Aiyúb 5
5
1Zará pukár; kyá koí hai jo tujhe jawáb degá?
Aur muqaddasoṉ meṉ se tú kis kí taraf phiregá?
2Kyúṉki kuṛhná bewuqúf ko már ḍálta hai,
Aur jalan ahmaq kí ján le letí hai.
3Maiṉ ne bewuqúf ko jaṛ pakaṛte dekhá hai,
Par nágahán us ke maskan par la‘nat kí.
4Us ke bálbachche salámatí se dúr haiṉ;
Wuh pháṭak hí par kuchle játe haiṉ,
Aur koí nahíṉ jo unheṉ chhuṛáe.
5Bhúká us kí fasl ko khátá hai,
Balki use káṉṭoṉ meṉ se bhí nikál letá hai;
Aur piyásá us ke mál ko nigal játá hai.
6Kyúṉki musíbat miṭṭí meṉ se nahíṉ ugtí,
Na dukh zamín meṉ se nikaltá hai;
7Par jaise chingáriyáṉ úpar hí ko úrṭí haiṉ,
Waise hí insán dukh ke liye paidá húá hai.
8Lekin maiṉ to Ḳhudá hí ká tálib rahúṉgá,
Aur apná mu‘ámala Ḳhudá hí par chhoṛúṉgá:
9Jo aise baṛe baṛe kám, jo daryáft nahíṉ ho sakte,
Aur beshumár ‘ajíb kám kartá hai.
10Wuhí zamín par meṉh barsátá,
Aur khetoṉ meṉ pání bhejtá hai.
11Isí tarah wuh firotanoṉ ko úṉchí jagah par biṭhátá hai;
Aur mátam karnewále salámatí kí sarfarází páte haiṉ.
12Wuh ‘aiyároṉ kí tadbíroṉ ko bátil kar detá hai;
Yaháṉ tak ki un ke háth un ke maqsúd ko púrá nahíṉ kar sakte.
13Wuh hoshyároṉ ko un hí kí chálákíoṉ meṉ phaṉsátá hai;
Aur ṭeṛhe logoṉ kí mashwarat jald játí rahtí hai.
14Unheṉ din daháṛe andhere se pálá paṛtá hai,
Aur wuh do pahar ke waqt aise ṭaṭolte phirte haiṉ jaise rát ko.
15Lekin muflis ko, un ke muṉh kí talwár
Aur zabardast ke háth se, wuh bachá letá hai.
16So miskín ko ummed rahtí hai;
Aur badkárí apná muṉh band kar letí hai.
17Dekh, wuh ádmí, jise Ḳhudá tambíh kartá hai, ḳhushqismat hai;
Is liye Ḳhudá kí tádíb ko haqír na ján.
18Kyúṉki wuhí majrúh kartá, aur paṭṭí báṉdhtá hai;
Wuhí zaḳhmí kartá hai, aur usí ke háth chaṉgá karte haiṉ.
19Wuh tujhe chha musíbatoṉ se chhuṛáegá;
Balki sát meṉ bhí koí áfat tujhe chhúne na páegí.
20Kál meṉ wuh tujh ko maut se bacháegá,
Aur laṛáí meṉ talwár kí dhár se.
21Tú zabán ke koṛe se mahfúz rakkhá jáegá,
Aur jab halákat áegí to tujhe ḍar nahíṉ lagegá.
22Tú halákat aur ḳhushksálí par haṉsegá;
Aur zamín ke darandoṉ se tujhe kuchh ḳhauf na hogá.
23Maidán ke pattharoṉ ke sáth terá eká hogá;
Aur janglí darande tujh se mel rakkheṉge.
24Aur tú jánegá ki terá ḍerá mahfúz hai;
Aur tú apne maskan meṉ jáegá, aur koí chíz g̣áib na páegá.
25Tujhe yih bhí ma‘lúm hogá, ki terí nasl baṛí,
Aur terí aulád zamín kí ghás kí mánind baromand hogí.
26Tú púrí ‘umr meṉ apní qabr meṉ jáegá,
Jaise anáj ke púle apne waqt par jama‘ kiye játe haiṉ.
27Dekh, ham ne is ki tahqíq kí, aur yih bát yúṉ hí hai;
Ise sun le, aur apne fáide ke liye use yád rakh.
Currently Selected:
Aiyúb 5: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
