Gintí 18
18
1Aur Ḳhudáwand ne Hárún se kahá, ki Maqdis ká bár i gunáh tujh par, aur tere beṭoṉ, aur tere ábáí ḳhándán par hogá, aur tumhárí kahánat ká bár i gunáh bhí tujh par, aur tere beṭoṉ par hogá. 2Aur tú Láwí ke qabíle, ya‘ní apne báp ke qabíle ke logoṉ ko bhí, jo tere bháí haiṉ, apne sáth le áyá kar, táki wuh tere sáth hokar terí ḳhidmat kareṉ; par shahádat ke ḳhaime ke áge tú aur tere beṭe hí áyá kareṉ. 3Wuh terí ḳhidmat aur sáre ḳhaime kí muháfazat kareṉ: faqat wuh maqdis ke zurúf aur mazbah ke nazdík na jáeṉ, tá na ho, ki wuh bhí aur tum bhí halák ho jáo. 4So wuh tere sáth hokar ḳhaima e ijtimá‘ aur ḳhaime ke isti‘mál kí sárí chízoṉ kí muháfazat kareṉ, aur koí g̣air shaḳhs tumháre nazdík na áne páe. 5Aur tum maqdis aur mazbah kí muháfazat karo, táki áge ko phir baní Isráíl par qahr názil na ho. 6Aur dekho, maiṉ ne baní Láwí ko, jo tumháre bháí haiṉ, baní Isráíl se alag karke Ḳhudáwand kí ḳhátir baḳhshish ke taur par tum ko supurd kiyá, táki wuh ḳhaima e ijtimá‘ kí ḳhidmat kareṉ. 7Par mazbah kí aur parda ke andar kí ḳhidmat tere aur tere beṭoṉ ke zimma hai; so us ke liye tum apní kahánat kí hifázat karná: waháṉ tum hí ḳhidmat kiyá karná: kahánat kí ḳhidmat ká sharf maiṉ tum ko baḳhshtá húṉ: aur jo g̣air shaḳhs nazdík áe, wuh ján se márá jáe.
8Phir Ḳhudáwand ne Hárún se kahá, Dekh, maiṉ ne baní Isráíl kí sab pák chízoṉ meṉ se uṭháne kí qurbáníáṉ tujhe de díṉ; maiṉ ne un ko tere mamsúh hone ká haqq ṭhahrákar tujhe aur tere beṭoṉ ko hamesha ke liye diyá. 9Sab se pák chízoṉ meṉ se, jo kuchh ág se bacháyá jáe, wuh terá hogá: un ke sáre chaṛháwe, ya‘ní nazr kí qurbání, aur ḳhatá kí qurbání, aur jurm kí qurbání, jin ko wuh mere huzúr guzráneṉ, wuh tere aur tere beṭoṉ ke liye niháyat muqaddas ṭhahreṉ. 10Aur tú un ko niháyat muqaddas jánkar kháná: mard hí mard un ko kháeṉ; wuh tere liye pák haiṉ. 11Aur apne hadye meṉ se, jo kuchh baní Isráíl uṭháne kí qurbání aur hiláne kí qurbání ke taur par guzráneṉ, wuh bhí terá hí ho: in ko maiṉ tujh ko aur tere beṭe beṭiyoṉ ko hamesha ke haqq ke taur par detá húṉ; tere gharáne meṉ jitne pák haiṉ, wuh un ko kháeṉ. 12Achchhe se achchhá tel, aur achchhí se achchhí mai, aur achchhe se achchhá gehúṉ, ya‘ní in chízoṉ meṉ se, jo kuchh wuh pahle phal ke taur par Ḳhudáwand ke huzúr guzráneṉ, wuh sab maiṉ ne tujhe diyá. 13Un ke mulk kí sárí paidáwár ke pahle pakke phal, jin ko wuh Ḳhudáwand ke huzúr láeṉ, tere hoṉge; tere gharáne meṉ jitne pák haiṉ, wuh un ko kháeṉ. 14Baní Isráíl kí har ek maḳhsús kí húí chíz terí hogí. 15Un jándároṉ meṉ se, jin ko wuh Ḳhudáwand ke huzúr guzránte haiṉ, jitne pahlauṭhí ke bachche haiṉ, ḳhwáh wuh insán ke hoṉ ḳhwáh haiwán ke, wuh sab tere hoṉge: par insán ke pahlauṭhoṉ ká fidya lekar un ko zarúr chhoṛ dená; aur nápák jánwaroṉ ke pahlauṭhe bhí fidye se chhoṛ diye jáeṉ. 16Aur jin ká fidya diyá jáe, wuh jab ek mahíne ke hoṉ, to un ko apní ṭhahráí húí qímat ke mutábiq maqdis kí misqál ke hisáb se, jo bís jíre kí hotí hai, chándí kí páṉch misqál lekar chhoṛ dená. 17Lekin gáe aur bheṛ bakrí ke pahlauṭhoṉ ká fidya na liyá jáe; wuh muqaddas haiṉ: tú un ká ḳhún mazbah par chhiṛakná, aur un kí charbí átashín qurbání ke taur par jalá dená, táki wuh Ḳhudáwand ke huzúr ráhatangez ḳhushbú ṭhahre. 