Gintí 19
19
1Aur Ḳhudáwand ne Músá aur Hárún se kahá, 2ki Shara‘ ke jis áín ká hukm Ḳhudáwand ne diyá hai, wuh yih hai, ki tú bání Isráíl se kah, ki wuh tere pás ek bedág̣ aur be‘aib surḳh rang kí bachhiyá láeṉ, jis par kabhí júá na rakkhá gayá ho. 3Aur tum use lekar Ilí‘azar káhin ko dená, ki wuh use lashkargáh ke báhar le jáe, aur koí use usí ke sámne zabh kar de. 4Aur Ilí‘azar káhin apní unglí se us ká kuchh ḳhún lekar use ḳhaima e ijtimá‘ ke áge kí taraf sát bár chhiṛke. 5Phir koí us kí áṉkhoṉ ke sámne us gáe ko jalá de; ya‘ní us ká chamṛá, aur gosht, aur ḳhún, aur gobar, in sab ko, wuh jaláe. 6Phir káhin deodár kí lakṛí aur zúfá aur surḳh kapṛá lekar us ág meṉ, jis meṉ gáe jaltí ho, ḍál de. 7Tab káhin apne kapṛe dhoe, aur pání se g̣usl kare; is ke ba‘d wuh lashkargáh ke andar áe, phir bhí káhin shám tak nápák rahegá. 8Aur jo us gáe ko jaláe wuh bhí apne kapṛe pání se dhoe, aur pání se gusl kare, aur wuh bhí shám tak nápák rahegá. 9Aur koí pák shaḳhs us gáe kí rákh ko baṭore, aur use lashkargáh ke báhar kisí pák jagah meṉ dhar de; yih baní Isráíl kí jamá‘at ke liye nápákí dúr karne ke pání ke liye rakkhí rahe; kyúṉki yih ḳhatá kí qurbání hai. 10Aur jo us gáe kí rákh ko baṭore, wuh bhí apne kapṛe dhoe, aur wuh bhí shám tak nápák rahegá; aur yih baní Isráíl ke, aur un pardesiyoṉ ke liye, jo un meṉ búdobásh karte haiṉ, ek dáimí áín hogá. 11Jo koí kisí ádmí kí lásh ko chhúe, wuh sát din tak nápák rahegá. 12Aisá ádmí tísre din us rákh se apne ko sáf kare, to wuh sátweṉ din pák ṭhahregá; par agar wuh tísre din apne ko sáf na kare, to wuh sátweṉ din pák nahíṉ ṭhahregá. 13Jo koí ádmí kí lásh ko chhúkar apne ko sáf na kare, wuh Ḳhudáwand ke maskan ko nápák kartá hai: wuh shaḳhs baní Isráíl meṉ se káṭ ḍálá jáegá, kyúṉki nápákí dúr karne ká pání us par chhiṛká nahíṉ gayá, is liye wuh nápák hai: us kí nápákí ab tak us par hai. 14Agar koí ádmí kisí ḍere meṉ mar jáe, to us ke báre meṉ shara‘ yih hai, ki jitne us ḍere meṉ áeṉ, aur jitne us ḍere meṉ rahte hoṉ, wuh sát din tak nápák raheṉge. 15Aur har ek khulá bartan, jis ká ḍhakná us par bandhá na ho, nápák ṭhahregá. 16Aur jo koí maidán meṉ talwár ke maqtúl ko, yá murde ko, yá ádmí kí haḍḍí ko, yá kisí qabr ko chhúe, wuh sát din tak nápák rahegá. 17Aur nápák ádmí ke liye us jalí húí ḳhatá kí qurbání kí rákh ko kisí bartan meṉ lekar us par bahtá pání ḍáleṉ. 18Phir koí pák ádmí zúfá lekar aur use pání meṉ ḍubo ḍubokar us ḍere par aur jitne bartan, aur ádmí waháṉ hoṉ, un par, aur jis shaḳhs ne haḍḍí ko, yá maqtúl ko, yá murde ko, yá qabr ko chhúá hai, us par chhiṛke. 19Wuh pák ádmí tísre din aur sátweṉ din us nápák ádmí par is pání ko chhiṛke, aur sátweṉ din use sáf kare, phir wuh apne kapṛe dhoe, aur pání se naháe, to wuh shám ko pák hogá. 20Lekin jo koí nápák ho, aur apní safáí na kare, wuh shaḳhs jamá‘at meṉ se kát ḍálá jáegá; kyúṉki us ne Ḳhudáwand ke maqdis ko nápák kiyá: nápákí dúr karne ká pání us par chhiṛká nahíṉ gayá, is liye wuh nápák hai. 21Aur yih un ke liye ek dáimí áín ho: jo nápákí dúr karne ke pání ko lekar chhiṛke, wuh apne kapṛe dhoe; aur jo koí nápákí dúr karne ke pání ko chhúe, wuh bhí shám tak nápák rahegá. 22Aur jis kisí chíz ko wuh nápák ádmí chhúe, wuh chíz nápák ṭhahregí, aur jo koí us chíz ko chhú le, wuh bhí shám tak nápák rahegá.
Currently Selected:
Gintí 19: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)