Aiyúb 32
32
1So un tínoṉ ádmíoṉ ne Aiyúb ko jawáb dená chhoṛ diyá, is liye ki wuh apní nazar meṉ sádiq thá. 2Tab Ilíhú bin Barákel Bozí ká, jo Rám ke ḳhándán se thá, qahr bhaṛká. Us ká qahr Aiyúb par bhaṛká, is liye ki us ne Ḳhudá ko nahíṉ, balki apne áp ko rást ṭhahráyá. 3Aur us ke tínoṉ dostoṉ par bhí us ká qahr bhaṛká, is liye ki unheṉ jawáb to sújhá nahíṉ, taubhí unhoṉ ne Aiyúb ko mujrim ṭhahráyá. 4Aur Ilíhú Aiyúb se bát karne se is liye ruká rahá, ki wuh us se baṛe the. 5Jab Ilíhú ne dekhá ki un tínoṉ ke muṉh meṉ jawáb na rahá, to us ká qahr bhaṛak uṭhá.
6Aur Barákel Bozí ká beṭá Ilíhú kahne lagá,
Maiṉ jawán húṉ, aur tum bahut ‘umrrasída ho;
Is liye maiṉ ruká rahá, aur apní ráe dene kí jur’at na kí.
7Maiṉ ne kahá, Sálḳhurda log boleṉ,
Aur ‘umrrasída hikmat sikháeṉ.
8Lekin insán meṉ rúh hai,
Aur Qádir i mutlaq ká dam ḳhirad baḳhshtá hai.
9Baṛe ádmí hí ‘aqlmand nahíṉ hote,
Aur ‘umrrasída hí insáf ko nahíṉ samajhte.
10Is liye maiṉ kahtá húṉ, Merí suno;
Maiṉ bhí apní ráe dúṉgá.
11Dekho, maiṉ tumhárí bátoṉ ke liye ruká rahá,
Jab tum alfáz kí talásh meṉ the.
Maiṉ tumhárí dalíloṉ ká muntazir rahá.
12Balki maiṉ tumhárí taraf tawajjuh kartá rahá,
Aur dekho, tum meṉ koí na thá jo Aiyúb ko qáil kartá,
Yá us kí bátoṉ ká jawáb detá.
13Ḳhabardár, yih na kahná, ki Ham ne hikmat ko pá liyá hai;
Ḳhudá hí use lájawáb kar saktá hai, na ki insán:
14Kyúṉki na us ne mujhe apní bátoṉ ká nishána banáyá,
Na maiṉ tumhárí sí taqríroṉ se use jawáb dúṉgá.
15Wuh hairán haiṉ, wuh ab jawáb nahíṉ dete:
Un ke pás kahne ko koí bát na rahí.
16Aur kyá maiṉ ruká rahúṉ, is liye ki wuh bolte nahíṉ,
Is liye ki wuh chupcháp khaṛe haiṉ aur ab jawáb nahíṉ dete?
17Maiṉ bhí apní bát kahúṉgá,
Maiṉ bhí apní ráe dúṉgá.
18Kyúṉki maiṉ bátoṉ se bhará húṉ;
Aur jo rúh mere andar hai, wuh mujhe majbúr kartí hai.
19Dekho, merá peṭ benikás sharáb kí mánind hai;
Wuh nayí mashkoṉ kí tarah pháṭne hí ko hai.
20Maiṉ bolúṉgá, táki mujhe taskín ho;
Maiṉ apne laboṉ ko kholúṉgá aur jawáb dúṉgá.
21Na maiṉ kisí ádmí kí tarafdárí karúṉgá,
Na maiṉ kisí shaḳhs ko ḳhushámad ke ḳhitáb dúṉgá.
22Kyúṉki mujhe ḳhushámad ke ḳhitáb dene nahíṉ áte,
Warna merá banánewálá mujhe jald uṭhá letá.
Currently Selected:
Aiyúb 32: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
