Aiyúb 34
34
1Is ke ‘aláwa Ilíhú ne yih bhí kahá:
2Ai tum ‘aqlmand logo, merí báteṉ suno;
Aur, ai tum jo ahl i ma‘rifat ho, merí taraf kán lagáo.
3Kyúṉki kán bátoṉ ko parakhtá hai,
Jaise zabán kháne ko chakhtí hai.
4Jo kuchh ṭhík hai, ham apne liye chun leṉ;
Jo bhalá hai, ham ápas meṉ ján leṉ.
5Kyúṉki Aiyúb ne kahá, Maiṉ sádiq húṉ,
Aur Ḳhudá ne merí haqqtalafí kí hai:
6Agarchi maiṉ haqq par húṉ, taubhí jhúṭhá ṭhahrtá húṉ;
Go maiṉ betaqsír húṉ, merá zaḳhm lá‘iláj hai.
7Aiyúb sá bahádur kaun hai,
Jo tamasḳhur ko pání kí tarah pí játá hai?
8Jo badkirdároṉ kí rifáqat meṉ chaltá,
Aur sharír logoṉ ke sáth phirtá hai.
9Kyúṉki us ne kahá hai, ki Ádmí ko kuchh fáida nahíṉ
Ki wuh Ḳhudá meṉ masrúr rahe.
10Is liye, ai ahl i ḳhirad, merí suno:
Yih hargiz ho nahíṉ saktá, ki Ḳhudá sharárat ká kám kare,
Aur Qádir i mutlaq badí kare.
11Wuh insán ko us ke a‘mál ke mutábiq jazá degá,
Aur aisá karegá ki har kisí ko apní hí ráhoṉ ke mutábiq badla milegá.
12Yaqínan Ḳhudá buráí nahíṉ karegá,
Qádir i mutlaq se beinsáfí na hogí.
13Kis ne us ko zamín par iḳhtiyár diyá?
Yá kis ne sárí dunyá ká intizám kiyá hai?
14Agar wuh insán se apná dil lagáe,
Agar wuh apní rúh aur apne dam ko wápas le le,
15To tamám bashar ikaṭṭhe faná ho jáeṉge,
Aur insán phir miṭṭí meṉ mil jáegá.
16So agar tujh meṉ samajh hai, to ise sun le,
Aur merí bátoṉ par tawajjuh kar.
17Kyá wuh jo haqq se ‘adáwat rakhtá hai hukúmat karegá?
Aur kyá tú use jo ‘ádil aur qádir hai mulzim ṭhahráegá?
18Wuh to bádsháh se kahtá hai, Tú razíl hai,
Aur sharífoṉ se, ki Tum sharír ho.
19Wuh umará kí tarafdárí nahíṉ kartá,
Aur amír ko g̣aríb se ziyáda nahíṉ mántá,
Kyúṉki wuh sab usí ke háth kí kárígarí haiṉ.
20Wuh dam bhar meṉ ádhí rát ko mar játe haiṉ;
Log hiláe játe aur guzar játe haiṉ,
Aur zabardast log bag̣air háth lagáe uṭhá liye játe haiṉ.
21Kyúṉki us kí áṉkheṉ ádmí ki ráhoṉ par lagí haiṉ,
Aur wuh us kí sab rawishoṉ ko dekhtá hai.
22Na koí aisí táríkí na maut ká sáya hai
Jaháṉ badkirdár chhip sakeṉ.
23Kyúṉki use zarúr nahíṉ ki ádmí ká ziyáda ḳhayál kare,
Táki wuh Ḳhudá ke huzúr ‘adálat meṉ jáe.
24Wuh bilá taftísh zabardastoṉ ko ṭukṛe ṭukṛe kartá,
Aur un kí jagah auroṉ ko barpá kartá hai.
25Is liye wuh un ke kámoṉ ká ḳhayál rakhtá hai,
Aur wuh unheṉ rát ko ulaṭ detá hai, aisá ki wuh halák ho játe haiṉ.
26Wuh auroṉ ke dekhte húe
Un ko aisá mártá hai, jaisá sharíroṉ ko.
27Is liye ki wuh us kí pairawí se phir gaye,
Aur us kí kisí ráh ká ḳhayál na kiyá.
28Yaháṉ tak ki un ke sabab se g̣aríboṉ kí faryád us ke huzúr pahuṉchí,
Aur us ne musíbatzadoṉ kí faryád suní.
29Jab wuh ráhat baḳhshe, to kaun mulzim ṭhahrá saktá hai?
Jab wuh muṉh chhipá le, to kaun use dekh saktá hai?
Ḳhwáh koí qaum ho yá ádmí, donoṉ ke sáth yaksáṉ sulúk hai.
30Táki bedín ádmí saltanat na kare,
Aur logoṉ ko phande meṉ phaṉsáne ke liye koí na ho.
31Kyúṉki kyá kisí ne Ḳhudá se kahá hai,
Maiṉ ne sazá uṭhá lí hai, maiṉ ab buráí na karúṉgá;
32Jo mujhe dikháí nahíṉ detá, wuh tú mujhe sikhá;
Agar maiṉ ne badí kí hai, to ab aisá nahíṉ karúṉgá?
33Kyá us ká ajr terí marzí par ho, ki tú use námanzúr kartá hai?
Kyúṉki tujhe faisala karná hai, na ki mujhe;
Is liye jo kuchh tú jántá hai, kah de.
34Ahl i ḳhirad mujh se kaheṉge,
Balki har ‘aqlmand jo merí suntá hai kahegá,
35Aiyúb nádání se boltá hai,
Aur us kí báteṉ hikmat se ḳhálí haiṉ.
36Kásh ki Aiyúb áḳhir tak ázmáyá játá,
Kyúṉki wuh sharíroṉ kí tarah jawáb detá hai.
37Is liye ki wuh apne gunáh par bag̣áwat ko baṛhátá hai,
Wuh hamáre darmiyán táliyáṉ bajátá hai,
Aur Ḳhudá ke ḳhiláf bahut báteṉ banátá hai.
Currently Selected:
Aiyúb 34: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
