Aiyúb 20
20
1Tab Súfar Na‘mátí ne jawáb diyá:
2Isí liye mere ḳhayál mujhe jawáb sikháte haiṉ,
Us jaldbází kí wajh se jo mujh meṉ hai.
3Maiṉ ne wuh jhiṛkí sun lí, jo mujhe sharminda kartí hai,
Aur merí ‘aql kí rúh mujhe jawáb detí hai.
4Kyá tú qadím zamáne kí yih bát nahíṉ jántá,
Jab se insán zamín par basáyá gayá,
5Ki sharíroṉ kí fath chandroza hai,
Aur bedínoṉ kí ḳhushí dam bhar kí hai?
6Ḳhwáh us ká jáh o jalál ásmán tak baland ho jáe,
Aur us ká sir bádaloṉ tak pahuṉche;
7Taubhí wuh apne hí fuzla kí tarah hamesha ke liye faná ho jáega;
Jinhoṉ ne use dekhá hai, kaheṉge, Wuh kaháṉ hai?
8Wuh ḳhwáb kí tarah uṛ jáegá, aur phir na milegá:
Balki wuh rát kí royá kí tarah dúr kar diyá jáegá.
9Jis áṉkh ne use dekhá, wuh use phir na dekhegí;
Na us ká makán use phir kabhí dekhegá.
10Us kí aulád g̣aríboṉ kí ḳhushámad karegí,
Aur usí ke háth us kí daulat ko wápas deṉge.
11Us kí haḍḍiyáṉ us kí jawání se pur haiṉ,
Par wuh us ke sáth ḳhák meṉ mil jáegí.
12Ḳhwáh sharárat us ko míṭhí lage,
Ḳhwáh wuh use apní zabán ke níche chhipáe;
13Ḳhwáh wuh use bachá rakkhe, aur na chhoṛe,
Balki use apne muṉh ke andar dabá rakkhe;
14Taubhí us ká kháná us kí aṉtṛiyoṉ meṉ badal gayá hai,
Wuh us ke andar afa‘í ká zahr hai.
15Wuh daulat ko nigal gayá hai, par wuh use phir uglegá;
Ḳhudá use us ke peṭ se báhar nikál degá.
16Wuh afa‘í ká zahr chúsegá:
Afa‘í kí zabán use már ḍálegí.
17Wuh daryáoṉ ko dekhne na páegá,
Ya‘ní shahd aur makkhan kí bahtí nadiyoṉ ko.
18Jis chíz ke liye us ne mashaqqat kheṉchí, use wuh wápas karegá aur niglegá nahíṉ;
Jo mál us ne jama‘ kiyá, us ke mutábiq wuh ḳhushí na karegá.
19Kyúṉki us ne g̣aríboṉ par zulm kiyá, aur unheṉ tark kar diyá;
Us ne zabardastí ghar chhíná, par wuh use banáne na páegá.
20Is sabab se ki wuh apne bátin meṉ ásúdagí se wáqif na húá,
Wuh apní dilpasand chízoṉ meṉ se kuchh nahíṉ bacháegá.
21Koí chíz aisí báqí na rahí, jis ko us ne niglá na ho;
Is liye us kí iqbálmandí qáim na rahegí.
22Apní kamál ásúdahálí meṉ bhí wuh tangí meṉ hogá:
Har dukhyáre ká háth us par paṛegá.
23Jab wuh apná peṭ bharne par hogá, to Ḳhudá apne qahr i shadíd us par názil karegá,
Aur jab wuh khátá hogá, tab yih us par barsegá.
24Wuh lohe ke hathyár se bhágegá,
Lekin pítal kí kamán use chhed ḍálegí.
25Wuh tír nikálegá, aur wuh us ke jism se báhar áegá:
Us kí chamaktí nok us ke pítte se niklegí;
Dahshat us par chháí húí hai.
26Sárí táríkí us ke ḳhazánoṉ ke liye rakkhí húí hai:
Wuh ág jo kisí insán kí sulgáí húí nahíṉ use khá jáegí;
Wuh use jo us ke ḍere meṉ bachá húá hogá, bhasam kar degí.
27Ásmán us kí badí ko záhir kar degá,
Aur zamín us ke ḳhiláf khaṛí ho jáegí.
28Us ke ghar kí baṛhtí játí rahegí,
Ḳhudá ke g̣azab ke din us ká mál játá rahegá.
29Ḳhudá kí taraf se sharír admí ká hissa,
Aur us ke liye Ḳhudá kí muqarrar kí húí mírás yihí hai.
Currently Selected:
Aiyúb 20: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
