Aiyúb 16
16
1Tab Aiyúb ne jawáb diyá,
2Aisí bahut sí báteṉ maiṉ sun chuká húṉ;
Tum sab ke sab nikamme tasallí denewále ho.
3Kyá lag̣w báteṉ kabhí ḳhatm hoṉgí?
Tú kaun sí bát se jhiṛakkar jawáb detá hai?
4Maiṉ bhí tumhárí tarah bát baná saktá húṉ:
Agar tumhárí ján merí ján kí jagah hotí,
To maiṉ tumháre ḳhiláf báteṉ ghaṛ saktá,
Aur tum par apná sir hilá saktá.
5Balki maiṉ apní zabán se tumheṉ taqwíyat detá,
Aur mere laboṉ kí g̣amgusárí tum ko tasallí detí.
6Agarchi maiṉ boltá húṉ, par mujh ko tasallí nahíṉ hotí:
Aur go chupká bhí ho játá húṉ, par mujhe kyá ráhat hotí hai?
7Par us ne to mujhe bezár kar ḍálá hai:
Tú ne mere sáre jathe ko tabáh kar diyá hai.
8Tú ne mujhe mazbútí se pakaṛ liyá hai, yihí mujh par gawáh hai:
Merí lág̣arí mere ḳhiláf khaṛí hokar mere muṉh par gawáhí detí hai.
9Us ne apne g̣azab meṉ mujhe pháṛá, aur merá píchhá kiyá hai;
Us ne mujh par dáṉt píse:
Merá muḳhálif mujhe áṉkheṉ dikhátá hai.
10Unhoṉ ne mujh par muṉh pasárá hai;
Unhoṉ ne tanzan mujhe gál par márá hai:
Wuh mere ḳhiláf ikaṭṭhe hote haiṉ.
11Ḳhudá mujhe bedínoṉ ke hawále kartá hai,
Aur sharíroṉ ke háthoṉ meṉ mujhe supurd kartá hai.
12Maiṉ árám se thá, aur us ne mujhe chúr chúr kar ḍálá;
Us ne merí gardan pakaṛ lí, aur mujhe paṭakkar ṭukṛe ṭukṛe kar diyá;
Aur us ne mujhe apná nishána banákar khaṛá kar liyá hai.
13Us ke tírandáz mujhe chároṉ taraf se gher lete haiṉ,
Wuh mere gurdoṉ ko chírtá hai, aur rahm nahíṉ kartá;
Aur mere pit ko zamín par bahá detá hai.
14Wuh mujhe zaḳhm par zaḳhm lagákar ḳhasta kartá hai;
Wuh pahlawán kí tarah mujh par dháwá kartá hai.
15Maiṉ ne apní khál par ṭáṭ ko sí liyá hai,
Aur apná síṉg ḳhák meṉ rakh diyá hai.
16Merá muṉh rote rote súj gayá hai,
Aur merí palakoṉ par maut ká sáya hai;
17Agarchi mere háthoṉ meṉ zulm nahíṉ,
Aur merí du‘á beriyá hai.
18Ai zamín, mere ḳhún ko na ḍháṉkná,
Aur merí faryád ko árám kí jagah na mile.
19Ab bhí dekh, merá gawáh ásmán par hai,
Aur merá zámin ‘álam i bálá par hai.
20Mere dost merí hiqárat karte haiṉ;
Par merí áṉkh Ḳhudá ke huzúr áṉsú bahátí hai;
21Táki wuh ádmí ke haqq ko apne sáth,
Aur ádamzád ke haqq ko us ke paṛausí ke sáth qáim rakkhe.
22Kyúṉki jab chand sál nikal jáeṉge,
To maiṉ us ráste se chalá jáúṉgá, jis se phir lauṭne ká nahíṉ.
Currently Selected:
Aiyúb 16: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
