Aiyúb 33
33
1Taubhí, ai Aiyúb! zará merí taqrír sun le,
Aur merí sárí bátoṉ par kán lagá.
2Dekh, maiṉ ne apná muṉh kholá hai,
Merí zabán ne mere muṉh meṉ suḳhanáráí kí hai.
3Merí báteṉ mere dil kí rástbází ko záhir kareṉgí:
Aur mere lab jo kuchh jánte haiṉ, usí ko sachcháí se kaheṉge.
4Ḳhudá kí rúh ne mujhe banáyá hai,
Aur Qádir i mutlaq ká dam mujhe zindagí baḳhshtá hai.
5Agar tú mujhe jawáb de saktá hai, to de;
Aur apní bátoṉ ko mere sámne tartíb dekar khaṛá ho já.
6Dekh, Ḳhudá ke huzúr maiṉ tere barábar húṉ:
Maiṉ bhí miṭṭí se baná húṉ.
7Dekh, merá ru‘b tujhe hirásán na karegá,
Merá dabáo tujh par bhárí na hogá.
8Yaqínan tú ne mere sunte kahá hai,
Aur maiṉ ne terí báteṉ suní haiṉ,
9Ki Maiṉ sáf aur betaqsír húṉ;
Maiṉ begunáh húṉ, aur mujh meṉ badí nahíṉ:
10Wuh mere ḳhiláf mauqa‘ ḍhúṉḍhtá hai,
Wuh mujhe apná dushman samajhtá hai;
11Wuh mere donoṉ páṉwoṉ ko káṭh meṉ ṭhok detá hai.
Wuh merí sab ráhoṉ kí nigrání kartá hai
12Dekh, maiṉ tujhe jawáb detá húṉ, is bát meṉ tú haqq par nahíṉ;
Kyúṉki Ḳhudá insán se baṛá hai.
13Tú kyúṉ us se jhagaṛtá hai?
Kyúṉki wuh apní bátoṉ meṉ se kisí ká hisáb nahíṉ detá.
14Kyúṉki Ḳhudá ek bár boltá hai,
Balki do bár, ḳhwáh insán is ká ḳhayál na kare.
15Ḳhwáb meṉ, rát kí royá meṉ,
Jab logoṉ ko gahrí níṉd átí hai,
Aur bistar par sote waqt;
16Tab wuh logoṉ ke kán kholtá hai,
Aur un kí ta‘lím par muhr lagátá hai.
17Táki insán ko us ke maqsúd se roke,
Aur g̣urúr ko insán se dúr kare;
18Wuh us kí ján ko gaṛhe se bachátá hai,
Aur us kí zindagí talwár kí már se.
19Wuh apne bistar par dard se tambíh pátá hai,
Aur us kí haḍḍiyoṉ meṉ dáimí jang hai:
20Yaháṉ tak ki us ká jí roṭí se,
Aur us kí ján lazíz kháne se nafrat karne lagtí hai.
21Us ká gosht aisá súkh játá hai, ki dikháí nahíṉ detá;
Aur us kí haḍḍiyáṉ, jo dikháí nahíṉ detí thín, nikal átí haiṉ.
22Balki us kí ján gaṛhe ke qaríb pahuṉchtí hai,
Aur us kí zindagí halák karnewáloṉ ke nazdík.
23Waháṉ agar us ke sáth koí firishta ho,
Yá hazár meṉ ek ta‘bír karnewálá,
Jo insán ko batáe ki us ke liye kyá ṭhík hai;
24To wuh us par rahm kartá, aur kahtá hai,
Ki Use gaṛhe meṉ jáne se bachá le,
Mujhe fidya mil gayá hai.
25Tab us ká jism bachche ke jism se bhí táza hogá;
Aur us kí jawání ke din lauṭ áte haiṉ:
26Wuh Ḳhudá se du‘á kartá hai, aur wuh us par mihrbán hotá hai;
Aisá ki wuh ḳhushí se us ká muṉh dekhtá hai:
Aur wuh insán kí sadáqat ko bahál kar detá hai.
27Wuh logoṉ ke sámne gáne aur kahne lagtá hai,
Ki Maiṉ ne gunáh kiyá aur haqq ko ulaṭ diyá,
Aur is se mujhe fáida na húá:
28Us ne merí ján ko gaṛhe meṉ jáne se bacháyá,
Aur merí zindagí raushní ko dekhegí.
29Dekho, Ḳhudá ádmí ke sáth yih sab kám
Do bár, balki tín bár kartá hai,
30Táki us kí ján ko gaṛhe se lauṭá láe,
Aur wuh zindoṉ ke núr se munawwar ho.
31Ai Aiyúb, tawajjuh se merí sun:
Ḳhámosh rah, aur maiṉ bolúṉgá.
32Agar tujhe kuchh kahná hai, to mujhe jawáb de:
Bol, kyúṉki maiṉ tujhe rást ṭhahráná cháhtá húṉ.
33Agar nahíṉ, to tú merí sun:
Ḳhámosh rah, aur maiṉ tujhe dánáí sikháúṉgá.
Currently Selected:
Aiyúb 33: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
