Aiyúb 22
22
1Tab Ilífaz Temání ne jawáb diyá:
2Kyá koí insán Ḳhudá ke kám á saktá hai?
Yaqínan ‘aqlmand apne hí kám ká hai.
3Kyá tere sádiq hone se Qádir i mutlaq ko koí ḳhushí hai?
Yá is bát se, ki tú apní ráhoṉ ko kámil kartá hai, use kuchh fáida hai?
4Kyá is liye ki tujhe us ká ḳhauf hai, wuh tujhe jhiṛaktá,
Aur tujhe ‘adálat meṉ látá hai?
5Kyá terí sharárat baṛí nahíṉ?
Kyá terí badkáríoṉ kí koí hadd hai?
6Kyúṉki tú ne apne bháí kí chízeṉ besabab rahn rakkhíṉ,
Aur naṉgoṉ ká libás utár liyá.
7Tú ne thake mándoṉ ko pání na piláyá,
Aur bhúkoṉ se roṭí ko rok rakkhá.
8Lekin zabardast ádmí zamín ká málik baná,
Aur ‘izzatdár ádmí us meṉ basá.
9Tú ne bewáoṉ ko ḳhálí chaltá kiyá,
Aur yatímoṉ ke bázú toṛe gaye.
10Is liye phande terí chároṉ taraf haiṉ,
Aur nágahání ḳhauf tujhe satátá hai,
11Yá aisí táríkí ki tú dekh nahíṉ saktá,
Aur pání kí báṛh tujhe chhipáe letí hai.
12Kyá ásmán kí balandí meṉ Ḳhudá nahíṉ?
Aur tároṉ kí balandí ko dekh, wuh kaise úṉche haiṉ!
13Phir tú kahtá hai, ki Ḳhudá kyá jántá hai?
Kyá wuh gahrí táríkí meṉ se ‘adálat karegá?
14Daldár bádal us ke liye parda haiṉ, ki wuh dekh nahíṉ saktá;
Wuh ásmán ke dáire meṉ sair kartá phirtá hai.
15Kyá tú usí purání ráh par chaltá rahegá,
Jis par sharír log chale haiṉ?
16Jo apne waqt se pahle uṭhá liye gaye,
Aur sailáb un kí bunyád ko bahá le gayá:
17Jo Ḳhudá se kahte the, Hamáre pás se chalá já;
Aur yih, ki Qádir i mutlaq hamáre liye kar kyá saktá hai?
18Taubhí us ne un ke gharoṉ ko achchhí achchhí chízoṉ se bhar diyá:
Lekin sharíroṉ kí mashwarat mujh se dúr hai.
19Sádiq yih dekhkar ḳhush hote haiṉ;
Aur begunáh un kí haṉsí uṛáte haiṉ:
20Aur kahte haiṉ, ki Yaqínan wuh jo hamáre ḳhiláf uṭhe the kaṭ gaye,
Aur jo un meṉ se báqí rah gaye the un ko ág ne bhasam kar diyá hai.
21Us se milá rah, to salámat rahegá;
Aur is se terá bhalá hogá.
22Maiṉ terí minnat kartá húṉ, ki sharí‘at ko usí kí zabání qubul kar,
Aur us kí bátoṉ ko apne dil meṉ rakh le.
23Agar tú Qádir i mutlaq kí taraf phire, to bahál kiyá jáegá;
Basharte ki tú nárástí ko apne ḳhaimoṉ se dúr kar de.
24Tú apne ḳhazáne ko miṭṭí meṉ,
Aur Ofír ke sone ko nadiyoṉ ke pattharoṉ meṉ ḍál de;
25Tab Qádir i mutlaq terá ḳhazána,
Aur tere liye beshqímat chándí hogá.
26Kyúṉki tab hí tú Qádir i mutlaq meṉ masrúr rahegá,
Aur Ḳhudá kí taraf apná muṉh uṭháegá.
27Tú us se du‘á karegá, aur wuh terí sunegá;
Aur tú apní mannateṉ púrí karegá.
28Jis bát ko tú kahegá, wuh tere liye ho jáegí;
Aur núr terí ráhoṉ ko raushan karegá.
29Jab wuh past kareṉge, tú kahegá, Balandí hogí;
Aur wuh halím ádmí ko bacháegá.
30Wuh us ko bhí chhuṛá legá, jo begunáh nahíṉ hai:
Háṉ, wuh tere háthoṉ kí pákízagí ke sabab se chhuṛáyá jáegá.
Currently Selected:
Aiyúb 22: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
