Aiyúb 7
7
1Kyá insán ke liye zamín par jang o jadal nahíṉ?
Aur kyá us ke din mazdúr ke se nahíṉ hote?
2Jaise naukar sáye kí baṛí árzú kartá hai,
Aur mazdúr apní ujrat ká muntazir rahtá hai;
3Waise hí maiṉ butlán ke mahínoṉ ká málik banáyá gayá húṉ,
Aur musíbat kí ráteṉ mere liye ṭhahráí gayí haiṉ.
4Jab maiṉ leṭtá húṉ to kahtá húṉ,
Kab uṭhúṉgá? par rát lambí hotí hai;
Aur din nikalne tak idhar udhar karwaṭeṉ badaltá rahtá húṉ.
5Merá jism kíṛoṉ aur miṭṭí ke ḍheloṉ se ḍhaká hai;
Merí khál simaṭtí aur phir násúr ho játí hai.
6Mere din juláhe kí dhaṛkí se bhí tezraftár haiṉ,
Aur bag̣air ummed ke guzar játe haiṉ.
7Áh, yád kar, ki merí zindagí hawá hai:
Aur merí áṉkh ḳhushí ko phir na dekhegí.
8Jo mujhe ab dekhtá hai, us kí áṉkh mujhe phir na dekhegí:
Terí áṉkheṉ to mujh par hoṉgí, par maiṉ na húṉgá.
9Jaise bádal phaṭkar g̣áib ho játá hai,
Waise hí wuh jo qabr meṉ utartá hai, phir kabhí úpar nahíṉ átá.
10Wuh apne ghar ko phir na lauṭegá,
Na us kí jagah use phir pahchánegí.
11Is liye maiṉ apná muṉh band nahíṉ rakkhúṉgá;
Maiṉ apní rúh kí talḳhí meṉ boltá jáúṉgá;
Maiṉ apní ján ke ‘azáb meṉ shakwa karúṉgá.
12Kyá maiṉ samundar húṉ, yá magarmachh,
Jo tú mujh par pahrá biṭhátá hai?
13Jab maiṉ kahtá húṉ, Merá bistar mujhe árám pahuṉcháegá,
Merá bichhauná mere g̣am ko halká karegá;
14To tú ḳhwáboṉ se mujhe ḍarátá,
Aur royatoṉ se mujhe sahmá detá hai:
15Yaháṉ tak ki merí ján pháṉsí
Aur maut ko, merí in haḍḍiyoṉ par tarjíh detí hai.
16Mujhe apní ján se nafrat hai; maiṉ hamesha tak zinda rahná nahíṉ cháhtá:
Mujhe chhoṛ de; kyúṉki mere din butlán haiṉ.
17Insán kí bisát hí kyá hai, jo tú use sarfaráz kare,
Aur apná dil us par lagáe,
18Aur har subh us kí ḳhabar le,
Aur har lamha use ázmáe?
19Tú kab tak apní nigáh merí taraf se nahíṉ haṭáegá,
Aur mujhe itní bhí muhlat na degá ki apná thúk nigal lúṉ?
20Ai baní Ádam ke názir, agar maiṉ ne gunáh kiyá hai, to terá kyá bigáṛtá húṉ?
Tú ne kyúṉ mujhe apná nishána baná liyá hai,
Yaháṉ tak ki maiṉ apne áp par bojh húṉ?
21Tú merá gunáh kyúṉ nahíṉ mu‘áf kartá, aur merí badkárí kyúṉ nahíṉ dúr kar detá?
Ab to maiṉ miṭṭí meṉ so jáúṉgá,
Aur tú mujhe ḳhúb ḍhúṉḍhegá, par maiṉ na húṉgá.
Currently Selected:
Aiyúb 7: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
