Gintí 12
12
1Aur Músá ne ek Kúshí ‘aurat se biyáh kar liyá: so us Kúshí ‘aurat ke sabab se, jise Músá ne biyáh liyá thá, Maryam aur Hárún us kí badgoí karne lage. 2Wuh kahne lage, ki Kyá Ḳhudáwand ne faqat Músá hí se báteṉ kí haiṉ? kyá us ne ham se bhí báteṉ nahíṉ kíṉ? Aur Ḳhudáwand ne yih suná. 3Aur Músá rú e zamín ke sab ádmíoṉ se ziyáda halím thá. 4So Ḳhudáwand ne nágahán Músá, aur Hárún aur Maryam se kahá, ki Tum tínoṉ nikalkar ḳhaima e ijtimá‘ ke pás házir ho. So wuh tínoṉ waháṉ áe. 5Aur Ḳhudáwand abr ke sutún meṉ hokar utrá, aur ḳhaime ke darwáze par khaṛe hokar Hárún aur Maryam ko buláyá: wuh donoṉ pás gaye. 6Tab us ne kahá, Merí báteṉ suno: agar tum meṉ koí nabí ho, to maiṉ, jo Ḳhudáwand húṉ, use royá meṉ dikháí dúṉgá, aur ḳhwáb meṉ us se báteṉ karúṉgá. 7Par merá ḳhádim Músá aisá nahíṉ hai: wuh mere sáre ḳhándán meṉ amánatdár hai; 8maiṉ us se mu‘ammoṉ meṉ nahíṉ, balki rúbarú, aur saríh taur par báteṉ kartá húṉ; aur use Ḳhudáwand ká dídár bhí nasíb hotá hai: so tum ko mere ḳhádim Músá kí badgoí karte ḳhauf kyúṉ na áyá? 9Aur Ḳhudáwand ká g̣azab un par bhaṛká aur wuh chalá gayá. 10Aur abr ḳhaime ke úpar se haṭ gayá, aur Maryam koṛh se barf kí mánind safed ho gayí: aur Hárún ne jo Maryam kí taraf nazar kí, to dekhá ki wuh koṛhí ho gayí hai. 11Tab Hárún Músá se kahne lagá, Háe, mere málik, is gunáh ko hamáre sir na lagá, kyúṉki ham se nádání húí, aur ham ne ḳhatá kí. 12Aur Maryam ko us mare húe kí tarah na rahne de, jis ká jism us kí paidáish hí ke waqt ádhá galá húá hotá hai. 13Tab Músá Ḳhudáwand se faryád karne lagá, ki Ai Ḳhudá, maiṉ terí minnat kartá húṉ use shifá de. 14Aur Ḳhudáwand ne Músá se kahá, ki Agar us ke báp ne us ke muṉh par faqat thúká hí hotá, to kyá sát din tak wuh sharminda na rahtí? so wuh sát din tak lashkargáh ke báhar band rahe, is ke ba‘d wuh phir andar áne páe. 15Chunáṉchi Maryam sát din tak lashkargáh ke báhar band rahí; aur logoṉ ne, jab tak wuh andar áne na páí, kúch na kiyá. 16Is ke ba‘d wuh log Haserát se rawána húe, aur dasht i Fárán meṉ pahuṉchkar unhoṉ ne ḍere ḍále.
Currently Selected:
Gintí 12: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
