Aiyúb 10
10
1Merí rúh merí zindagí se bezár hai;
Maiṉ apná shakwa ḳhúb dil kholkar karúṉgá;
Maiṉ apne dil kí talḳhí meṉ bolúṉgá.
2Maiṉ Ḳhudá se kahúṉgá, Mujhe mulzim na ṭhahrá;
Mujhe batá, ki tú mujh se kyúṉ jhagaṛtá hai.
3Kyá tujhe achchhá lagtá hai, ki andher kare,
Aur apne háthoṉ kí banáí húí chíz ko haqír jáne,
Aur sharíroṉ kí mashwarat ko raushan kare?
4Kyá terí áṉkheṉ gosht kí haiṉ,
Yá tú aise dekhtá hai jaise ádmí dekhtá hai?
5Kyá tere din ádmí ke din kí tarah,
Aur tere sál insán ke aiyám ki mánind haiṉ,
6Ki tú merí badkárí ko púchhtá,
Aur merá gunáh ḍhúṉḍhtá hai,
7Go tujhe ma‘lúm hai ki maiṉ sharír nahíṉ húṉ;
Aur koí nahíṉ jo tere háth se chhuṛá sake?
8Tere hí háthoṉ ne mujhe banáyá,
Aur sarásar joṛkar kámil kiyá,
Phir bhí tú mujhe halák kartá hai.
9Yád kar, ki tú ne guṉdhí húí miṭṭí kí tarah mujhe banáyá;
Aur kyá tú mujhe phir ḳhák meṉ miláegá?
10Kyá tú ne mujhe dúdh kí tarah nahíṉ unḍelá,
Aur panír kí tarah nahíṉ jamáyá?
11Phir tú ne mujh par chamṛá aur gosht chaṛháyá,
Aur haḍḍiyoṉ aur nasoṉ se mujhe joṛ diyá.
12Tú ne mujhe ján baḳhshí aur mujh par karam kiyá,
Aur terí nigahbání ne merí rúh salámat rakkhí.
13Taubhí tú ne yih báteṉ apne dil meṉ chhipá rakkhí thíṉ;
Maiṉ jántá húṉ ki terá yihí iráda hai, ki
14Agar maiṉ gunáh karúṉ, to tú mujh par nigrán hogá;
Aur tú mujhe merí badkárí se barí nahíṉ karegá.
15Agar maiṉ badí karúṉ, to mujh par afsos!
Agar maiṉ sádiq banúṉ, taubhí apná sir nahíṉ uṭháne ká;
Kyúṉki maiṉ ruswáí se bhará húṉ,
Aur apní musíbat ko dekhtá rahtá húṉ.
16Aur agar sir uṭháúṉ, to tú sher kí tarah mujhe shikár kartá hai;
Aur phir ‘ajíb súrat meṉ mujh par záhir hotá hai.
17Tú mere ḳhiláf naye naye gawáh látá hai,
Aur apná qahr mujh par baṛhátá hai;
Nayí nayí faujeṉ mujh par chaṛh átí haiṉ.
18Pas tú ne mujhe rihm se nikálá hí kyúṉ?
Maiṉ ján de detá aur koí áṉkh mujhe dekhne na pátí.
19Maiṉ aisá hotá ki goyá thá hí nahíṉ,
Maiṉ rihm hí se qabr meṉ pahuṉchá diyá játá.
20Kyá mere din thoṛe se nahíṉ? báz á,
Aur mujhe chhoṛ de, táki maiṉ kuchh ráhat páúṉ,
21Is se pahle ki maiṉ waháṉ jáúṉ jaháṉ se phir na lauṭúṉgá,
Ya‘ní táríkí aur maut ke sáye kí sarzamín ko;
22Gahrí táríkí kí sarzamín jo ḳhud táríkí hí hai;
Maut ke sáye kí sarzamín, jo betartíb hai,
Aur jaháṉ raushní bhí aisí hai jaisí táríkí.
Currently Selected:
Aiyúb 10: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
