Popular Bible Verses from Gintí 13

Share

Tab Kálib ne Músá ke sámne logoṉ ko chup karáyá, aur kahá, ki Chalo, ham ek dam jákar us par qabza kareṉ, kyúṉki ham is qábil haiṉ ki us par tasarruf kar leṉ.

Aur ham ne waháṉ baní ‘Anáq ko bhí dekhá, jo jabbár haiṉ aur jabbároṉ kí nasl se haiṉ, aur ham to apní hí nigáh meṉ aise the jaise ṭiḍḍe hote haiṉ, aur aise hí un kí nigáh meṉ the.

Lekin jo âur ádmí us ke sáth gaye the, wuh kahne lage, ki Ham is láiq nahíṉ haiṉ, ki un logoṉ par hamla kareṉ, kyúṉki wuh ham se ziyáda zoráwar haiṉ.

In ádmíoṉ ne baní Isráíl ko us mulk kí, jise wuh dekhne gaye the, burí ḳhabar dí, aur yih kahá, ki Wuh mulk, jis ká hál daryáft karne ko ham us meṉ se guzre, ek aisá mulk hai, jo apne báshindoṉ ko khá játá hai, aur waháṉ jitne ádmí ham ne dekhe, wuh sab baṛe qaddáwar haiṉ.

Aur Músá se kahne lage, ki Jis mulk meṉ tú ne ham ko bhejá thá, ham waháṉ gaye, aur wáqa‘í dúdh aur shahd us meṉ bahtá hai, aur yih waháṉ ká phal hai.

Lekin jo log waháṉ base húe haiṉ, wuh zoráwar haiṉ, aur un ke shahr baṛe baṛe aur fasíldár haiṉ, aur ham ne baní ‘Anáq ko bhí waháṉ dekhá.

Us mulk ke junúbí hisse meṉ to ‘Amálíqí ábád haiṉ, aur Hittí, aur Yabúsí, aur Amorí paháṛoṉ par rahte haiṉ, aur samundar ke sáhil par aur Yardan ke kanáre kanáre Kan‘ání base húe haiṉ.

Aur wuh chale, aur Músá aur Hárún aur baní Isráíl kí sárí jamá‘at ke pás dasht i Fárán ke Qádis meṉ áe; aur un ko aur sárí jamá‘at ko sab kaifíyat sunáí, aur us mulk ká phal un ko dikháyá.