Aiyúb 19
19
1Tab Aiyúb ne jawáb diyá:
2Tum kab tak merí ján kháte rahoge,
Aur bátoṉ se mujhe chúr chúr karoge?
3Ab das bár tum ne mujhe malámat hí kí:
Tumheṉ sharm nahíṉ átí, ki tum mere sáth saḳhtí se pesh áte ho.
4Aur máná ki mujh se ḳhatá húí,
Merí ḳhatá merí hí hai.
5Agar tum mere muqábale meṉ apní baṛáí karte ho,
Aur mere nang ko mere ḳhiláf pesh karte ho:
6To ján lo ki Ḳhudá ne mujhe past kiyá,
Aur apne jál se mujhe gher liyá hai.
7Dekho, maiṉ Zulm, zulm, pukártá húṉ, par merí suní nahíṉ játí:
Maiṉ madad ke liye duháí detá húṉ, par insáf nahíṉ hotá.
8Us ne merá rásta aisá masdúd kar diyá hai, ki maiṉ guzar nahíṉ saktá:
Us ne merí ráhoṉ par táríkí ko biṭhá diyá hai.
9Us ne merí hashmat mujh se chhín lí,
Aur mere sir par se táj utár liyá.
10Us ne mujhe har taraf se toṛkar níche girá diyá; bas, maiṉ to ho liyá;
Aur merí ummed ko us ne peṛ kí tarah ukháṛ ḍálá hai.
11Us ne apne g̣azab ko bhí mere ḳhiláf bhaṛkáyá hai,
Aur wuh mujhe apne muḳhálifoṉ meṉ shumár kartá hai.
12Us kí faujeṉ ikaṭṭhí hokar átí,
Aur mere ḳhiláf apní ráh taiyár kartí,
Aur mere ḍere ke chaugird ḳhaimazan hotí haiṉ.
13Us ne mere bháiyoṉ ko mujh se dúr kar diyá hai,
Aur mere jánpahchán mujh se begána ho gaye haiṉ.
14Mere rishtadár kám na áe,
Aur mere dilí dost mujhe bhúl gaye haiṉ.
15Maiṉ apne ghar ke rahnewáloṉ, aur apní lauṉḍiyoṉ kí nazar meṉ ajnabí húṉ;
Maiṉ un kí nigáh meṉ pardesí ho gayá húṉ.
16Maiṉ apne naukar ko bulátá húṉ, aur wuh mujhe jawáb nahíṉ detá,
Agarchi maiṉ apne muṉh se us kí minnat kartá húṉ.
17Merá sáṉs merí bíwí ke liye makrúh hai,
Aur merí minnat merí máṉ kí aulád ke liye.
18Chhoṭe bachchhe bhí mujhe haqír jánte haiṉ,
Jab maiṉ khaṛá hotá húṉ, to wuh mujh par áwáza kaste haiṉ.
19Mere sab hamráz dost mujh se nafrat karte haiṉ:
Aur jin se maiṉ mahabbat kartá thá, wuh mere ḳhiláf ho gaye haiṉ.
20Merí khál aur merá gosht merí haḍḍiyoṉ se chimaṭ gaye haiṉ;
Aur maiṉ bálbál bach niklá húṉ.
21Ai mere dosto, mujh par tars kháo, tars kháo;
Kyúṉki Ḳhudá ká háth mujh par bhárí hai.
22Tum kyúṉ Ḳhudá kí tarah mujhe satáte ho,
Aur mere gosht par qaná‘at nahíṉ karte?
23Kásh ki merí báteṉ ab likh lí játíṉ!
Kásh ki wuh kisí kitáb meṉ qalamband hotíṉ!
24Kásh ki wuh lohe ke qalam aur síse se
Hamesha ke liye chaṭán par kanda kí játíṉ!
25Lekin maiṉ jántá húṉ ki merá maḳhlasí denewálá zinda hai,
Aur áḳhirkár wuh zamín par khaṛá hogá:
26Aur apní khál ke is tarah barbád ho jáne ke ba‘d bhí,
Maiṉ apne is jism meṉ se Ḳhudá ko dekhúṉgá;
27Jise maiṉ ḳhud dekhúṉgá,
Aur merí hí áṉkheṉ dekheṉgí, na ki begáne kí.
Mere gurde mere andar faná ho gaye haiṉ.
28Agar tum kaho, Ham use kaisá kaisá satáeṉge!
Háláṉki aslí bát mujh meṉ páí gayí hai;
29To tum talwár se ḍaro:
Kyúṉki qahr talwár kí sazáoṉ ko látá hai,
Táki tum ján lo ki insáf hogá.
Currently Selected:
Aiyúb 19: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
