Aiyúb 28
28
1Yaqínan chándí kí kán hotí hai,
Aur sone ke liye jagah hotí hai, jaháṉ táyá játá hai.
2Lohá zamín se nikálá játá hai,
Aur pítal patthar meṉ se guláyá játá hai.
3Insán táríkí kí tah tak pahuṉchtá hai,
Aur zulmát aur maut ke sáye kí intihá tak
Pattharoṉ kí talásh kartá hai.
4Ábádí se dúr wuh suraṉg lagátá hai;
Áne jánewáloṉ ke páṉwoṉ se beḳhabar,
Aur logoṉ se dúr wuh laṭakte aur jholte haiṉ
5Aur zamín, us se ḳhurák paidá hotí hai:
Aur us ke andar goyá ág se inqiláb hotá rahtá hai.
6Is ke pattharoṉ meṉ nílam hai,
Aur is meṉ sone ke zarre haiṉ.
7Us ráh ko koí shikárí paranda nahíṉ jántá,
Na báz kí áṉkh ne use dekhá hai:
8Na mutakabbir jánwar us par chale haiṉ,
Na ḳhúnḳhwár babar udhar se guzrá hai.
9Wuh chaqmáq kí chaṭán par háth lagátá hai;
Wuh paháṛoṉ ko jaṛ se ulaṭ detá hai.
10Wuh chaṭánoṉ meṉ se náliyáṉ káṭtá;
Us kí áṉkh har beshqímat chíz ko dekh letí hai.
11Wuh nadiyoṉ ko masdúd kartá hai, ki wuh ṭapaktí bhí nahíṉ;
Aur chhipí chíz ko wuh raushní meṉ nikál látá hai.
12Lekin hikmat kaháṉ milegí?
Aur ḳhirad kí jagah kaháṉ hai?
13Na insán us kí qadr jántá hai;
Na wuh zindoṉ kí sarzamín meṉ miltí hai.
14Gahráo kahtá hai, Wuh mujh meṉ nahíṉ hai:
Samundar kahtá hai, Wuh mere pás nahíṉ.
15Na wuh sone ke badle mil saktí hai,
Na chándí us kí qímat ke liye tulegí.
16Na Ofír ká soná us ká mol ho saktá hai,
Aur na qímatí sulaimání patthar, yá nílam.
17Na soná aur káṉch us kí barábarí kar sakte haiṉ:
Na chokhe sone ke zewar us ká badal ṭhahreṉge.
18Múṉge aur billaur ká nám bhí nahíṉ liyá jáegá:
Balki hikmat kí qímat marján se baṛhkar hai.
19Na Kúsh ká pukhráj us ke barábar ṭhahregá,
Na chokhá soná us ká mol hogá.
20Phir hikmat kaháṉ se átí hai?
Aur ḳhirad kí jagah kaháṉ hai?
21Jis hál ki wuh sab zindoṉ kí áṉkhoṉ se chhipí hai,
Aur hawá ke parandoṉ se poshída rakkhí gayí hai.
22Halákat aur Maut kahtí haiṉ,
Ham ne apne kánoṉ se us kí afwáh to suní hai.
23Ḳhudá us kí ráh ko jántá hai,
Aur us kí jagah se wáqif hai.
24Kyúṉki wuh zamín kí intihá tak nazar kartá hai,
Aur sáre ásmán ke níche dekhtá hai;
25Táki wuh hawá ká wazn ṭhahráe;
Balki wuh pání ko paimáne se náptá hai.
26Jab us ne bárish ke liye qánún,
Aur ra‘d kí barq ke liye rásta ṭhahráyá:
27Tab hí us ne use dekhá, aur us ká bayán kiyá;
Us ne use qáim kiyá, balki use ḍhúṉḍh nikálá.
28Aur us ne insán se kahá,
Dekh, Ḳhudáwand ká ḳhauf hí hikmat hai,
Aur badí se dúr rahná ḳhirad hai.
Currently Selected:
Aiyúb 28: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
