Aiyúb 40
40
1 Ḳhudáwand ne Aiyúb se yih bhí kahá:
2Kyá jo fuzúl hujjat kartá hai, wuh Qádir i mutlaq se jhagṛá kare?
Jo Ḳhudá se bahs kartá hai, wuh is ká jawáb de.
3Tab Aiyúb ne Ḳhudáwand ko jawáb diyá:
4Dekh, maiṉ náchíz húṉ, maiṉ tujhe kyá jawáb dúṉ?
Maiṉ apná háth apne muṉh par rakhtá húṉ.
5Ab jawáb na dúṉgá; ek bár maiṉ bol chuká,
Balki do bár, par ab áge na baṛhúṉgá.
6Tab Ḳhudáwand ne Aiyúb ko bagole meṉ se jawáb diyá:
7Mard kí mánind ab apní kamar kas le,
Maiṉ tujh se suwál kartá húṉ, aur tú mujhe batá.
8Kyá tú mere insáf ko bhí bátil ṭhahráegá?
Kyá tú mujhe mujrim ṭhahráegá, táki ḳhud rást ṭhahre?
9Yá kyá terá bázú Ḳhudá ká sá hai?
Aur kyá tú us kí sí áwáz se garaj saktá hai?
10Ab apne ko shán o shaukat se árásta kar,
Aur ‘izzat o jalál se mulabbas ho já.
11Apne qahr ke sailáboṉ ko bahá de,
Aur har mag̣rúr ko dekh aur zalíl kar.
12Har mag̣rúr ko dekh aur use níchá kar,
Aur sharíroṉ ko jaháṉ khaṛe hoṉ, pámál kar de.
13Un ko ikaṭṭhá miṭṭí meṉ chhipá de,
Aur us poshída maqám meṉ un ke muṉh báṉdh de.
14Tab maiṉ bhí tere báre meṉ mán lúṉgá,
Ki terá hí dahiná háth tujhe bachá saktá hai.
15Ab hipopoṭímas ko dekh, jise maiṉ ne tere sáth banáyá,
Wuh bail kí tarah ghás khátá hai.
16Dekh, us kí táqat us kí kamar meṉ hai,
Aur us ká zor us ke peṭ ke paṭṭhoṉ meṉ.
17Wuh apní dum ko deodár kí tarah hilátá hai,
Us kí ránoṉ kí naseṉ báham paiwasta haiṉ.
18Us kí haḍḍiyáṉ pítal ke naloṉ kí tarah haiṉ,
Us ke a‘zá lohe ke beṉḍoṉ kí mánind haiṉ.
19Wuh Ḳhudá kí ḳháss san‘at hai;
Us ke ḳháliq hí ne use talwár baḳhshí hai.
20Yaqínan ṭíle us ke liye ḳhurák báham pahuṉcháte haiṉ,
Jaháṉ maidán ke sab jánwar khelte kúdte haiṉ.
21Wuh kaṉwal ke daraḳht ke níche leṭtá hai,
Sarkanḍoṉ kí áṛ aur daldal meṉ.
22Kaṉwal ke daraḳht use apne sáye ke níche chhipá lete haiṉ,
Nále kí bedeṉ use gher letí haiṉ.
23Dekh, agar daryá meṉ báṛh ho, to wuh nahíṉ káṉptá;
Ḳhwáh Yardan us ke muṉh tak chaṛh áe, wuh beḳhauf hai.
24Jab wuh chaukas ho, to kyá koí use pakaṛ legá,
Yá phandá lagákar us kí nák ko chhedegá?
Currently Selected:
Aiyúb 40: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
