Aiyúb 13
13
1Merí áṉkh ne to yih sab kuchh dekhá hai,
Mere kán ne yih suná, aur samajh bhí liyá hai.
2Jo kuchh tum jánte ho, use maiṉ bhí jántá húṉ;
Maiṉ tum se kam nahíṉ.
3Maiṉ to Qádir i mutlaq se guftogú karní cháhtá húṉ,
Merí árzú hai ki Ḳhudá ke sáth bahs karúṉ.
4Lekin tum log to jhúṭhí bátoṉ ke ghaṛnewále ho,
Tum sab ke sab nikamme tabíb ho.
5Kash tum bi’lkull ḳhámosh ho játe!
Yihí tumhárí ‘aqlmandí hotí.
6Ab merí dalíl suno,
Aur mere muṉh ke da‘we par kán lagáo.
7Kyá tum Ḳhudá ke haqq meṉ nárástí se báteṉ karoge,
Aur us ke haqq meṉ fareb se bologe?
8Kyá tum us kí tarafdárí karoge?
Kyá tum Ḳhudá kí taraf se jhagṛoge?
9Kyá yih achchhá hogá, ki wuh tumhárí taftísh kare?
Kyá tum use fareb doge, jaise ádmí ko?
10Wuh zarúr tumheṉ malámat karegá,
Agar tum ḳhufiyatan tarafdárí karo.
11Kyá us ká jalál tumheṉ ḍará na degá,
Aur us ká ru‘b tum par chhá na jáegá?
12Tumhárí ma‘rúf báteṉ rákh kí kaháwateṉ haiṉ,
Tumhárí fasíleṉ miṭṭí kí fasíleṉ haiṉ.
13Tum chup raho, mujhe chhoṛo, táki maiṉ bol sakúṉ,
Aur phir mujh par jo bíte so bíte.
14Maiṉ apná hí gosht apne dáṉtoṉ se kyúṉ chabáúṉ,
Aur apní ján apní hathelí par kyúṉ rakkhúṉ?
15Dekho, wuh mujhe qatl karegá, maiṉ intizár nahíṉ karúṉgá;
Ba har hál maiṉ apní ráhoṉ kí táíd us ke huzúr karúṉgá.
16Yih bhí merí naját ká bá‘is hogá;
Kyúṉki koí beḳhudá us ke sámne á nahíṉ saktá.
17Merí taqrír ko g̣aur se suno,
Aur merá bayán tumháre kánoṉ meṉ paṛe.
18Dekho, maiṉ ne apná da‘wá durust kar liyá hai;
Maiṉ jántá húṉ ki maiṉ sádiq húṉ.
19Kaun hai jo mere sáth jhagṛegá?
Kyúṉki phir to maiṉ chup hokar apní ján de dúṉgá.
20Faqat do hí kám mujh se na kar,
Tab maiṉ tujh se nahíṉ chhipúṉgá:
21Apná háth mujh se dúr haṭá le;
Aur terí haibat mujhe ḳhaufzada na kare.
22Tab tere buláne par maiṉ jawáb dúṉgá;
Yá maiṉ bolúṉ, aur tú mujhe jawáb de.
23Merí badkáríáṉ aur gunáh kitne haiṉ?
Aisá kar ki maiṉ apní ḳhatá aur gunáh ko ján lúṉ.
24Tú apná muṉh kyúṉ chhipátá hai,
Aur mujhe apná dushman kyúṉ jántá hai?
25Kyá tú uṛte patte ko pareshán karegá?
Kyá tú súkhe ḍanṭhal ke píchhe paṛegá?
26Kyúṉki tú mere ḳhiláf talḳh báteṉ likhtá hai,
Aur merí jawání kí badkáríáṉ mujh par wápas látá hai;
27Tú mere páṉw káṭh meṉ ṭhoṉktá, aur merí sárí ráhoṉ kí nigrání kartá hai;
Aur mere páṉwoṉ ke gird ḳhatt kheṉchtá hai:
28Agarchi maiṉ saṛí húí chíz kí tarah húṉ, jo faná ho játí hai,
Yá us kapṛe kí mánind húṉ jise kíṛe ne khá liyá ho.
Currently Selected:
Aiyúb 13: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
