Yarmiyáh 5
5
1Ab Yarúshalem ke kúchoṉ meṉ idhar udhar gasht karo, aur dekho, aur daryáft karo, aur us ke chaukoṉ meṉ ḍhúṉḍho; agar koí ádmí waháṉ mile, jo insáf karnewálá aur sachcháí ká tálib ho, to maiṉ use mu‘áf karúṉgá. 2Aur agarchi wuh kahte haiṉ, Zinda Ḳhudáwand kí qasam, taubhí yaqínan wuh jhúṭhí qasam kháte haiṉ. 3Ai Ḳhudáwand, kyá terí áṉkheṉ sachcháí par nahíṉ haiṉ? tú ne un ko márá hai, par unhoṉ ne afsos nahíṉ kiyá: tú ne un ko g̣árat kiyá, par wuh tarbiyatpazír na húe: unhoṉ ne apne chihroṉ ko chaṭán se bhí ziyáda saḳht banáyá; unhoṉ ne wápas áne se inkár kiyá hai. 4Tab maiṉ ne kahá, ki Yaqínan yih becháre jáhil haiṉ: kyúṉki yih Ḳhudáwand kí ráh aur apne Ḳhudá ke ahkám ko nahíṉ jánte: 5maiṉ buzurgoṉ ke pás jáúṉgá, aur un se kalám karúṉgá; kyúṉki wuh Ḳhudáwand kí ráh aur apne Ḳhudá ke ahkám ko jánte haiṉ. Lekin inhoṉ ne júá bi’lkull toṛ ḍálá, aur bandhanoṉ ke ṭukṛe kar ḍále. 6Is liye jangal ká sher i babar un ko pháṛegá; biyábán ká bheṛiyá un ko halák karegá, chítá un ke shahroṉ kí ghát meṉ baiṭhá rahegá, jo koí un meṉ se nikle pháṛá jáegá: kyúṉki un kí sarkashí bahut húí, aur un kí bargashtagí baṛh gayí. 7Maiṉ tujhe kyúṉkar mu‘áf karúṉ? tere farzandoṉ ne mujh ko chhoṛá, aur un kí qasam kháí jo ḳhudá nahíṉ haiṉ: jab maiṉ ne un ko ser kiyá, to unhoṉ ne badkárí kí, aur pare báṉdhkar qahbaḳhánoṉ meṉ ikaṭṭhe húe. 8Wuh peṭ bhare ghoṛoṉ kí mánind ho gaye, har ek subh ke waqt apne paṛausí kí bíwí par hinhináne lagá. 9Ḳhudáwand farmátá hai, Kyá maiṉ in bátoṉ ke liye sazá na dúṉgá: aur kyá merí rúh aisí qaum se intiqám na legí?
10Us kí díwároṉ par chaṛh jáo, aur toṛ ḍálo; lekin bi’lkull barbád na karo: us kí sháḳheṉ káṭ do: kyúṉki wuh Ḳhudáwand kí nahíṉ haiṉ. 11Is liye ki Ḳhudáwand farmátá hai, ki Isráíl ke gharáne aur Yahúdáh ke gharáne ne mujh se niháyat bewafáí kí. 12Unhoṉ ne Ḳhudáwand ká inkár kiyá, aur kahá, ki Wuh nahíṉ hai; ham par hargiz áfat na áegí, aur talwár aur kál ko ham na dekheṉge: 13aur nabí mahz hawá ho jáeṉge, aur kalám un meṉ nahíṉ hai; un ke sáth aisá hí hogá. 14Pas is liye ki tum yúṉ kahte ho, Ḳhudáwand, Rabb u’l afwáj yúṉ farmátá hai, ki dekh, maiṉ apne kalám ko tere muṉh meṉ ág, aur in logoṉ ko lakṛí banáúṉgá, aur wuh in ko bhasam kar degí. 15Ai Isráíl ke gharáne, dekh; maiṉ ek qaum ko dúr se tujh par chaṛhá láúṉgá, Ḳhudáwand farmátá hai: wuh zabardast qaum hai, wuh qadím qaum hai; wuh aisí qaum hai jis kí zabán tú nahíṉ jántá, aur un kí bát ko tú nahíṉ samajhtá. 