Aiyúb 41
41
1Kyá tú magar ko shist se báhar nikál saktá hai?
Yá rassí se us kí zabán ko dabá saktá hai?
2Kyá tú us kí nák meṉ rassí ḍál saktá hai?
Yá us ká jabṛá meḳh se chhed saktá hai?
3Kyá wuh terí bahut minnat samájat karegá?
Yá tujh se míṭhí míṭhí báteṉ kahegá?
4Kyá wuh tere sáth ‘ahd báṉdhegá,
Ki tú use hamesha ke liye naukar baná le?
5Kyá tú us se aise khelegá jaise parande se?
Yá kyá tú use apní laṛkiyoṉ ke liye báṉdh degá?
6Kyá log us kí tajárat kareṉge?
Kyá wuh use saudágaroṉ meṉ taqsím kareṉge?
7Kyá tú us kí khál ko bháloṉ se,
Yá us ke sir ko máhígír ke tarsúloṉ se bhar saktá hai?
8Tú apná háth us par dhare,
To laṛáí ko yád rakkhegá, aur phir aisá na karegá.
9Dekh, us ke báre meṉ ummed befáida hai.
Kyá koí use dekhte hí gir na paṛegá?
10Koí aisá tundḳho nahíṉ jo use chheṛne kí jur‘at kare.
Phir wuh kaun hai jo mere sámne khaṛá ho sake?
11Kis ne mujhe pahle kuchh diyá hai, ki maiṉ use adá karúṉ?
Jo kuchh sáre ásmán ke níche hai, wuh merá hai.
12Na maiṉ us ke a‘zá ke báre meṉ ḳhámosh rahúṉgá,
Na us kí baṛí táqat aur ḳhúbsúrat ḍílḍaul ke báre meṉ.
13Us ke úpar ká libás kaun utár saktá hai?
Us ke jabṛoṉ ke bích kaun áegá?
14Us ke muṉh ke kiwáṛoṉ ko kaun khol saktá hai?
Us ke dáṉtoṉ ká dáira dahshatnák hai.
15Us kí ḍháleṉ us ká faḳhr haiṉ,
Jo goyá saḳht muhr se paiwasta kí gayí haiṉ.
16Wuh ek dúsrí se aisí juṭí húí haiṉ,
Ki un ke darmiyán hawá bhí nahíṉ á saktí.
17Wuh ek dúsrí se báham paiwasta haiṉ,
Wuh ápas meṉ aisí saṭí haiṉ ki judá nahíṉ ho saktíṉ.
18Us kí chhíṉkeṉ núrafshání kartí haiṉ,
Us kí áṉkheṉ subh ke papúṭoṉ kí tarah haiṉ.
19Us ke muṉh se jaltí mash‘aleṉ nikaltí haiṉ,
Aur ág kí chingáriyáṉ uṛtí haiṉ.
20Us ke nathnoṉ se dhuwáṉ nikaltá hai,
Goyá khaultí deg aur sulagtí sarkanḍe se.
21Us ká sáṉs koeloṉ ko dahká detá hai,
Aur us ke muṉh se shu‘le nikalte haiṉ.
22Táqat us kí gardan meṉ bastí hai,
Aur dahshat us ke áge áge chaltí hai.
23Us ke gosht kí taheṉ ápas meṉ juṛí húí haiṉ,
Wuh us par ḳhúb saṭí haiṉ, aur haṭ nahíṉ saktíṉ.
24Us ká dil patthar kí tarah mazbút hai,
Balki chakkí ke nichle páṭ kí tarah.
25Jab wuh uṭh khaṛá hotá hai, to zabardast log ḍar játe haiṉ,
Aur ghabrákar hawásbáḳhta ho játe haiṉ.
26Agar koí us par talwár chaláe, to us se kuchh nahíṉ bantá,
Na bhále, na tír, na barchhí se.
27Wuh lohe ko bhúsá samajhtá hai,
Aur pítal ko galí húí lakṛí.
28Tír use bhagá nahíṉ saktá:
Faláḳhun ke patthar us par tinke se haiṉ.
29Láṭhiyáṉ goyá tinke haiṉ:
Wuh barchhí ke chalne par haṉstá hai.
30Us ke níche ke hisse tez ṭhíkroṉ kí mánind haiṉ,
Wuh kíchaṛ par goyá heṉgá phertá hai.
31Wuh gahráo ko deg kí tarah khaulátá hai:
Aur samundar ko marham kí mánind baná detá hai.
32Wuh apne píchhe chamkílí lík chhoṛtá játá hai,
Gahráo goyá safed nazar áne lagtá hai.
33Zamín par us ká nazír nahíṉ,
Jo aisá beḳhauf paidá húá ho.
34Wuh har úṉchí chíz ko dekhtá hai,
Aur sab mag̣rúroṉ ká bádsháh hai.
Currently Selected:
Aiyúb 41: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
