ráh lí.
Currently Selected:
Gintí 24: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)