Gintí 25
25
1Aur Isráílí Shittím meṉ rahte the, aur logoṉ ne Moábí ‘auratoṉ ke sáth harámkárí shurú‘ kar dí; 2kyúṉki wuh ‘aurateṉ in logoṉ ko apne deotáoṉ kí qurbáníoṉ meṉ áne kí da‘wat detí thíṉ, aur yih log jákar kháte aur un ke deotáoṉ ko sijda karte the. 3Yúṉ Isráílí Ba‘l Fag̣úr ko pújne lage; tab Ḳhudáwand ká qahr baní Isráíl par bhaṛká. 4Aur Ḳhudáwand ne Músá se kahá, Qaum ke sab sardároṉ ko pakaṛkar Ḳhudáwand ke huzúr dhúp meṉ ṭáṉg de, táki Ḳhudáwand ká shadíd qahr Isráíl par se ṭal jáe. 5So Músá ne baní Isráíl ke hákimoṉ se kahá, ki Tumháre jo jo ádmí Ba‘l Fag̣úr kí pújá karne lage haiṉ, un ko qatl kar ḍálo. 6Aur jab baní Isráíl kí jamá‘at ḳhaima e ijtimá‘ ke darwáze par ro rahí thí, to ek Isráílí Músá aur tamám logoṉ kí áṉkhoṉ ke sámne ek Midyání ‘aurat ko apne sáth apne bháiyoṉ ke pás le áyá. 7Jab Fínihás bin Ilí‘azar bin Hárún káhin ne yih dekhá, to us ne jamá‘at meṉ se uṭh háth meṉ ek barchhí lí, 8aur us mard ke píchhe jákar ḳhaime ke andar ghusá, aur us Isráílí mard aur us ‘aurat donoṉ ká peṭ chhed diyá. Tab baní Isráíl meṉ se wabá játí rahí. 9Aur jitne is wabá se mare, un ká shumár chaubís hazár thá.
10Aur Ḳhudáwand ne Músá se kahá, ki 11Fínihás bin Ilí‘azar bin Hárún káhin ne mere qahr ko baní Isráíl par se haṭáyá, kyúṉki un ke bích use mere liye g̣airat áí; isí liye maiṉ ne baní Isráíl ko apní g̣airat ke josh meṉ nábúd nahíṉ kiyá. 12So tú kah de, ki maiṉ ne us se apná sulh ká ‘ahd báṉdhá: 13aur wuh us ke liye, aur us ke ba‘d us kí nasl ke liye kahánat ká dáimí ‘ahd hogá; kyúṉki wuh apne Ḳhudá ke liye g̣airatmand húá, aur us ne baní Isráíl ke liye kaffára diyá. 14Us Isráílí mard ká nám, jo us Midyání ‘aurat ke sáth márá gayá, Zimrí thá, jo Salú ká betá, aur Shama‘ún ke qabíle ke ek ábáí ḳhándán ká sardár thá. 15Aur jo Midyání ‘aurat márí gayí, us ká nám Kazbí thá; wuh Súr kí beṭí thí, jo Midyán meṉ ek ábáí ḳhándán ke logoṉ ká sardár thá.
16Aur Ḳhudáwand ne Músá se kahá, ki 17Midyáníoṉ ko satáná, aur un ko márná, 18kyúṉki wuh tum ko apne makr ke dám meṉ pháṉsákar satáte haiṉ, jaisá Fag̣úr ke mu‘ámale meṉ húá, aur Kazbí ke mu‘ámale meṉ bhí húá, jo Midyán ke sardár kí beṭí, aur Midyáníoṉ kí bahin thí, aur Fag̣úr hí ke mu‘ámale meṉ wabá ke din márí gayí.
Currently Selected:
Gintí 25: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
