Aiyúb 37
37
1Is bát se bhí merá dil káṉptá hai,
Aur apní jagah se uchhal paṛtá hai.
2Zará us ke bolne kí áwáz ko suno,
Aur us zamzame ko jo us ke muṉh se nikaltá hai.
3Wuh use sáre ásmán ke níche,
Aur apní bijlí ko zamín kí intihá tak bhejtá hai.
4Is ke ba‘d ra‘d kí áwáz átí hai;
Wuh apne jalál kí áwáz se garajtá hai,
Aur jab us kí áwáz sunáí detí hai, to wuh ise roktá hai.
5Ḳhudá ‘ajíb taur par apní áwáz se garajtá hai,
Wuh baṛe baṛe kám kartá hai, jin ko ham samajh nahíṉ sakte.
6Kyúṉki wuh barf ko farmátá hai, ki Tú zamín par gir.
Isí tarah wuh bárish se
Aur músládhár meṉh se kahtá hai.
7Wuh har ádmí ke háth par muhr kar detá hai,
Táki sab log jin ko us ne banáyá hai is bát ko ján leṉ.
8Tab darande g̣ároṉ meṉ ghus játe,
Aur apní apní mánd meṉ paṛe rahte haiṉ.
9Áṉdhí junúb kí koṭhrí se,
Aur sardí shimál se átí hai.
10Ḳhudá ke dam se barf jam játí hai,
Aur pání ká phailáo tang ho játá hai.
11Balki wuh ghaṭá par namí ko ládtá hai,
Aur apne bijlíwále bádaloṉ ko dúr tak phailátá hai.
12Usí kí hidáyat se wuh idhar udhar phiráe játe haiṉ,
Táki jo kuchh wuh unheṉ farmáe,
Usí ko wuh dunyá ke ábád hisse par anjám deṉ.
13Ḳhwáh tambíh ke liye, yá apne mulk ke liye,
Yá rahmat ke liye wuh use bheje.
14Ai Aiyúb, is ko sun le;
Chupcháp khaṛá rah, aur Ḳhudá ke hairatangez kámoṉ par g̣aur kar.
15Kyá tujhe ma‘lúm hai, ki Ḳhudá kyúṉkar unheṉ tákíd kartá hai,
Aur apne bádal kí bijlí ko chamkátá hai?
16Kyá tú bádaloṉ ke muwázane se wáqif hai?
Yih usí ke hairatangez kám haiṉ, jo ‘ilm meṉ kámil hai.
17Jab zamín par junúbí hawá kí wajh se sannáṭá hotá hai,
To tere kapṛe kyúṉ garm ho játe haiṉ?
18Kyá tú us ke sáth falak ko phailá saktá hai,
Jo ḍhale húe áíne kí tarah mazbút hai?
19Ham ko sikhá, ki ham us se kyá kaheṉ,
Kyúṉki andhere ke sabab se ham apní taqrír ko durust nahíṉ kar sakte.
20Kyá us ko batáyá jáe, ki maiṉ bolná cháhtá húṉ?
Yá kyá koí ádmí yih ḳhwáhish kare ki wuh nigal liyá jáe?
21Abhí to ádmí us núr ko nahíṉ dekhte, jo aflák par raushan hai;
Lekin hawá chaltí hai aur unheṉ sáf kar detí hai.
22Shimál se sunahrí raushní átí hai;
Ḳhudá muhíb shaukat se mulabbas hai.
23Ham Qádir i mutlaq ko pá nahíṉ sakte; wuh qudrat o ‘adl meṉ shándár hai,
Aur insáf kí firáwání meṉ zulm na karegá.
24Isí liye log us se ḍarte haiṉ,
Wuh dánádiloṉ kí parwá nahíṉ kartá.
Currently Selected:
Aiyúb 37: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
