Aiyúb 29
29
1Aur Aiyúb phir apní masal lákar kahne lagá:
2Kásh ki maiṉ aisá hotá, jaisá guzashta mahínoṉ meṉ,
Ya‘ní jaisá un dinoṉ meṉ jab Ḳhudá merí hifázat kartá thá;
3Jab us ká chirág̣ mere sir par raushan rahtá thá,
Aur maiṉ andhere meṉ us ke núr ke zarí‘e se chaltá thá;
4Jaisá maiṉ apní baromandí ke aiyám meṉ thá,
Jab Ḳhudá kí ḳhushnúdí mere ḍere par thí;
5Jab Qádir i mutlaq hanoz mere sáth thá,
Aur mere bachche mere sáth the;
6Jab mere qadam makkhan se dhulte the,
Aur chaṭán mere liye tel kí nadiyáṉ bahátí thí!
7Jab maiṉ shahr ke pháṭak par játá,
Aur apne liye chauk meṉ baiṭhak taiyár kartá thá,
8To jawán mujhe dekhte aur chhip játe,
Aur ‘umrrasída log uṭh khaṛe hote the;
9Umará bolná band kar dete,
Aur apná háth apne múṉh par rakh lete the;
10Raísoṉ kí áwáz tham játí,
Aur un kí zabán tálú se chipak játí thí.
11Kyúṉki kán, jab merí sun letá, to mujhe mubárak kahtá thá;
Aur áṉkh, jab mujhe dekh letí, to merí gawáhí detí thí:
12Kyúṉki maiṉ g̣aríb ko, jab wuh faryád kartá, chhuṛátá thá,
Aur yatím ko bhí, jis ká koí madadgár na thá.
13Halák honewálá mujhe du‘á detá thá:
Aur maiṉ bewa ke dil ko aisá ḳhush kartá thá, ki wuh gáne lagtí thí.
14Maiṉ ne sadáqat ko pahiná aur us se mulabbas húá;
Merá insáf goyá jubba aur ‘amáma thá.
15Maiṉ andhoṉ ke liye áṉkheṉ thá,
Aur laṉgṛon ke liye páṉw.
16Maiṉ muhtáj ká báp thá,
Aur maiṉ ajnabí ke mu‘ámale kí bhí tahqíq kartá thá.
17Maiṉ nárást ke jabṛoṉ ko toṛ ḍáltá,
Aur us ke dáṉtoṉ se shikár chhuṛá letá thá.
18Tab maiṉ kahtá thá, ki Maiṉ apne áshiyáne meṉ marúṉgá,
Aur maiṉ apne dinoṉ ko ret kí tarah beshumár karúṉgá:
19Merí jaṛeṉ pání tak phail gayí haiṉ,
Aur rát bhar os merí sháḳhoṉ par rahtí hai:
20Merí shaukat mujh meṉ táza hai,
Aur merí kamán mere háth meṉ nayí kí játí hai.
21Log merí taraf kán lagáte, aur muntazir rahte,
Aur merí mashwarat ke liye ḳhámosh ho játe the.
22Merí bátoṉ ke ba‘d wuh phir na bolte the;
Aur merí taqrír un par ṭapaktí thí.
23Wuh merá aisá intizár karte the jaisá bárish ká;
Aur apná muṉh aise pasárte the jaise pichhle meṉh ke liye.
24Jab wuh máyús hote the, tab maiṉ un par muskurátá thá;
Aur mere chihre kí basháshat ko unhoṉ ne kabhí na bigáṛá.
25Maiṉ un kí ráh ko chuntá, aur sardár kí tarah baiṭhtá,
Aur aise rahtá thá jaise fauj meṉ bádsháh,
Aur jaise wuh jo g̣amzadoṉ ko tasallí detá hai.
Currently Selected:
Aiyúb 29: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
