Aiyúb 9
9
1Phir Aiyúb ne jawáb diyá,
2Darhaqíqat maiṉ jántá húṉ, ki bát yúṉ hí hai;
Par insán Ḳhudá ke huzúr kaise rástbáz ṭhahre?
3Agar wuh us se bahs karne ko rází bhí ho,
To yih hazár bátoṉ meṉ se use ek ká bhí jawáb na de sakegá.
4Wuh dil ká ‘aqlmand, aur táqat meṉ zoráwar hai;
Kis ne jur’at karke us ká sámná kiyá aur baromand húá?
5Wuh paháṛoṉ ko haṭá detá hai, aur unheṉ patá bhí nahíṉ lagtá;
Wuh apne qahr meṉ unheṉ ulaṭ detá hai.
6Wuh zamín ko us kí jagah se hilá detá hai;
Aur us ke sutún káṉpne lagte haiṉ.
7Wuh áftáb ko hukm kartá hai, aur wuh tulú‘ nahíṉ hotá;
Aur sitároṉ par muhr lagá detá hai.
8Wuh ásmánoṉ ko akelá tán detá hai,
Aur samundar kí lahroṉ par chaltá hai.
9Us ne Banátu’n na‘sh, aur Jabbár, aur Suraiyá,
Aur junúb ke burjoṉ ko banáyá.
10Wuh baṛe baṛe kám, jo daryáft nahíṉ ho sakte,
Aur beshumár ‘ajáib kartá hai.
11Dekho, wuh mere pás se guzartá hai, par mujhe dikháí nahíṉ detá.
Wuh áge bhí baṛh játá hai, par maiṉ use nahíṉ dekhtá.
12Dekho, wuh shikár pakaṛtá hai, kaun use rok saktá hai?
Kaun us se kahegá, ki Tú kyá kartá hai?
13Ḳhudá apne g̣azab ko nahíṉ haṭáegá;
Ráhab ke madadgár us ke níche jhuk játe haiṉ.
14Phir merí kyá haqíqat hai, ki maiṉ use jawáb dúṉ,
Aur us se bahs karne ko apne lafz chháṉṭ chháṉṭkar nikálúṉ?
15Use to maiṉ, agar sádiq bhí hotá, to jawáb na detá;
Maiṉ apne muḳhálif kí minnat kartá.
16Agar wuh mere pukárne par mujhe jawáb bhí detá,
Taubhí maiṉ yaqín na kartá ki us ne merí áwáz suní.
17Wuh túfán se mujhe toṛtá hai;
Aur besabab mere zaḳhmoṉ ko ziyáda kartá hai.
18Wuh mujhe dam nahíṉ lene detá,
Balki mujhe talḳhí se labrez kartá hai.
19Agar zoráwar kí táqat ká zikr ho, to dekho, wuh hai.
Aur agar insáf ká, to mere liye waqt kaun ṭhahráegá?
20Agar maiṉ sádiq bhí húṉ, taubhí merá hí muṉh mujhe mulzim ṭhahráegá:
Agar kámil bhí húṉ, taubhí yih mujhe kajrau sábit karegá.
21Maiṉ kámil to húṉ, par maiṉ apne ko kuchh nahíṉ samajhtá;
Maiṉ apní zindagí ko haqír jántá húṉ.
22Yih sab ek hí bát hai; is liye maiṉ kahtá húṉ,
Ki wuh kámil aur sharír, donoṉ ko, halák kar detá hai.
23Agar marí nágahán halák karne lage,
To wuh begunáh kí ázmáish ká mazhaka uṛátá hai.
24Zamín sharíroṉ ko supurd kar dí gayí hai:
Wuh us ke hákimoṉ ke muṉh ḍháṉk detá hai;
Agar wuhí nahíṉ, to âur kaun hai?
25Mere din harkároṉ se bhí tezrau haiṉ:
Wuh uṛe chale játe haiṉ, aur ḳhushí nahíṉ dekhne páte.
26Wuh tez jaházoṉ kí tarah nikal gaye;
Aur us ‘uqáb kí mánind jo shikár par jhapaṭtá ho.
27Agar maiṉ kahúṉ, Maiṉ apná g̣am bhulá dúṉgá,
Aur udásí chhoṛkar dilshád húṉgá;
28To maiṉ apne dukhoṉ se ḍartá húṉ;
Maiṉ jántá húṉ ki tú mujhe begunáh na ṭhahráegá.
29Maiṉ to mulzim ṭhahrúṉgá;
Phir maiṉ ‘abas zahmat kyúṉ uṭháúṉ?
30Agar maiṉ apne ko barf ke pání se dhoúṉ,
Aur apne háth kitne hí sáf karúṉ;
31Taubhí tú mujhe kháí meṉ g̣ota degá,
Aur mere hí kapṛe mujh se ghin kháeṉge.
32Kyúṉki wuh merí tarah ádmí nahíṉ, ki maiṉ use jawáb dúṉ,
Aur ham ‘adálat meṉ báham házir hoṉ.
33Hamáre darmiyán koí sális nahíṉ,
Jo ham donoṉ par apná háth rakkhe.
34Wuh apná ‘asá mujh se haṭá le,
Aur us kí ḍaráoní bát mujhe hirásán na kare:
35Tab maiṉ kuchh kahúṉgá, aur us se ḍarne ká nahíṉ;
Kyúṉki apne áp meṉ to maiṉ aisá nahíṉ húṉ.
Currently Selected:
Aiyúb 9: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
