Aiyúb 21
21
1Tab Aiyúb ne jawáb diyá:
2G̣aur se merí bát suno;
Aur yihí tumhárá tasallí dená ho.
3Mujhe ijázat do, to maiṉ bhí kuchh kahúṉgá;
Aur jab maiṉ kah chukúṉ, to ṭhaṭṭhá már lená.
4Lekin maiṉ, kyá merí faryád insán se hai?
Phir maiṉ besabrí kyúṉ na karúṉ?
5Mujh par g̣aur karo, aur muta‘ajjib ho,
Aur apná háth apne muṉh par rakkho.
6Jab maiṉ yád kartá húṉ, to ghabrá játá húṉ,
Aur merá jism tharrá uṭhtá hai.
7Sharír kyúṉ jíte rahte,
‘Umrrasída hote, balki quwwat meṉ zabardast hote haiṉ?
8Un kí aulád un ke sáth un ke dekhte dekhte,
Aur un kí nasl un kí áṉkhoṉ ke sámne qáim ho játí hai.
9Un ke ghar ḍar se mahfúz haiṉ,
Aur Ḳhudá kí chhaṛí un par nahíṉ hai.
10Un ká sáṉḍ bárdár kar detá hai, aur chuktá nahíṉ;
Un kí gáe biyátí hai, aur apná bachchá nahíṉ girátí.
11Wuh apne chhoṭe chhoṭe bachchoṉ ko rewaṛ kí tarah báhar bhejte haiṉ,
Aur un kí aulád náchtí hai.
12Wuh ḳhanjarí aur sitár kí tál par gáte,
Aur báṉslí kí áwáz se ḳhush hote haiṉ.
13Wuh ḳhushhálí meṉ apne din káṭte,
Aur dam ke dam meṉ pátál meṉ utar játe haiṉ.
14Háláṉki unhoṉ ne Ḳhudá se kahá thá, ki Hamáre pás se chalá já;
Kyúṉki ham terí ráhoṉ kí ma‘rifat ke ḳhwáháṉ nahíṉ.
15Qádir i mutlaq hai kyá, ki ham us kí ‘ibádat kareṉ?
Aur agar ham us se du‘á kareṉ, to hameṉ kyá fáida hogá?
16Dekho, un kí iqbálmandí un ke háth meṉ nahíṉ hai;
Sharíroṉ kí mashwarat mujh se dúr hai.
17Kitní bár sharíroṉ ká chirág̣ bujh játá hai?
Aur un kí áfat un par á paṛtí hai?
Aur Ḳhudá apne g̣azab meṉ unheṉ g̣am par g̣am detá hai?
18Aur wuh aise haiṉ jaise hawá ke áge ḍanṭhal,
Aur jaise bhúsá jise áṉdhí uṛá le játí hai?
19Ḳhudá us kí badí us ke bachchoṉ ke liye rakh chhoṛtá hai;
Wuh us ká badla usí ko de, táki wuh ján le.
20Us kí halákat ko usí kí áṉkheṉ dekheṉ,
Aur wuh Qádir i mutlaq ke g̣azab meṉ se piye.
21Kyúṉki apne ba‘d us ko apne gharáne se kyá ḳhushí hai,
Jab us ke mahínoṉ ká silsila hí káṭ ḍálá gayá?
22Kyá koí Ḳhudá ko ‘ilm sikháegá?
Jis hál ki wuh sarfarázoṉ kí ‘adálat kartá hai.
23Koí to apní púrí táqat meṉ
Chain aur sukh se rahtá húá mar játá hai:
24Us kí dohniyáṉ dúdh se bharí haiṉ,
Aur us kí haḍḍiyoṉ ká gúdá tar hai.
25Aur koí apne jí meṉ kuṛh kuṛhkar martá hai,
Aur kabhí sukh nahíṉ pátá.
26Wuh donoṉ miṭṭí meṉ yaksáṉ paṛ játe haiṉ,
Aur kíṛe unheṉ ḍháṉk lete haiṉ.
27Dekho, maiṉ tumháre ḳhayáloṉ ko jántá húṉ,
Aur un mansúboṉ ko bhí jo tum beinsáfí se mere ḳhiláf báṉdhte ho.
28Kyúṉki tum kahte ho, ki Amír ká ghar kaháṉ rahá?
Aur wuh ḳhaima kaháṉ hai, jis meṉ sharír baste the?
29Kyá tum ne rásta chalnewáloṉ se kabhí nahíṉ púchhá?
Aur un ke ásár nahíṉ pahchánte?
30Ki sharír áfat ke din ke liye rakkhá játá hai?
Aur g̣azab ke din tak pahuṉcháyá játá hai?
31Kaun us kí ráh ko us ke muṉh par bayán karegá?
Aur us ke kiye ká badla kaun use degá?
32Taubhí wuh gor meṉ pahuṉcháyá jáegá,
Aur us kí qabr par pahrá diyá jáegá.
33Wádí ke ḍhele use marg̣úb haiṉ,
Aur sab log us ke píchhe chale jáeṉge,
Jaise us se pahle beshumár log gaye.
34So tum kyúṉ mujhe ‘abas tasallí dete ho,
Jis hál ki tumhárí bátoṉ meṉ jhúṭh hí jhúṭh hai.
Currently Selected:
Aiyúb 21: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
