Aiyúb 31
31
1Maiṉ ne apní áṉkhoṉ se ‘ahd kiyá hai,
Phir maiṉ kisí kuṉwárí par kyúṉkar nazar karúṉ?
2Kyúṉki úpar se Ḳhudá kí taraf se kyá baḳhra hai,
Aur ‘álam i bálá se Qádir i mutlaq kí taraf se kyá mírás hai?
3Kyá wuh nárástoṉ ke liye áfat,
Aur badkirdároṉ ke liye tabáhí nahíṉ hai?
4Kyá wuh merí ráhoṉ ko nahíṉ dekhtá,
Aur mere sab qadamoṉ ko nahíṉ gintá?
5Agar maiṉ batálat se chalá húṉ,
Aur mere páṉwoṉ ne dagá ke liye jaldí kí hai;
6(To maiṉ ṭhík tarázú meṉ tolá jáúṉ,
Táki Ḳhudá merí rástí ko ján le;)
7Agar merá qadam ráste se bargashta húá hai,
Aur mere dil ne merí áṉkhoṉ kí pairawí kí hai,
Aur agar mere háthoṉ par dág̣ lagá hai:
8To maiṉ boúṉ, aur dúsrá kháe;
Aur mere khet kí paidáwár ukháṛ dí jáe.
9Agar merá dil kisí ‘aurat par farefta húá,
Aur maiṉ apne paṛausí ke darwáze par ghát meṉ baiṭhá:
10To merí bíwí dúsre ke liye píse,
Aur g̣air mard us par jhukeṉ.
11Kyúṉki yih niháyat burá jurm hotá;
Balki aisí badí hotí, jis kí sazá qází dete haiṉ:
12Kyúṉki wuh aisí ág hai, jo jalákar bhasam kar detí hai,
Aur mere sáre hásil ko jaṛ se nest kar ḍáltí hai.
13Agar maiṉ ne apne ḳhádim yá apní ḳhádima ká haqq márá ho,
Jab unhoṉ ne mujh se jhagṛá kiyá,
14To jab Ḳhudá uṭhegá, tab maiṉ kyá karúṉgá?
Aur jab wuh áegá to maiṉ use kyá jawáb dúṉgá?
15Kyá wuhí us ká banánewálá nahíṉ jis ne mujhe batn meṉ banáyá?
Aur kyá ek hí ne hamárí súrat rihm meṉ nahíṉ banáí?
16Agar maiṉ ne muhtáj se us kí murád rok rakkhí,
Yá aisá kiyá ki bewa kí áṉkheṉ rah gayín;
17Yá apná nawála akele hí kháyá ho,
Aur yatím us meṉ se kháne na páyá;
18(Nahíṉ, balki mere laṛakpan se wuh mere sáth aise palá jaise báp ke sáth,
Aur maiṉ apní máṉ ke batn hí se bewa ká rahnumá rahá húṉ;)
19Agar maiṉ ne dekhá ki koí bekapṛe martá hai,
Yá kisí muhtáj ke pás oṛhne ko nahíṉ;
20Agar us kí kamar ne mujh ko du‘á na dí ho,
Aur agar wuh merí bheṛoṉ kí ún se garm na húá ho;
21Agar maiṉ ne kisí yatím par háth uṭháyá ho,
Kyúṉki pháṭak par mujhe apní kumak dikháí dí:
22To merá kandhá mere sháne se utar jáe,
Aur mere bázú kí haḍḍí ṭúṭ jáe.
23Kyúṉki Ḳhudá kí taraf se áfat ká ḳhauf thá,
Aur us kí buzurgí kí wajh se maiṉ kuchh na kar saká.
24Agar maiṉ ne sone par bharosá kiyá ho,
Aur chokhe sone se kahá, Merá i‘tibár tujh par hai;
25Agar maiṉ is liye ki merí daulat firáwán thí,
Aur mere háth ne bahut kuchh hásil kar liyá thá, názán húá;
26Agar maiṉ ne súraj par, jab wuh chamaktá hai, nazar kí ho,
Yá chánd par jab wuh áb o táb meṉ chaltá hai;
27Aur merá dil ḳhufyatan farefta ho gayá ho,
Aur mere muṉh ne mere háth ko chúm liyá ho:
28To yih bhí aisí badí hai, jis kí sazá qází dete haiṉ:
Kyúṉki yúṉ maiṉ ne Ḳhudá ká jo ‘álam i bálá par hai inkár kiyá hotá.
29Agar maiṉ apne nafrat karnewále kí halákat se ḳhush húá,
Yá jab us par áfat áí to shádmán húá;
30(Háṉ, maiṉ ne to apne muṉh ko itná gunáh bhí na karne diyá,
Ki la‘nat bhejkar us kí maut ke liye du‘á kartá;)
31Agar mere ḳhaime ke logoṉ ne yih na kahá ho,
Aisá kaun hai jo us ke háṉ gosht se ser na húá?
32Pardesí ko galí kúchoṉ meṉ ṭikná na paṛá;
Balki maiṉ musáfir ke liye apne darwáze khol detá thá;
33Agar Ádam kí tarah apní badí apne síne meṉ chhipákar
Maiṉ ne apní taqsíroṉ par parda ḍálá ho;
34Is sabab se ki mujhe ‘awámmu’n nás ká ḳhauf thá,
Aur maiṉ ḳhándánoṉ kí hiqárat se ḍar gayá,
Yaháṉ tak maiṉ ḳhámosh ho gayá aur darwáze se báhar na niklá—
35Kásh ki koí merí sunnewálá hotá!
(Yih lo, merá dastḳhatt, Qádir i mutlaq mujhe jawáb de:)
Kásh ki mere muḳhálif ke da‘we kí tahrír hotí!
36Yaqínan maiṉ use apne kandhe par liye phirtá;
Aur use apne liye ‘amáme kí tarah báṉdh letá.
37Maiṉ use apne qadamoṉ kí ta‘dád batátá;
Amír kí tarah maiṉ us ke pás játá.
38Agar merí zamín mere ḳhiláf duháí detí ho,
Aur us kí regháriyáṉ milkar rotí hoṉ;
39Agar maiṉ ne bedám us ke phal kháe hoṉ,
Yá aisá kiyá ki us ke málikoṉ kí ján gayí:
40To gehúṉ ke badle úṉṭkaṭáre,
Aur jau ke badle kaṛwe dáne ugeṉ!
Aiyúb kí báteṉ tamám húíṉ.
Currently Selected:
Aiyúb 31: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
