Aiyúb 12
12
1Tab Aiyúb ne jawáb diyá:
2Beshakk ádmí to tum hí ho,
Aur hikmat tumháre hí sáth maregí.
3Lekin mujh meṉ bhí samajh hai, jaise tum meṉ hai;
Maiṉ tum se kam nahíṉ;
Bhalá, aisí báteṉ jaisí yih haiṉ, kaun nahíṉ jántá?
4Maiṉ us ádmí kí tarah húṉ, jo apne paṛausí ke liye haṉsí ká nishána baná hai.
Maiṉ wuh ádmí thá, jo Ḳhudá se du‘á kartá aur wuh us kí sun letá thá:
Rást aur kámil ádmí haṉsí ká nishána hotá hí hai.
5Jo chain se hai, us ke ḳhayál meṉ dukh ke liye hiqárat hotí hai.
Yih un ke liye taiyár rahtí hai jin ká páṉw phisaltá hai.
6Ḍákúoṉ ke ḍere salámat rahte haiṉ,
Aur jo Ḳhudá ko g̣ussa diláte haiṉ, wuh mahfúz rahte haiṉ;
Un hí ke háth ko Ḳhudá ḳhúb bhartá hai.
7Haiwánoṉ se púchh, aur wuh tujhe sikháeṉge;
Aur hawá ke parandoṉ se daryáft kar, aur wuh tujhe batáeṉge.
8Yá zamín se bát kar, aur wuh tujhe sikháegí;
Aur samundar kí machhliyáṉ tujh se bayán kareṉgí.
9Kaun nahíṉ jántá, ki in sab bátoṉ meṉ
Ḳhudá hí ká háth hai, jis ne yih sab banáyá?
10Usí ke háth meṉ har jándár kí ján,
Aur kull baní Ádam ká dam hai.
11Kyá kán bátoṉ ko nahíṉ parakh letá,
Jaise zabán kháne ko chakh letí hai?
12Buḍḍhoṉ meṉ samajh hotí hai,
Aur ‘umr kí darází meṉ dánáí.
13Ḳhudá meṉ samajh aur quwwat hai;
Us ke pás maslahat aur dánáí hai.
14Dekho, wuh ḍhá detá hai, to phir bantá nahíṉ;
Wuh ádmí ko band kar detá hai, to phir khultá nahíṉ.
15Dekho, wuh meṉh ko rok letá hai, to pání súkh játá hai;
Phir jab wuh use bhejtá hai, to wuh zamín ko ulaṭ detá hai.
16Us meṉ táqat aur tásír kí quwwat hai,
Fareb khánewálá, aur fareb denewálá donoṉ usí ke haiṉ.
17Wuh mushíroṉ ko luṭwákar asírí meṉ le játá hai,
Aur ‘adálat karnewáloṉ ko bewuqúf baná detá hai.
18Wuh sháhí bandhoṉ ko khol ḍáltá hai,
Aur bádsháhoṉ kí kamar par paṭká báṉdhtá hai.
19Wuh káhinoṉ ko luṭwákar asírí meṉ le játá,
Aur zabardastoṉ ko pachháṛ detá hai.
20Wuh i‘timádwále kí quwwat i goyáí dúr kartá,
Aur buzurgoṉ kí dánáí ko chhín letá hai.
21Wuh umará par hiqárat barsátá hai,
Aur zoráwaroṉ ke kamarband ko khol ḍáltá hai.
22Wuh andhere meṉ se gahrí bátoṉ ko áshkárá kartá,
Aur maut ke sáye ko bhí raushní meṉ le átá hai.
23Wuh qaumoṉ ko baṛhákar unheṉ halák kar ḍáltá hai:
Wuh qaumoṉ ko phailátá, aur phir unheṉ sameṭ letá hai.
24Wuh zamín kí qaumoṉ ke sardároṉ kí ‘aql uṛá detá,
Aur unheṉ aise biyábán meṉ bhaṭká detá hai, jaháṉ rásta nahíṉ.
25Wuh raushní ke bag̣air táríkí meṉ ṭaṭolte phirte haiṉ,
Aur wuh unheṉ aisá baná detá hai, ki matwále kí tarah laṛkhaṛáte húe chalte haiṉ.
Currently Selected:
Aiyúb 12: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