16Un ke tarkash khulí qabreṉ haiṉ, wuh sab bahádur mard haiṉ. 17Aur wuh terí fasl ká anáj aur terí roṭí, jo tere beṭoṉ aur beṭiyoṉ ke kháne kí thí, khá jáeṉge: tere gáe bail aur terí bheṛ bakriyoṉ ko chaṭ kar jáeṉge: tere angúr aur anjír nigal jáeṉge: tere hasín shahroṉ ko jin par terá bharosá hai, talwár se wírán kar deṉge. 18Lekin, Ḳhudáwand farmátá hai, un aiyám meṉ bhí maiṉ tum ko bi’lkull barbád na karúṉgá. 19Aur yúṉ hogá ki jab wuh kaheṉge, ki Ḳhudáwand hamáre Ḳhudá ne yih sab kuchh ham se kyúṉ kiyá? to tú un se kahegá, ki Jis tarah tum ne mujhe chhoṛ diyá, aur apne mulk meṉ g̣airma‘búdoṉ kí ‘ibádat kí, usí tarah tum us mulk meṉ jo tumhárá nahíṉ hai ajnabíoṉ kí ḳhidmat karoge.
20Ya‘qúb ke gharáne meṉ is bát ká ishtihár do, aur Yahúdáh meṉ is kí manádí karo, aur kaho; 21Ab zará suno, ai nádán aur be‘aql logo, jo áṉkheṉ rakhte ho par dekhte nahíṉ; jo kán rakhte ho par sunte nahíṉ. 22Ḳhudáwand farmátá hai, Kyá tum mujh se nahíṉ ḍarte? kyá tum mere huzúr meṉ thartharáoge nahíṉ, jis ne ret ko samundar kí hadd par abadí hukm se qáim kiyá ki wuh us se áge nahíṉ baṛh saktá? aur harchand us kí lahreṉ uchhaltí haiṉ, taubhí g̣álib nahíṉ átíṉ; aur harchand shor kartí haiṉ taubhí us se tajáwuz nahíṉ kar saktíṉ. 23Lekin in logoṉ ke dil bág̣í aur sarkash haiṉ; inhoṉ ne sarkashí kí aur dúr ho gaye. 24Inhoṉ ne apne dil meṉ na kahá, ki Ham Ḳhudáwand apne Ḳhudá se ḍareṉ, jo pahlí aur pichhlí barsát waqt par bhejtá hai, aur fasl ke muqarrara haftoṉ ko hamáre liye maujúd kar rakhtá hai. 25Tumhárí badkirdárí ne in chízoṉ ko tum se dúr kar diyá, aur tumháre gunáhoṉ ne achchhí chízoṉ ko tum se báz rakkhá. 26Kyúṉki mere logoṉ meṉ sharír páe játe haiṉ: wuh phandá lagánewáloṉ kí mánind ghát meṉ baiṭhe haiṉ; wuh jál phailáte aur ádmíoṉ ko pakaṛte haiṉ. 27Jaise pinjrá chiṛiyoṉ se bhará ho, waise hí un ke ghar makr se pur haiṉ: pas wuh baṛe aur máldár ho gaye. 28Wuh moṭe ho gaye, wuh chikne haiṉ: wuh bure kámoṉ meṉ sabqat le játe haiṉ: wun faryád, ya‘ní yatímoṉ kí faryád, nahíṉ sunte, táki un ká bhalá ho; aur muhtájoṉ ká insáf nahíṉ karte. 29Ḳhudáwand farmátá hai, Kyá maiṉ in bátoṉ ke liye sazá na dúṉgá? aur kyá merí rúh aisí qaum se intiqám na legí?
30Mulk meṉ ek hairatafzá aur haulnák bát húí; 31nabí jhúṭhí nubuwwat karte haiṉ, aur káhin un ke wasíle se hukmrání karte haiṉ; aur mere log aisí hálat ko pasand karte hain: ab tum is ke áḳhir meṉ kyá karoge?
Currently Selected:
Yarmiyáh 5: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