18Aur un ká gosht terá hogá, jis tarah hiláí húí qurbání ká sína aur dahiní rán tere haiṉ. 19Jitní muqaddas chízeṉ baní Isráíl uṭháne kí qurbání ke taur par Ḳhudáwand ke huzúr guzráneṉ, un sabhoṉ ko maiṉ ne tujhe aur tere beṭe beṭiyoṉ ko hamesha ke haqq ke taur par diyá: yih Ḳhudáwand ke huzúr tere aur terí nasl ke liye namak ká dáimí ‘ahd hai. 20Aur Ḳhudáwand ne Hárún se kahá, ki Un ke mulk meṉ tujhe koí mírás nahíṉ milegí, aur na un ke darmiyán terá koí hissa hogá, kyúṉki baní Isráíl meṉ terá hissa aur terí mírás maiṉ húṉ.
21Aur baní Láwí ko us ḳhidmat ke mu‘áwaze meṉ, jo wuh ḳhaima e ijtimá‘ meṉ karte haiṉ, maiṉ ne baní Isráíl kí sárí dahyakí maurúsí hisse ke taur par dí. 22Aur áge ko baní Isráíl ḳhaima e ijtimá‘ ke nazdík hargiz na áeṉ, tá na ho, ki gunáh un ke sir lage aur wuh mar jáeṉ. 23Balki baní Láwí ḳhaima e ijtimá‘ kí ḳhidmat kareṉ, aur wuhí un ká bár i gunáh uṭháeṉ: tumhárí pusht dar pusht yih ek dáimí áín ho, aur baní Isráíl ke darmiyán un ko koí mírás na mile. 24Kyúṉki maiṉ ne baní Isráíl kí dahyakí ko, jise wuh uṭháne kí qurbání ke taur par Ḳhudáwand ke huzúr guzráneṉge, un ká maurúsí hissa kar diyá hai: isí sabab se maiṉ ne un ke haqq meṉ kahá hai, ki Baní Isráíl ke darmiyán un ko koí mírás na mile.
25Aur Ḳhudáwand ne Músá se kahá, ki 26Tú Láwíoṉ se itná kah dená, ki Jab tum baní Isráíl se us dahyakí ko lo, jise maiṉ ne un kí taraf se tumhárá maurúsí hissa kar diyá hai, to tum us dahyakí kí dahyakí Ḳhudáwand ke huzúr uṭháne kí qurbání ke liye guzránná. 27Aur yih tumhárí uṭháí húí qurbání tumhárí taraf se aisí hí samjhí jáegí, jaise khalíhán ká g̣alla, aur kolhú kí mai samjhí játí hai. 28Is taríqe se tum bhí apní sab dahyakíoṉ meṉ se, jo tum ko baní Isráíl kí taraf se mileṉgí, Ḳhudáwand ke huzúr uṭháne kí qurbání guzránná, aur Ḳhudáwand kí yih uṭháí húí qurbání Hárún káhin ko dená. 29Jitne nazráne tum ko mileṉ, un meṉ se un ká achchhe se achchhá hissa, jo muqaddas kiyá gayá hai, aur Ḳhudáwand ká hai, tum uṭháne kí qurbání ke taur par guzránná. 30So tú un se kah dená, ki Jab tum in meṉ se un ká achchhe se achchhá hissa uṭháne kí qurbání ke taur par guzránoge, to wuh Láwíoṉ ke haqq meṉ khalíhán ke bhare g̣alle aur kolhú kí bharí mai ke barábar mahsúb hogá. 31Aur in ko tum apne gharánoṉ samet har jagah khá sakte ho, kyúṉki yih us ḳhidmat ke badle tumhárá ajr hai, jo tum ḳhaima e ijtimá‘ meṉ karoge. 32Aur jab tum us meṉ se achchhe se achchhá hissa uṭháne kí qurbání ke taur par guzránoge, to tum us ke sabab se gunahgár na ṭhahroge: aur ḳhabardár, baní Isráíl kí muqaddas chízoṉ ko nápák na karná, táki tum halák na ho.
Currently Selected:
Gintí 18: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
