Aiyúb 4
4
1Tab Temání Ilífaz kahne lagá:
2Agar koí tujh se bátchít karne kí koshish kare, to kyá tú ranjída hogá?
Par bole bag̣air kaun rah saktá hai?
3Dekh, tú ne bahutoṉ ko sikháyá,
Aur kamzor háthoṉ ko mazbút kiyá.
4Terí bátoṉ ne girte húe ko sambhálá,
Aur tú ne laṛkhaṛáte ghuṭnoṉ ko páedár kiyá,
5Par ab to tujh hí par á paṛí, aur tú bedil húá játá hai;
Us ne tujhe chhúá, aur tú ghabrá uṭhá.
6Kyá terí ḳhudátarsí hí terá bharosá nahíṉ?
Kyá terí ráhoṉ kí rástí terí ummed nahíṉ?
7Kyá tujhe yád hai ki kabhí koí ma‘súm bhí halák húá hai?
Yá kahíṉ rástbáz bhí káṭ ḍále gaye?
8Mere dekhne meṉ to jo gunáh ko jotte,
Aur dukh bote haiṉ, wuhí us ko káṭte haiṉ.
9Wuh Ḳhudá ke dam se halák hote,
Aur us ke g̣azab ke jhoke se bhasam hote haiṉ.
10Babar kí garaj aur ḳhúnḳhwár babar kí dháṛ,
Aur babar ke bachchoṉ ke dáṉt, yih sab toṛe játe haiṉ.
11Shikár na páne se buḍḍhá babar halák hotá,
Aur sherní ke bachche tittar bittar ho játe haiṉ.
12Ek bát chupke se mere pás pahuṉcháí gayí,
Us kí bhanak mere kán meṉ paṛí.
13Rát kí royatoṉ ke ḳhayáloṉ ke darmiyán,
Jab logoṉ ko gahrí níṉd átí hai,
14Mujhe ḳhauf aur kapkapí ne aisá pakṛá,
Ki merí sab haḍḍiyoṉ ko hilá ḍálá.
15Tab ek rúh mere sámne se guzrí,
Aur mere rúṉgte khaṛe ho gaye.
16Wuh chupcháp khaṛí ho gayí, par maiṉ us kí shakl pahchán na saká.
Ek súrat merí áṉkhoṉ ke sámne thí,
Aur sannáṭá thá, phir maiṉ ne ek áwáz suní, ki
17Kyá fání insán Ḳhudá se ziyáda ‘ádil hogá?
Kyá ádmí apne ḳháliq se ziyáda pák ṭhahregá?
18Dekh, use apne ḳhádimoṉ ká i‘tibár nahíṉ,
Aur wuh apne firishtoṉ par hamáqat ko ‘áid kartá hai.
19Phir bhalá un kí kyá haqíqat hai, jo miṭṭí ke makánoṉ meṉ rahte haiṉ
Jin ki bunyád ḳhák meṉ hai,
Aur jo patange se bhí jald pis játe haiṉ.
20Wuh subh se shám tak halák hote haiṉ;
Wuh hamesha ke liye faná ho játe haiṉ, aur koí un ká ḳhayál bhí nahíṉ kartá.
21Kyá un ke ḍere kí ḍorí un ke andar hí andar toṛí nahíṉ játí?
Wuh marte haiṉ, aur yih bhí bag̣air dánáí ke.
Currently Selected:
Aiyúb 4: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
