Aiyúb 42
42
1Tab Aiyúb ne Ḳhudáwand ko yúṉ jawáb diyá:
2Maiṉ jántá huṉ, ki tú sab kuchh kar saktá hai,
Aur terá koí iráda ruk nahíṉ saktá.
3Yih kaun hai jo nádání se maslahat par parda ḍáltá hai?
Lekin maiṉ ne jo na samjhá wuhí kahá,
Ya‘ní aisí báteṉ jo mere liye niháyat ‘ajíb thíṉ, jin ko maiṉ jántá na thá.
4Maiṉ terí minnat kartá húṉ, sun, maiṉ kuchh kahúṉgá,
Maiṉ tujh se suwál karúṉgá, tú mujhe batá.
5Maiṉ ne terí ḳhabar kán se suní thí,
Par ab merí áṉkh tujhe dekhtí hai.
6Is liye mujhe apne áp se nafrat hai,
Aur maiṉ ḳhák aur rákh meṉ tauba kartá húṉ.
7Aur aisá húá ki jab Ḳhudáwand yih báteṉ Aiyúb se kah chuká, to us ne Ilífaz Temání se kahá, ki Merá g̣azab tujh par aur tere donoṉ dostoṉ par bhaṛká hai, kyúṉki tum ne merí bábat wuh bát na kahí jo haqq hai, jaise mere bande Aiyúb ne kahí. 8Pas ab apne liye sát bail aur sát meṉḍhe lekar mere bande Aiyúb ke pas jáo, aur apne liye soḳhtaní qurbání guzráno, aur merá banda Aiyúb tumháre liye du‘á karegá, kyúṉki use to maiṉ qubúl karúṉgá; táki tumhárí jahálat ke mutábiq tumháre sáth sulúk na karúṉ; kyúṉki tum ne merí bábat wuh bát na kahí jo haqq hai, jaise mere bande Aiyúb ne kahí. 9So Ilífaz Temání aur Bildad Súḳhí aur Súfar Na‘mátí ne jákar jaisá Ḳhudáwand ne un ko farmáyá thá kiyá, aur Ḳhudáwand ne Aiyúb ko qubúl kiyá. 10Aur Ḳhudáwand ne Aiyúb kí asírí ko, jab us ne apne dostoṉ ke liye du‘á kí, badal diyá: aur Ḳhudáwand ne Aiyúb ko jitná us ke pás pahle thá, us ká do chand diyá. 11Tab us ke sab bháí aur sab bahineṉ aur us ke sab agle jánpahchán us ke pás áe, aur us ke ghar meṉ us ke sáth kháná kháyá, aur us par nauha kiyá aur un sab baláoṉ ke báre meṉ, jo Ḳhudáwand ne us par názil kí thíṉ, use tasallí dí: har shaḳhs ne use ek sikka bhí diyá, aur har ek ne sone kí ek bálí. 12Yúṉ Ḳhudáwand ne Aiyúb ke áḳhirí aiyám meṉ ibtidá kí nisbat ziyáda barakat baḳhshí; aur us ke pás chaudah hazár bheṛ bakriyáṉ aur chha hazár úṉṭ, aur hazár joṛí bail, aur hazár gadhiyáṉ ho gayíṉ. 13Us ke sát beṭe aur tín beṭiyáṉ bhí húíṉ. 14Aur us ne pahlí ká nám Yamíma, aur dúsrí ká nám Qasiyáh, aur tísrí ká nám Qaranhappúk rakkhá. 15Aur us sárí sarzamín meṉ aisí ‘aurateṉ kahíṉ na thíṉ, jo Aiyúb kí beṭiyoṉ kí tarah ḳhúbsúrat hoṉ, aur un ke báp ne un ko un ke bháiyoṉ ke darmiyán mírás dí. 16Aur is ke ba‘d Aiyúb ek sau chálís baras jítá rahá, aur apne beṭe aur pote chauthí pusht tak dekhe. 17Aur Aiyúb ne buḍḍhá aur ‘umrrasída hokar wafát páí.
Currently Selected:
Aiyúb 42: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
