Gintí 23
23
1Aur Bal‘ám ne Balaq se kahá, ki Mere liye yaháṉ sát mazbahe banwá de, aur sát bachhṛe aur sát meṉḍhe mere liye yaháṉ taiyár kar rakh. 2Balaq ne Bal‘ám ke kahne ke mutábiq kiyá, aur Balaq aur Bal‘ám ne har mazbah par ek bachhṛá aur ek meṉḍhá chaṛháyá. 3Phir Bal‘ám ne Balaq se kahá, Tú apní soḳhtaní qurbání ke pás khaṛá rah, aur maiṉ játá húṉ: mumkin hai ki Ḳhudáwand mujh se muláqát karne ko áe: so jo kuchh wuh mujh par záhir karegá, maiṉ tujhe batáúṉgá. Aur wuh ek barahna paháṛí par chalá gayá. 4Aur Ḳhudá Bal‘ám se milá: us ne us se kahá, Maiṉ ne sát mazbahe taiyár kiye haiṉ, aur un par ek ek bachhṛá, aur ek ek meṉḍhá chaṛháyá hai. 5Tab Ḳhudáwand ne ek bát Bal‘ám ke muṉh meṉ ḍálí, aur kahá, ki Balaq ke pás lauṭ já, aur yúṉ kahná. 6So wuh us ke pás lauṭkar áyá, aur kyá dekhtá hai, ki wuh apní soḳhtaní qurbání ke pás Moáb ke sab umará samet khaṛá hai. 7Tab us ne apní masal shurú‘ kí, aur kahne lagá:
Balaq ne mujhe Arám se,
Ya‘ní sháh i Moáb ne mashriq ke paháṛoṉ se bulwáyá,
Ki Á já aur merí ḳhátir Ya‘qúb par la‘nat kar,
Á, Isráíl ko phiṭkár.
8Maiṉ us par la‘nat kaise karúṉ, jis par Ḳhudá ne la‘nat nahíṉ kí?
Maiṉ use kaise phiṭkárúṉ, jise Ḳhudá ne nahíṉ phiṭkárá?
9Chaṭánoṉ kí choṭí par se wuh mujhe nazar áte haiṉ,
Aur paháṛoṉ par se maiṉ un ko dekhtá húṉ.
Dekh, yih wuh qaum hai, jo akelí basí rahegí,
Aur dúsrí qaumoṉ ke sáth milkar is ká shumár na hogá.
10Ya‘qúb kí gard ke zarroṉ ko kaun gin saktá hai,
Aur baní Isráíl kí chautháí ko kaun shumár kar saktá hai?
Kásh, maiṉ sádiqoṉ kí maut marúṉ,
Aur merí ‘áqibat bhí un hí kí mánind ho.
11Tab Balaq ne Bal‘ám se kahá, Yih tú ne mujh se kyá kiyá? Maiṉ ne tujhe bulwáyá táki tú mere dushmanoṉ par la‘nat kare, aur tú ne un ko barakat hí barakat dí. 12Us ne jawáb diyá aur kahá, Kyá maiṉ usí bát ká ḳhayál na karúṉ, jo Ḳhudáwand mere muṉh meṉ ḍále? 13Phir Balaq ne us se kahá, Ab mere sáth dúsrí jagah chal, jaháṉ se tú un ko dekh bhí sakegá; wuh sab ke sab to tujhe nahíṉ dikháí deṉge, par jo dúr dúr paṛe haiṉ, un ko dekh legá: phir tú waháṉ se merí ḳhátir un par la‘nat karná. 14So wuh use Pisgah kí choṭí par, jaháṉ Zofím ká maidán hai le gayá: wahíṉ us ne sát mazbahe banáe, aur har mazbah par ek bachhṛá aur ek meṉḍhá chaṛháyá. 15Tab us ne Balaq se kahá, ki Tú yaháṉ apní soḳhtaní qurbání ke pás ṭhahrá rah, jab ki maiṉ udhar jákar Ḳhudáwand se milkar áúṉ. 16Aur Ḳhudáwand Bal‘ám se milá, aur us ne us ke muṉh meṉ ek bát ḍálí, aur kahá, Balaq ke pás lauṭ já, aur yúṉ kahná. 17Aur jab wuh us ke pás lauṭá, to kyá dekhtá hai, ki wuh apní soḳhtaní qurbání ke pás Moáb ke umará samet khaṛá hai. Tab Balaq ne us se púchhá, Ḳhudáwand ne kyá kahá hai? 18Tab us ne apní masal shurú‘ kí, aur kahne lagá:
Uṭh, ai Balaq, aur sun,
Ai Safor ke beṭe! merí bátoṉ par kán lagá.
19Ḳhudá insán nahíṉ ki jhúṭh bole;
Aur na wuh ádamzád hai ki apná iráda badle:
Kyá, jo kuchh us ne kahá, use na kare?
Yá jo farmáyá hai, use púrá na kare?
20Dekh, mujhe to barakat dene ká hukm milá hai,
Us ne barakat dí hai, aur maiṉ use palaṭ nahíṉ saktá.
21Wuh Ya‘qúb meṉ badí nahíṉ pátá,
Aur na Isráíl meṉ koí ḳharábí dekhtá hai:
Ḳhudáwand us ká Ḳhudá us ke sáth hai,
Aur bádsháh kí sí lalkár un logoṉ ke bích meṉ hai.
22Ḳhudá un ko Misr se nikálkar liye á rahá hai;
Un meṉ janglí sáṉḍ kí sí táqat hai.
23Ya‘qúb par koí afsún nahíṉ chaltá,
Aur na Isráíl ke ḳhiláf fál koí chíz hai:
Balki Ya‘qúb aur Isráíl ke haqq meṉ ab yih kahá jáegá,
Ki Ḳhudá ne kaise kaise kám kiye.
24Dekh, yih guroh sherní kí tarah uṭhtí hai,
Aur sher kí mánind tankar khaṛí hotí hai:
Wuh ab nahíṉ leṭne kí, jab tak shikár na khá le,
Aur maqtúloṉ ká ḳhún na pí le.
25Tab Balaq ne Bal‘ám se kahá, Na to tú un par la‘nat hí kar, aur na un ko barakat hí de. 26Bal‘ám ne jawáb diyá, aur Balaq se kahá, Kyá, maiṉ ne tujh se nahíṉ kahá, ki Jo kuchh Ḳhudáwand kahe, wuhí mujhe karná paṛegá? 27Tab Balaq ne Bal‘ám se kahá, Achchhá, á, maiṉ tujh ko ek âur jagah le jáúṉ; sháyad Ḳhudá ko pasand áe ki tú merí ḳhátir waháṉ se un par la‘nat kare. 28Tab Balaq Bal‘ám ko Fagúr kí choṭí par, jaháṉ se Yashímon nazar átá hai, le gayá. 29Aur Bal‘ám ne Balaq se kahá, ki Mere liye yaháṉ sát mazbahe banwá, aur sát bail aur sát hí meṉḍhe mere liye taiyár kar rakh. 30Chunáṉchi Balaq ne, jaisá Bal‘ám ne kahá, waisá hí kiyá; aur har mazbah par ek bail aur ek meṉḍhá chaṛháyá.
Currently Selected:
Gintí 23: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)