Gintí 13
13
1Aur Ḳhudáwand ne Músá se kahá, ki 2Tú ádmíoṉ ko bhej, ki wuh mulk i Kan‘án ká, jo maiṉ baní Isráíl ko detá húṉ, hál daryáft kareṉ: un ke bápdádá ke har qabíle se ek ádmí bhejná, jo un ke háṉ ká raís ho. 3Chunáṉchi Músá ne Ḳhudáwand ke irshád ke muwáfiq dasht i Fárán se aise ádmí rawána kiye, jo baní Isráíl ke sardár the. 4Un ke yih nám the: Rúbin ke qabíle se Zakúr ká beṭá Sammúa‘. 5Aur Shama‘ún ke qabíle se Horí ká beṭá Sáfat. 6Aur Yahúdáh ke qabíle se Yafunnah ká beṭá Kálib. 7Aur Ishkár ke qabíle se Yúsuf ká beṭá Ijál. 8Aur Ifráím ke qabíle se Nún ká beṭá Húsi‘a. 9Aur Binyamín ke qabíle se Rafú ká beṭá Faltí. 10Aur Zabúlún ke qabíle se Sodí ká beṭá Jaddíel. 11Aur Yúsuf ke qabíle, ya‘ní Munassí ke qabíle se, Súsí ká beṭá Jaddí. 12Aur Dán ke qabíle se Jamallí ká beṭá ‘Ammíel. 13Aur Áshar ke qabíle se Míkáel ká beṭá Satúr. 14Aur Naftálí ke qabíle se Wufsí ká beṭá Naḳhbí. 15Aur Jadd ke qabíle se Mákí ká beṭá Jyúel. 16Yihí un logoṉ ke nám haiṉ, jin ko Músá ne mulk ká hál daryáft karne ko bhejá thá. Aur Nún ke beṭe Húsi‘a ká nám Músá ne Yashú‘ rakkhá. 17Aur Músá ne un ko rawána kiyá, táki mulk i Kan‘án ká hál daryáft kareṉ; aur un se kahá, ki Tum idhar junúb kí taraf se jákar paháṛoṉ meṉ chále jáná, 18aur dekhná, ki wuh mulk kaisá hai, aur jo log waháṉ base húe haiṉ, wuh kaise haiṉ, zoráwar haiṉ, yá kamzor, aur thoṛe se haiṉ, yá bahut. 19Aur jis mulk meṉ wuh ábád haiṉ, wuh kaisá hai, achchhá hai, yá burá; aur jin shahroṉ meṉ wuh rahte haiṉ, wuh kaise haiṉ; áyá wuh ḳhaimoṉ meṉ rahte haiṉ, yá qil‘aoṉ meṉ; 20aur waháṉ kí zamín kaisí hai? zarḳhez hai, yá banjar; aur us meṉ daraḳht haiṉ, yá nahíṉ? Tumhárí himmat bandhí rahe, aur tum us mulk ká kuchh phal lete áná. Aur wuh mausim angúr kí pahlí fasl ká thá. 21So wuh rawána húe, aur dasht i Sín se Rahob tak, jo Hamát ke ráste meṉ hai, mulk ko ḳhúb dekhá bhálá. 22Aur wuh junúb kí taraf se hote húe Habrún tak gaye, jaháṉ ‘Anáq ke beṭe Aḳhímán, aur Sísí, aur Talmí rahte the. (Aur Habrún Zu‘an se, jo Misr meṉ hai, sát baras áge basá thá.) 23Aur wuh wádí e Iskál meṉ pahuṉche: waháṉ se unhoṉ ne angúr kí ek ḍálí káṭ lí, jis meṉ ek hí guchchhá thá, aur jise do ádmí ek láṭhí par laṭkáe húe lekar gaye; aur wuh kuchh anár aur anjír bhí láe. 24Usí guchchhe ke sabab se, jise Isráílíoṉ ne waháṉ se káṭá thá, us jagah ká nám wádí e Iskál paṛ gayá. 25Aur chálís din ke ba‘d wuh us mulk ká hál daryáft karke lauṭe. 26Aur wuh chale, aur Músá aur Hárún aur baní Isráíl kí sárí jamá‘at ke pás dasht i Fárán ke Qádis meṉ áe; aur un ko aur sárí jamá‘at ko sab kaifíyat sunáí, aur us mulk ká phal un ko dikháyá. 27Aur Músá se kahne lage, ki Jis mulk meṉ tú ne ham ko bhejá thá, ham waháṉ gaye, aur wáqa‘í dúdh aur shahd us meṉ bahtá hai, aur yih waháṉ ká phal hai. 28Lekin jo log waháṉ base húe haiṉ, wuh zoráwar haiṉ, aur un ke shahr baṛe baṛe aur fasíldár haiṉ, aur ham ne baní ‘Anáq ko bhí waháṉ dekhá. 29Us mulk ke junúbí hisse meṉ to ‘Amálíqí ábád haiṉ, aur Hittí, aur Yabúsí, aur Amorí paháṛoṉ par rahte haiṉ, aur samundar ke sáhil par aur Yardan ke kanáre kanáre Kan‘ání base húe haiṉ. 30Tab Kálib ne Músá ke sámne logoṉ ko chup karáyá, aur kahá, ki Chalo, ham ek dam jákar us par qabza kareṉ, kyúṉki ham is qábil haiṉ ki us par tasarruf kar leṉ. 31Lekin jo âur ádmí us ke sáth gaye the, wuh kahne lage, ki Ham is láiq nahíṉ haiṉ, ki un logoṉ par hamla kareṉ, kyúṉki wuh ham se ziyáda zoráwar haiṉ. 32In ádmíoṉ ne baní Isráíl ko us mulk kí, jise wuh dekhne gaye the, burí ḳhabar dí, aur yih kahá, ki Wuh mulk, jis ká hál daryáft karne ko ham us meṉ se guzre, ek aisá mulk hai, jo apne báshindoṉ ko khá játá hai, aur waháṉ jitne ádmí ham ne dekhe, wuh sab baṛe qaddáwar haiṉ. 33Aur ham ne waháṉ baní ‘Anáq ko bhí dekhá, jo jabbár haiṉ aur jabbároṉ kí nasl se haiṉ, aur ham to apní hí nigáh meṉ aise the jaise ṭiḍḍe hote haiṉ, aur aise hí un kí nigáh meṉ the.
Currently Selected:
Gintí 13: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)