Aiyúb 27
27
1Aur Aiyúb ne phir apní masal shurú‘ kí, aur kahne lagá:
2Zinda Ḳhudá kí qasam, jis ne merá haqq chhín liyá;
Aur Qádir i mutlaq kí saugand, jis ne merí ján ko dukh diyá hai;
3(Kyúṉki merí ján mujh meṉ ab tak sálim hai,
Aur Ḳhudá ká dam mere nathnoṉ meṉ hai;)
4Yaqínan mere lab nárástí kí báteṉ na kaheṉge,
Na merí zabán se fareb kí bát niklegí.
5Ḳhudá na kare ki maiṉ tumheṉ rást ṭhahráúṉ:
Maiṉ marte dam tak apní rásti ko tark na karúṉgá.
6Maiṉ apní sadáqat par qáim húṉ, aur ise na chhoṛúṉgá:
Jab tak merí zindagí hai, merá dil mujhe malámat na karegá.
7Merá dushman sharíroṉ kí mánind ho,
Aur mere ḳhiláf uṭhnewálá nárástoṉ kí mánind!
8Kyúṉki go bedín daulat hásil kar le, taubhí us kí ummed kyá hai,
Jab Ḳhudá us kí ján le le?
9Kyá Ḳhudá us kí faryád sunegá,
Jab musíbat us par áe?
10Kyá wuh Qádir i mutlaq meṉ masrúr rahegá,
Aur har waqt Ḳhudá se du‘á karegá?
11Maiṉ tumheṉ Ḳhudá ke bartáo kí ta‘lím dúṉgá;
Aur Qádir i mutlaq kí bát na chhipáúṉgá.
12Dekho, tum sabhoṉ ne ḳhud yih dekhá hai;
Phir tum bi’lkull ḳhudbín kaise ho gaye?
13Ḳhudá kí taraf se sharír ádmí ká hissa,
Aur zálimoṉ kí mirás, jo wuh Qádir i mutlaq kí taraf se páte haiṉ, yihí hai.
14Agar us ke bachche bahut ho jáeṉ, to wuh talwár ke liye haiṉ;
Aur us kí aulád roṭí se ser na hogí.
15Us ke báqí log markar dafn hoṉge,
Aur us kí bewáeṉ nauha na kareṉgí.
16Cháhe wuh ḳhák kí tarah chándí jama‘ kar le,
Aur kasrat se libás taiyár kar rakkhe;
17Wuh taiyár kar le, par jo rást haiṉ, wuh un ko pahineṉge,
Aur jo begunáh haiṉ, wuh us chándí ko báṉṭ leṉge.
18Us ne makṛí kí tarah apná ghar banáyá,
Aur us jhoṉpṛí kí tarah jise rakhwálá banátá hai.
19Wuh leṭtá hai daulatmand, par wuh dafn na kiyá jáegá;
Wuh apní áṉkh kholtá hai, aur wuh hai hí nahíṉ.
20Dahshat use pání kí tarah á letí hai;
Rát ko túfán use uṛá le játá hai.
21Mashriqí hawá use uṛá le játí hai, aur wuh játá rahtá hai;
Wuh use us kí jagah se ukháṛ pheṉktí hai.
22Kyúṉki Ḳhudá us par barsáegá, aur chhoṛne ká nahíṉ:
Wuh us ke háth se nikal bhágná cháhegá.
23Log us par táliyáṉ bajáeṉge,
Aur siskárkar use us kí jagah se nikál deṉge.
Currently Selected:
Aiyúb 27: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
