Aiyúb 36
36
1Phir Ilíhú ne yih bhí kahá:
2Mujhe zará ijázat de, aur maiṉ tujhe batáúṉgá,
Kyúṉki Ḳhudá kí taraf se mujhe kuchh âur bhí kahná hai.
3Maiṉ apne ‘ilm ko dúr se láúṉgá,
Aur rástí apne ḳháliq se mansúb karúṉgá.
4Kyúṉki fi‘lhaqíqat merí báteṉ jhúṭhí nahíṉ haiṉ,
Wuh jo tere sáth hai ‘ilm meṉ kámil hai.
5Dekh, Ḳhudá qádir hai, aur kisí ko haqír nahíṉ jántá,
Wuh fahm kí quwwat meṉ g̣álib hai.
6Wuh sharíroṉ kí zindagí ko barqarár nahíṉ rakhtá,
Balki musíbatzadoṉ ko un ká haqq ‘atá kartá hai.
7Wuh sádiqoṉ kí taraf se apní áṉkheṉ nahíṉ phertá,
Balki unheṉ bádsháhoṉ ke sáth hamesha ke liye taḳht par biṭhátá hai,
Aur wuh sarfaráz hote haiṉ.
8Aur agar wuh beṛiyoṉ se jakṛe jáeṉ,
Aur musíbat kí rassiyoṉ se bandheṉ,
9To wuh unheṉ un ká ‘amal aur un kí taqsíreṉ dikhátá hai,
Ki unhoṉ ne ghamanḍ kiyá.
10Wuh un ke kán ko ta‘lím ke liye kholtá hai,
Aur hukm detá hai, ki wuh badí se báz áeṉ.
11Agar wuh sun leṉ, aur us kí ‘ibádat kareṉ,
To apne din iqbálmandí meṉ,
Aur apne baras ḳhushhálí meṉ basar kareṉge.
12Par agar na suneṉ, to wuh talwár se halák hoṉge,
Aur jahálat meṉ mareṉge.
13Lekin wuh jo dil meṉ bedín haiṉ, g̣azab ko rakh chhoṛte haiṉ;
Jab wuh unheṉ báṉdhtá hai, to wuh madad ke liye duháí nahíṉ dete.
14Wuh jawání meṉ marte haiṉ,
Aur un kí zindagí lútíoṉ ke darmiyán barbád hotí hai.
15Wuh musíbatzada ko us kí musíbat se chhuṛátá hai,
Aur zulm meṉ un ke kán kholtá hai.
16Balki wuh tujhe bhí dukh se chhuṭkárá dekar
Aisí wasí‘ jagah meṉ jaháṉ tangí nahíṉ hai, pahuṉchá detá,
Aur jo kuchh tere dastarḳhwán par chuná játá hai, wuh chiknáí se pur hotá.
17Par tú to sharíroṉ ke muqaddame kí táíd kartá hai,
Is liye ‘adl aur insáf tujh par qábiz haiṉ.
18Ḳhabardár, terá qahr tujh se takfír na karáe,
Aur fidya kí firáwání tujhe gumráh na kare.
19Kyá terá roná yá terí quwwat o tawánáí
Is bát ke liye káfí haiṉ, ki tú dukh meṉ na paṛe?
20Us rát kí ḳhwáhish na kar,
Jis meṉ qaumeṉ apne maskanoṉ se uṭháí játí haiṉ.
21Hoshyár rah: badí kí taraf rág̣ib na ho,
Kyúṉki tú ne musíbat ko nahíṉ balki isí ko chuná hai.
22Dekh, Ḳhudá apní qudrat se baṛe baṛe kám kartá hai,
Kaun sá ustád us kí mánind hai?
23Kis ne use us ká rásta batáyá?
Yá kaun kah saktá hai, ki Tú ne nárástí kí hai?
24Us ke kám kí baṛáí karná yád rakh,
Jis kí ta‘ríf log gáte rahe haiṉ.
25Sab logoṉ ne is ko dekhá hai,
Insán use dúr se dekhtá hai.
26Dekh, Ḳhudá buzurg hai, aur ham use nahíṉ jánte,
Us ke barasoṉ ká shumár daryáft se báhar hai.
27Kyúṉki wuh pání ke qatroṉ ko úpar kheṉchtá hai,
Jo usí ke abḳhirát se meṉh kí súrat meṉ ṭapakte haiṉ,
28Jin ko aflák uṉḍelte
Aur insán par kasrat se barsáte haiṉ.
29Balki kyá koí bádaloṉ ke phailáo,
Aur us ke shámiyáne kí garajoṉ ko samajh saktá hai?
30Dekh, wuh apne núr ko apne chaugird phailátá hai,
Aur samundar kí tah ko ḍháṉktá hai.
31Kyúṉki in hí se wuh qaumoṉ ká insáf kartá hai,
Aur ḳhurák ifrát se ‘atá farmátá hai.
32Wuh bijlí ko apne háthoṉ meṉ lekar
Use hukm detá hai, ki dushman par gire.
33Is kí kaṛak usí kí ḳhabar detí hai,
Chaupáye bhí túfán kí ámad batáte haiṉ.
Currently Selected:
Aiyúb 36: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
