Aiyúb 17
17
1Merí ján tabáh ho gayí, mere din ho chuke,
Qabr mere liye taiyár hai.
2Yaqínan haṉsí uṛánewále mere sáth sáth haiṉ,
Aur merí áṉkh un kí chhíṛ chháṛ par lagí rahtí hai.
3Zamánat de, apne aur mere bích meṉ tú hí zámin ho;
Kaun hai jo mere háth par háth máre?
4Kyúṉki tú ne in ke dil ko samajh se roká hai;
Is liye tú in ko sarfaráz na karegá.
5Jo lúṭ kí ḳhátir apne dostoṉ ko mulzim ṭhahrátá hai,
Us ke bachchoṉ kí áṉkheṉ bhí játí raheṉgí.
6Us ne mujhe logoṉ ke liye zarbu’l masal baná diyá hai;
Aur maiṉ aisá ho gayá, ki log mere muṉh par thúkeṉ.
7Merí áṉkh g̣am ke máre dhundlá gayí,
Aur mere sab a‘zá parchháíṉ kí mánind haiṉ.
8Rástbáz ádmí is bát se hairán hoṉge,
Aur ma‘súm ádmí beḳhudá logoṉ ke ḳhiláf josh meṉ áegá.
9Taubhí sádiq apní ráh meṉ sábitqadam rahegá,
Aur jis ke háth sáf haiṉ, wuh zoráwar hí hotá jáegá.
10Par tum sab ke sab áte ho, to áo:
Mujhe tumháre darmiyán ek bhí ‘aqlmand ádmí na milegá.
11Mere din ho chuke, mere maqsúd,
Balki mere dil ke armán miṭ gaye.
12Wuh rát ko din se badalte haiṉ,
Wuh kahte haiṉ, Raushní táríkí ke nazdík hai.
13Agar maiṉ ummed karúṉ, ki pátál merá ghar hai;
Agar maiṉ ne andhere meṉ apná bichhauná bichhá liyá hai;
14Agar maiṉ ne saṛáhaṭ se kahá hai, ki Tú merá báp hai;
Aur kíṛe se, ki Tú merí máṉ aur bahin hai;
15To merí ummed kaháṉ rahí?
Aur jo merí ummed hai, use kaun dekhegá?
16Wuh pátál ke pháṭakoṉ tak níche utar jáegí,
Jab ham milkar ḳhák meṉ árám páeṉge.
Currently Selected:
Aiyúb 17: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
