Aiyúb 30
30
1Par ab to wuh jo mujh se kam‘umr haiṉ, merá tamasḳhur karte haiṉ,
Jin ke bápdádá ko apne galle ke kuttoṉ ke sáth rakhná bhí mujhe nágawár thá.
2Balki un ke háthoṉ kí quwwat mujhe kis bát ká fáida pahuṉcháegí?
Wuh aise ádmí haiṉ jin kí jawání ká zor záil ho gayá.
3Wuh iflás aur qaht ke máre duble ho gaye haiṉ;
Wuh wírání aur sunsání kí táríkí meṉ ḳhák cháṭte haiṉ.
4Wuh jháṛiyoṉ ke pás loniye ká ság toṛte haiṉ;
Aur jháú kí jaṛeṉ un kí ḳhurák hai.
5Wuh logoṉ ke darmiyán ragede gaye haiṉ;
Log un ke píchhe aise chilláte haiṉ jaise chor ke píchhe.
6Un ko wádíoṉ ke shigáfoṉ meṉ,
Aur g̣ároṉ aur zamín ke bhaṭṭoṉ meṉ rahná paṛtá hai.
7Wuh jháṛiyoṉ ke darmiyán raiṉkte;
Aur jhankáṛoṉ ke níche ikaṭṭhe paṛe rahte haiṉ.
8Wuh ahmaqoṉ, balki kamínoṉ kí aulád haiṉ;
Wuh mulk se már márkar nikále gaye the.
9Aur ab maiṉ un ká gít baná húṉ,
Balki un ke liye zarbu’l masal húṉ.
10Wuh mujh se ghin kháte, wuh mujh se dúr khaṛe hote,
Aur mere muṉh par thúkne se báz nahíṉ rahte haiṉ.
11Kyúṉki Ḳhudá ne merá challa ḍhílá kar diyá, aur mujh par áfat bhejí,
Is liye wuh mere sámne belagám ho gaye haiṉ.
12Mere dahine háth par logoṉ ká hujúm uṭhtá hai;
Wuh mere páṉwoṉ ko ek taraf sarká dete haiṉ,
Aur mere ḳhiláf apní muhlik ráheṉ nikálte haiṉ.
13Aise log bhí jin ká koí madadgár nahíṉ
Mere ráste ko bigáṛte,
Aur merí musíbat ko baṛháte haiṉ.
14Wuh goyá baṛe raḳhne meṉ se hokar áte haiṉ,
Aur tabáhí meṉ mujh par ṭúṭ paṛte haiṉ.
15Dahshat mujh par tárí ho gayí,
Wuh hawá kí tarah merí ábrú ko uṛátí hai;
Merí ‘áfíyat bádal kí tarah játí rahí.
16Ab to merí ján mere andar gudáz ho gayí;
Dukh ke dinoṉ ne mujhe jakaṛ liyá hai.
17Rát ke waqt merí haḍḍiyáṉ mere andar chhid játí haiṉ,
Aur wuh dard jo mujhe kháe játe haiṉ dam nahíṉ lete.
18Mere marz kí shiddat se merí poshák badnumá ho gayí:
Wuh mere pairáhan ke girebán kí tarah mujh se lipṭí húí hai.
19Us ne mujhe kíchaṛ meṉ dhakel diyá hai,
Maiṉ ḳhák aur rákh kí mánind ho gayá húṉ.
20Maiṉ tujh se faryád kartá húṉ, aur tú mujhe jawáb nahíṉ detá:
Maiṉ khaṛá hotá húṉ, aur tú mujhe ghúrne lagtá hai.
21Tú badalkar mujh par berahm ho gayá hai:
Apne bázú ke zor se tú mujhe satátá hai.
22Tú mujhe úpar uṭhákar hawá par sawár kartá hai;
Aur mujhe áṉdhí meṉ ghulá detá hai.
23Kyúṉki maiṉ jántá húṉ ki tú mujhe maut tak pahuṉcháegá,
Aur us ghar tak jo sab zindoṉ ke liye muqarrar hai.
24Taubhí kyá tabáhí ke waqt koí apná háth na baṛháegá,
Aur musíbat meṉ faryád na karegá?
25Kyá maiṉ dardmand ke liye rotá na thá?
Kyá merí ján muhtáj ke liye ázurda na hotí thí?
26Jab maiṉ bhaláí ká muntazir thá, to buráí pesh áí;
Jab maiṉ raushní ke liye ṭhahrá thá, to táríkí áí.
27Merí aṉtṛiyáṉ ubal rahí haiṉ, aur árám nahíṉ pátí;
Mujh par musíbat ke din á paṛe haiṉ.
28Maiṉ bag̣air dhúp ke kálá ho gayá húṉ:
Maiṉ majma‘ meṉ khaṛá hokar madad ke liye duháí detá húṉ.
29Maiṉ gídaṛoṉ ká bháí,
Aur shutrmurg̣oṉ ká sáthí húṉ,
30Merí khál kálí hokar mujh par se girtí játí hai,
Aur merí haḍḍiyáṉ harárat se jal gayíṉ.
31Isí liye merí sitár se mátam,
Aur merí báṉslí se rone kí áwáz nikaltí hai.
Currently Selected:
Aiyúb 30: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
