Gintí 20
20
1Aur pahle mahíne meṉ baní Isráíl kí sárí jamá‘at dasht i Síná meṉ á gayí: aur wuh log Qádis meṉ rahne lage; aur Maryam ne waháṉ wafát páí, aur wahíṉ dafn húí. 2Aur jamá‘at ke logoṉ ke liye waháṉ pání na milá: so wuh Músá and Hárún ke barḳhiláf ikaṭṭhe húe. 3Aur log Músá se jhagaṛne aur yih kahne lage, Háe, kásh ham bhí usí waqt mar játe, jab hamáre bháí Ḳhudáwand ke huzúr mare. 4Tum Ḳhudáwand kí jamá‘at ko is dasht meṉ kyúṉ le áe ho, ki ham bhí aur hamáre jánwar bhí yaháṉ mareṉ? 5Aur tum ne kyúṉ ham ko Misr se nikálkar is burí jagah pahuṉcháyá hai? yih to bone kí, aur anjíroṉ, aur tákoṉ, aur anároṉ kí jagah nahíṉ hai, balki yaháṉ to píne ke liye pání tak muyassar nahíṉ. 6Aur Músá and Hárún jamá‘at ke pás se jákar ḳhaima e ijtimá‘ ke darwáze par auṉdhe muṉh gire: tab Ḳhudáwand ká jalál un par záhir húá. 7Aur Ḳhudáwand ne Músá se kahá, ki 8Us láṭhí ko le, aur tú aur terá bháí Hárún, tum donoṉ jamá‘at ko ikaṭṭhá karo, aur un kí áṉkhoṉ ke sámne us chaṭán se kaho, ki wuh apná pání de; aur tú un ke liye chaṭán hí se pání nikálná; yúṉ jamá‘at ko aur un ke chaupáyoṉ ko piláná. 9Chunáṉchí Músá ne Ḳhudáwand ke huzúr se, usí ke hukm ke mutábiq wuh láṭhí lí. 10Aur Músá aur Hárún ne jamá‘at ko us chaṭán ke sámne ikaṭṭhá kiyá, aur us ne un se kahá, Suno, ai bág̣ío, kyá ham tumháre liye isí chaṭán se pání nikáleṉ? 11Tab Músá ne apná háth uṭháyá, aur us chaṭán par do bár láṭhí márí: aur kasrat se pání bah niklá, aur jamá‘at ne aur un ke chaupáyoṉ ne piyá. 12Par Músá aur Hárún se Ḳhudáwand ne kahá, Chúṉki tum ne merá yaqín nahíṉ kiyá, ki baní Isráíl ke sámne merí taqdís karte, is liye tum is jamá‘at ko, us mulk meṉ, jo maiṉ ne un ko diyá hai, nahíṉ pahuṉcháne páoge. 13Maríbah ká chashma yihí hai; kyúṉki baní Isráíl ne Ḳhudáwand se jhagṛá kiyá, aur wuh un ke darmiyán quddús sábit húá.
14Aur Músá ne Qádis se Adom ke bádsháh ke pás elchí rawána kiye, aur kahlá bhejá, ki Terá bháí Isráíl yih ‘arz kartá hai, ki Tú hamárí sárí musíbatoṉ se, jo ham par áíṉ, wáqif hai: 15ki hamáre bápdádá Misr meṉ gaye, aur ham bahut muddat tak Misr meṉ rahe, aur Misríoṉ ne ham se aur hamáre bápdádá se burá bartáo kiyá. 16Aur jab ham ne Ḳhudáwand se faryád kí, to us ne hamárí suní, aur ek firishte ko bhejkar ham ko Misr se nikál le áyá hai, aur ab ham Qádis shahr meṉ haiṉ, jo terí sarhadd ke aḳhír meṉ wáqi ‘hai: 17so ham ko apne mulk meṉ se hokar jáne kí ijázat de: ham khetoṉ aur tákistánoṉ meṉ se hokar nahíṉ guzreṉge, aur na kúoṉ ká pání píeṉge: ham sháhráh par chalkar jáeṉge, aur dahine yá báeṉ háth nahíṉ muṛeṉge, jab tak terí sarhadd se báhar nikal na jáeṉ. 18Par Sháh i Adom ne kahlá bhejá, ki Tú mere mulk se hokar jáne nahíṉ páegá, warna maiṉ talwár lekar terá muqábala karúṉgá. 19Baní Isráíl ne use phir kahlá bhejá, ki Ham saṛak hí saṛak jáeṉge; aur agar ham yá hamáre chaupáye terá pání bhí píeṉ, to us ká dám deṉge: ham ko âur kuchh nahíṉ cháhiye, siwá is ke ki ham ko páṉw páṉw chalkar nikal jáne de. 20Par us ne kahá, Tú hargiz nikalne nahíṉ páegá. Aur Adom us ke muqábale ke liye bahut se ádmí aur hathyár lekar nikal áyá. 21Yúṉ Adom ne Isráíl ko apní hudúd se guzarne ká rásta dene se inkár kiyá; is liye Isráíl us kí taraf se muṛ gayá.
22Aur baní Isráíl kí sárí jamá‘at Qádis se rawána hokar koh i Hor pahuṉchí. 23Aur Ḳhudáwand ne koh i Hor par, jo Adom kí sarhadd se milá húá thá, Músá aur Hárún se kahá, 24Hárún apne logoṉ meṉ já milegá, kyúṉki wuh us mulk meṉ, jo maiṉ ne baní Isráíl ko diyá hai, jáne nahíṉ páegá, is liye kí Maríbah ke chashme par tum ne mere kalám ke ḳhiláf ‘amal kiyá. 25So tú Hárún aur us ke beṭe Ilí‘azar ko apne sáth lekar koh i Hor ke úpar á já. 26Aur Hárún ke libás ko utárkar us ke beṭe Ilí‘azar ko pahiná dená, kyúṉki Hárún wahíṉ wafát pákar apne logoṉ meṉ já milegá. 27Aur Músá ne Ḳhudáwand ke hukm ke mutábiq ‘amal kiyá, aur wuh sárí jamá‘at kí áṉkhoṉ ke sámne koh i Hor par chaṛh gaye. 28Aur Músá ne Hárún ke libás ko utárkar us ke beṭe Ilí‘azar ko pahiná diyá, aur Hárún ne wahíṉ paháṛ kí choṭí par rihlat kí: tab Músá aur Ilí‘azar paháṛ par se utar áe. 29Jab jamá‘at ne dekhá, ki Hárún ne wafát páí, to Isráíl ke sáre gharáne ke log Hárún par tís din tak mátam karte rahe.
Currently Selected:
Gintí 20: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)