Aiyúb 6
6
1Tab Aiyúb ne jawáb diyá,
2Kásh ki merá kuṛhná tolá játá,
Aur merí sárí musíbat tarázú meṉ rakkhí játí!
3To wuh samundar kí ret se bhí bhárí utartí;
Isí liye merí báteṉ beta’ammulí kí haiṉ.
4Kyúṉki Qádir i mutlaq ke tír mere andar lage húe haiṉ;
Merí rúh un hí ke zahr ko pí rahí hai;
Ḳhudá kí ḍaráoní báteṉ mere ḳhiláf saff báṉdhe húe haiṉ.
5Kyá janglí gadhá us waqt bhí reṉgtá hai, jab use ghás mil játí hai?
Yá kyá bail chárá pákar ḍakártá hai?
6Kyá phíkí chíz benamak kháí já saktí hai?
Yá kyá anḍe kí safedí meṉ koí maza hai?
7Merí rúh ko un ke chhúne se bhí inkár hai;
Wuh mere liye makrúh g̣izá hai.
8Kásh ki merí darḳhwást manzúr hotí;
Aur Ḳhudá mujhe wuh chíz baḳhshtá jis kí mujhe árzú hai!
9Ya‘ní Ḳhudá ko yihí manzúr hotá ki mujhe kuchal ḍále;
Aur apná háth chalákar mujhe káṭ ḍále!
10To mujhe tasallí hotí;
Balki maiṉ us aṭal dard meṉ bhí shádmán rahtá,
Kyúṉki maiṉ ne us Quddús kí bátoṉ ká inkár nahíṉ kiyá.
11Merí táqat hí kyá hai, jo maiṉ ṭhahrá rahúṉ?
Aur merá anjám hí kyá hai, jo maiṉ sabr karúṉ?
12Kyá merí táqat pattharoṉ kí táqat hai?
Yá merá jism pítal ká hai?
13Kyá bát yihí nahíṉ ki maiṉ bebas húṉ,
Aur kám karne kí quwwat mujh se játí rahí hai?
14Us par jo bedil hone ko hai, us ke dost kí taraf se mihrbání honí cháhiye;
Balki us par bhí jo Qádir i mutlaq ká ḳhauf chhoṛ detá hai.
15Mere bháiyoṉ ne nále kí tarah dag̣á kí,
Un wádíoṉ ke náloṉ kí tarah jo súkh játe haiṉ;
16Jo yaḳh ke sabab se kále haiṉ,
Aur jin meṉ barf chhipí hai.
17Jis waqt wuh garm hote haiṉ, to g̣áib ho játe haiṉ,
Aur jab garmí paṛtí hai, to apní jagah se uṛ játe haiṉ.
18Qáfile apne ráste se muṛ játe haiṉ;
Aur biyábán meṉ jákar halák ho játe haiṉ.
19Taimá ke qáfile dekhte rahe;
Sabá ke kárwán un ke intizár meṉ rahe.
20Wuh sharminda húe, kyúṉki unhoṉ ne ummed kí thí;
Wuh waháṉ áe aur pashemán húe.
21So tumhárí bhí koí haqíqat nahíṉ;
Tum ḍaráoní chíz dekhkar ḍar játe ho.
22Kyá maiṉ ne kahá, Kuchh mujhe do?
Yá, Apne mál meṉ se mere liye rishwat do?
23Yá, Muḳhálif ke háth se mujhe bacháo?
Yá, Zálimoṉ ke háth se mujhe chhuṛáo?
24Mujhe samjháo, aur maiṉ ḳhámosh rahúṉgá;
Aur mujhe samjháo ki maiṉ kis bát meṉ chúká.
25Rástí kí báteṉ kaisí mu’assir hotí haiṉ!
Par tumhárí dalíl kis bát kí tardíd kartí hai?
26Kyá tum is ḳhayál meṉ ho, ki lafzoṉ kí tardíd karo?
Is liye ki máyús kí báteṉ hawá kí tarah hotí haiṉ.
27Háṉ, tum to yatímoṉ par qur‘a ḍálnewále,
Aur apne dost ko saudágarí ká mál banánewále ho.
28Is liye zará merí taraf nigáh karo;
Kyúṉki tumháre muṉh par maiṉ hargiz jhúṭh na bolúṉgá.
29Maiṉ tumhárí minnat kartá húṉ, báz áo, beinsáfí na karo;
Háṉ, báz áo, maiṉ haqq par húṉ.
30Kyá merí zabán par beinsáfí hai?
Kyá fitnaangezí kí bátoṉ ke pahchánne ká mujhe shu‘úr nahíṉ?
Currently Selected:
Aiyúb 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
