Aiyúb 11
11
1Tab Súfar Na‘mátí ne jawáb diyá:
2Kyá in bahut sí bátoṉ ká jawáb na diyá jáe?
Aur kyá bakwásí ádmí rást ṭhahráyá jáe?
3Kyá terí láfzaní logoṉ ko ḳhámosh kar de?
Aur jab tú ṭhaṭṭhá kare, to kyá koí tujhe sharminda na kare?
4Kyúṉki tú kahtá hai, Merí ta‘lím pák hai,
Aur maiṉ terí nigáh meṉ begunáh húṉ.
5Kásh Ḳhudá ḳhud bole,
Aur tere ḳhiláf apne laboṉ ko khole,
6Aur hikmat ke asrár tujhe dikháe,
Ki wuh tásír meṉ gúnágún hai!
So ján le, ki terí badkárí jis láiq hai, us se kam hí Ḳhudá tujh se mutálaba kartá hai.
7Kyá tú talásh se Ḳhudá ko pá saktá hai?
Kyá tú Qádir i mutlaq ká bhed kamál ke sáth daryáft kar saktá hai?
8Wuh ásmán kí tarah úṉchá hai; tú kyá kar saktá hai?
Wuh pátál se gahrá hai; tú kyá ján saktá hai?
9Us kí náp zamín se lambí,
Aur samundar se chauṛí hai.
10Agar wuh bích se guzarkar band kar de,
Aur ‘adálat meṉ buláe, to kaun use rok saktá hai?
11Kyúṉki wuh behúda ádmíoṉ ko pahchántá hai;
Aur badkárí ko bhí dekhtá hai; ḳhwáh us ká ḳhayál na kare.
12Lekin behúda ádmí samajh se ḳhálí hotá hai,
Balki insán gorḳhar ke bachche kí tarah paidá hotá hai.
13Agar tú apne dil ko ṭhík kare,
Aur apne háth us kí taraf phailáe;
14Agar tere háth meṉ badkárí ho, to use dúr kare,
Aur nárástí ko apne ḍeroṉ meṉ rahne na de;
15Tab yaqínan tú apná muṉh bedág̣ uṭháegá,
Balki tú sábitqadam ho jáegá aur ḍarne ká nahíṉ.
16Kyúṉki tú apní ḳhastahálí ko bhúl jáegá;
Tú use us pání kí tarah yád karegá jo bah gayá ho:
17Aur terí zindagí do pahar se ziyáda raushan hogí;
Aur agar táríkí húí, to wuh subh kí tarah hogí.
18Aur tú mutma’inn rahegá, kyúṉki ummed hogí;
Aur apne chaugird dekh dekhkar, salámatí se árám karegá.
19Aur tú leṭ jáegá, aur koí tujhe ḍaráegá nahíṉ;
Balki bahutere tujh se faryád kareṉge.
20Par sharíroṉ kí áṉkheṉ rah jáeṉgí,
Un ke liye bhágne ko bhí rásta na hogá,
Aur dam de dená hí un kí ummed hogí.
Currently Selected:
Aiyúb 11: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
