Aiyúb 15
15
1Tab Ilífaz Temání ne jawáb diyá:
2Kyá ‘aqlmand ko cháhiye ki lag̣w báteṉ joṛkar jawáb de,
Aur mashriqí hawá se apná peṭ bhare?
3Kyá wuh befáida bakwás se bahs kare,
Yá aisí taqríroṉ se jo besúd haiṉ?
4Balki tú ḳhauf ko bar taraf karke,
Ḳhudá ke huzúr ‘ibádat ko záil kartá hai.
5Kyúṉki terá gunáh tere muṉh ko sikhátá hai,
Aur tú ‘aiyároṉ kí zabán iḳhtiyár kartá hai.
6Terá hí muṉh tujhe mulzim ṭhahrátá hai, na ki maiṉ;
Balki tere hí hoṉṭh tere ḳhiláf gawáhí dete haiṉ.
7Kyá pahlá insán tú hí paidá húá?
Yá paháṛoṉ se pahle terí paidáish húí?
8Kyá tú ne Ḳhudá kí poshída maslahat sun lí hai?
Aur apne liye ‘aqlmandí ká ṭheka le rakkhá hai?
9Tú aisá kyá jántá hai, jo ham nahíṉ jánte?
Tujh meṉ aisí kyá samajh hai, jo ham meṉ nahíṉ?
10Ham logoṉ meṉ safed sir aur baṛe búṛhe bhí haiṉ,
Jo tere báp se bhí bahut ziyáda ‘umr ke haiṉ.
11Kyá Ḳhudá kí tasallí tere nazdík kuchh kam hai,
Aur wuh kalám jo tujh se narmí ke sáth kiyá játá hai?
12Terá dil kyúṉ tujhe kheṉch le játá hai,
Aur terí áṉkheṉ kyúṉ ishára kartí haiṉ,
13Ki tú apní rúh ko Ḳhudá kí muḳhálafat par ámáda kartá hai,
Aur apne muṉh se aisí báteṉ nikalne detá hai?
14Insán hai kyá, ki wuh pák ho?
Aur wuh jo ‘aurat se paidá húá, kyá hai ki sádiq ho?
15Dekh, wuh apne qudsíoṉ ká i‘tibár nahíṉ kartá,
Balki ásmán bhí us kí nazar meṉ pák nahíṉ.
16Phir, bhalá us ká kyá zikr, jo ghinauná aur ḳharáb hai,
Ya‘ní wuh ádmí jo badí ko pání kí tarah pítá hai?
17Maiṉ tujhe batátá húṉ, tú merí sun;
Aur jo maiṉ ne dekhá hai, us ká bayán karúṉgá.
18(Jise ‘aqlmandoṉ ne apne bápdádá se sunkar batáyá hai,
Aur use chhipáyá nahíṉ;
19Sirf un hí ko mulk diyá gayá thá,
Aur koí pardesí un ke darmiyán nahíṉ áyá:)
20Sharír ádmí apní sárí ‘umr dard se karáhtá hai,
Ya‘ní sáre baras jo zálim ke liye rakkhe gaye haiṉ.
21Ḍaráoní áwázeṉ us ke kán meṉ gúṉjtí rahtí haiṉ;
Iqbálmandí ke waqt g̣áratgar us par á paṛegá:
22Use yaqín nahíṉ, ki wuh andhere se báhar niklegá,
Aur talwár us kí muntazir hai:
23Wuh roṭí ke liye márá márá phirtá hai, ki kaháṉ milegí?
Wuh jántá hai ki andhere ká din pás hí hai.
24Musíbat aur saḳht taklíf use ḍarátí haiṉ,
Aise bádsháh kí tarah, jo laṛáí ke liye taiyár ho, wuh us par gálib átí haiṉ.
25Is liye ki us ne Ḳhudá ke ḳhiláf apná háth baṛháyá hai,
Aur Qádir i mutlaq ke ḳhiláf bebákí kartá hai.
26Wuh apní ḍháloṉ kí moṭí moṭí gulmeḳhoṉ ke sáth
Gardankash hokar us par lapaktá hai.
27Is liye ki us ke muṉh par muṭápá chhá gayá hai,
Aur us ke pahlúoṉ par charbí kí taheṉ jam gayí haiṉ.
28Aur wuh wírán shahroṉ meṉ bas gayá hai,
Aise makánoṉ meṉ jin meṉ koí ádmí na basá,
Aur jo khanḍar hone ko the.
29Wuh daulatmand na hogá, us ká mál baná na rahegá,
Aur aisoṉ kí paidáwár zamín kí taraf na jhukegí.
30Wuh andhere se kabhí na niklegá,
Shu‘le us kí sháḳhoṉ ko ḳhushk kar deṉge,
Aur wuh Ḳhudá ke muṉh ke dam se játá rahegá.
31Wuh apne áp ko dhoká dekar batálat ká bharosá na kare;
Kyúṉki batálat hí us ká ajr ṭhahregí.
32Yih us ke waqt se pahle púrá ho jáegá,
Aur us kí sháḳh harí na rahegí.
33Ták kí tarah us ke angúr kachche hí jhaṛ jáeṉge,
Aur zaitún kí tarah us ke phúl gir jáeṉge.
34Kyúṉki beḳhudá logoṉ kí jamá‘at bephal rahegí,
Aur rishwat ke ḍeroṉ ko ág bhasam kar degí.
35Wuh sharárat se bárdár hote haiṉ, aur badí paidá hotí hai,
Aur un ká peṭ dagá ko taiyár kartá hai.
Currently Selected:
Aiyúb 15: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
