Yarmiyáh 6
6
1Ai baní Binyamín, Yarúshalem meṉ se panáh ke liye bhág niklo, aur Taqú‘a meṉ narsingá phúṉko, aur Bait Hakkaram meṉ átashín ‘alam baland karo; kyúṉki shimál kí taraf se balá aur baṛí tabáhí ánewálí hai. 2Maiṉ duḳhtar i Siyyún ko, jo shakíl aur náznín hai, halák karúṉgá. 3Charwáhe apne galloṉ ko lekar us ke pás áeṉge, aur girdágird us ke muqábil ḳhaime khaṛe kareṉge; har ek apní jagah meṉ charáegá. 4Us se jang ke liye apne áp ko maḳhsús karo; uṭho, do pahar hí ko chaṛh chaleṉ. Ham par afsos, kyúṉki din ḍhaltá játá hai, aur shám ká sáya baṛhtá játá hai. 5Uṭho, rát hí ko chaṛh chaleṉ, aur us ke qasroṉ ko ḍhá deṉ. 6Kyúṉki Rabb u’l afwáj yúṉ farmátá hai, ki Daraḳht káṭ ḍálo, aur Yarúshalem ke muqábil damdama báṉdho: yih shahr sazá ká sazáwár hai; is meṉ zulm hí zulm hai. 7Jis tarah pání chashme se phúṭ nikaltá hai, usí tarah sharárat is se járí hai: zulm aur sitam kí sadá is meṉ suní játí hai; har dam mere sámne dukh dard aur zaḳhm haiṉ. 8Ai Yarúshalem tarbiyatpazír ho, tá na ho, ki merá dil tujh se haṭ jáe; na ho, ki maiṉ tujhe wírán aur g̣airábád zamín baná dúṉ.
9 Rabb u’l afwáj yúṉ farmátá hai, ki Wuh Isráíl ke baqiye ko angúr kí mánind ḍhúṉḍhkar toṛ leṉge: tú angúr toṛnewále kí tarah phir apná háth sháḳhoṉ meṉ ḍál. 10Maiṉ kis se kahúṉ, aur kis ko jatáúṉ, táki wuh suneṉ? dekh, un ke kán námaḳhtún haiṉ, aur wuh sun nahíṉ sakte; dekh, Ḳhudáwand ká kalám un ke liye hiqárat ká bá‘is hai; wuh us se ḳhush nahíṉ hote. 11Is liye maiṉ Ḳhudáwand ke qahr se labrez húṉ; maiṉ use zabt karte karte tang á gayá: bázároṉ meṉ bachchoṉ par aur jawánoṉ kí jamá‘at par use unḍel de: kyúṉki shauhar apní bíwí ke sáth aur búṛhá kuhansál ke sáth giriftár hogá. 12Aur un ke ghar, khetoṉ aur bíwiyoṉ samet, auroṉ ke ho jáeṉge: kyúṉki, Ḳhudáwand farmátá hai, maiṉ apná háth is mulk ke báshindoṉ par baṛháúṉgá. 13Is liye ki chhoṭoṉ se baṛoṉ tak sab ke sab lálachí haiṉ; aur nabí se káhin tak har ek dag̣ábáz hai. 14Kyúṉki wuh mere logoṉ ke zaḳhm ko yúṉ hí Salámatí, Salámatí kahkar achchhá karte haiṉ; háláṉki salámatí nahíṉ hai. 15Kyá wuh apne makrúh kámoṉ ke sabab se sharminda húe? wuh hargiz sharminda na húe, balki wuh lajjáe tak nahíṉ: is wáste wuh girnewáloṉ ke sáth gireṉge: Ḳhudáwand farmátá hai, jab maiṉ un ko sazá dúṉgá, to past ho jáeṉge.
16 Ḳhudáwand yúṉ farmátá hai, ki Rástoṉ par khaṛe ho, aur dekho, aur puráne rástoṉ kí bábat púchho, ki achchhí ráh kaháṉ hai? usí par chalo, aur tumhárí ján ráhat páegí: par unhoṉ ne kahá, Ham us par na chaleṉge. 17Aur maiṉ ne tum par nigahbán bhí muqarrar kiye, aur kahá, Narsinge kí áwáz suno; par unhoṉ ne kahá, Ham na suneṉge. 18Is liye, ai qaumo, suno, aur ai ahl i majma‘, ma‘lúm karo, ki un ki kyá hálat hai. 19Ai zamín sun; dekh, maiṉ in logoṉ par áfat láúṉgá, jo in ke andeshoṉ ká phal hai, kyúṉki inhoṉ ne mere kalám ko nahíṉ máná; aur merí sharí‘at ko radd kar diyá hai. 20Is se kyá fáida ki Sabá se lubán aur dúr ke mulk se agar mere huzúr láte haiṉ? tumhárí soḳhtaní qurbáníáṉ mujhe pasand nahíṉ, aur tumháre zabíhoṉ se mujhe ḳhushí nahíṉ. 21Is liye Ḳhudáwand yúṉ farmátá hai, ki Dekh, maiṉ ṭhokar khilánewálí chízeṉ in logoṉ kí ráh meṉ rakh dúṉgá: aur báp aur beṭe báham un se ṭhokar kháeṉge; hamsáye aur un ke dost hálak hoṉge.
22 Ḳhudáwand yúṉ farmátá hai, ki Dekh, shimálí mulk se ek guroh átí hai, aur intihá e zamín se ek baṛí qaum barangeḳhta kí jáegí. 23Wuh tírandáz o nezabáz haiṉ; wuh saṉgdil aur berahm haiṉ; un ke na‘roṉ kí sadá samundar kí sí hai, aur wuh ghoṛoṉ par sawár haiṉ; ai duḳhtar i Siyyún, wuh jangí mardoṉ kí mánind tere muqábil saffáráí karte haiṉ. 24Ham ne is kí shuhrat suní hai; hamáre háth ḍhíle ho gaye: ham zachche kí mánind musíbat aur dard meṉ giriftár haiṉ. 25Maidan meṉ na nikalná, aur saṛak par na jáná; kyúṉki har taraf dushman kí talwár ká ḳhauf hai. 26Ai merí bint i qaum, ṭáṭ oṛh aur rákh meṉ leṭ: apne iklautoṉ par mátam aur dilḳharásh nauha kar; kyúṉki g̣áratgar ham par achának áegá. 27Maiṉ ne tujhe apne logoṉ meṉ parakhnewálá aur burj muqarrar kiyá; táki tú un kí rawishoṉ ko ma‘lúm kare aur parkhe. 28Wuh sab ke sab niháyat sarkash haiṉ, wuh g̣íbat karte haiṉ; wuh to támbá aur lohá haiṉ: wuh sab ke sab mu‘ámale ke khoṭe haiṉ. 29Dhauṉkní jal gayí; sísá ág se bhasam ho gayá: sáf karnewále ne befáida sáf kiyá; kyúṉki sharír alag nahíṉ húe. 30Wuh mardúd chándí kahláeṉge, kyúṉki Ḳhudáwand ne un ko radd kar diyá hai.
Currently Selected:
Yarmiyáh 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)