Yasa‘iyáh 62
62
1Siyyún kí ḳhátir maiṉ chup na rahúṉgá, aur Yarúshalem kí ḳhátir maiṉ dam na lúṉgá; jab tak ki us kí sadáqat núr kí mánind na chamke, aur us kí naját raushan chirág̣ kí tarah jalwagar na ho. 2Tab qaumoṉ par terí sadáqat aur sab bádsháhoṉ par terí shaukat záhir hogí: aur tú ek naye nám se kahláegí, jo Ḳhudáwand ke muṉh se niklegá. 3Aur tú Ḳhudáwand ke háth meṉ jalálí táj aur apne Ḳhudá kí hathelí meṉ sháhána afsar hogí. 4Tú áge ko Matrúka na kahláegí; aur tere mulk ká nám phir kabhí Ḳharába na hogá: balki tú Piyárí aur terí sarzamín Suhágan kahláegí: kyúṉki Ḳhudáwand tujh se ḳhush hai, aur terí zamín ḳháwindwálí hogí. 5Kyúṉki jis tarah jawán mard kuṉwárí ‘aurat ko biyáh látá hai, usí tarah tere beṭe tujhe biyáh leṉge: aur jis tarah dulhá dulhan meṉ ráhat pátá hai, usí tarah terá Ḳhudá tujh meṉ masrúr hogá.
6Ai Yarúshalem, maiṉ ne terí díwároṉ par nigahbán muqarrar kiye haiṉ; wuh din rát kabhí ḳhámosh na hoṉge: ai Ḳhudáwand ká zikr karnewálo, ḳhámosh na ho, 7aur jab tak wuh Yarúshalem ko qáim karke rú e zamín par mahmúd na banáe, use árám na lene do. 8Ḳhudáwand ne apne dahine háth aur apne qawí bázú kí qasam kháí hai, ki Yaqínan maiṉ áge ko terá g̣alla tere dushmanoṉ ke kháne ko na dúṉgá; aur begánoṉ ke beṭe terí mai jis ke liye tú ne mihnat kí, nahíṉ píeṉge; 9balki wuhí jinhoṉ ne fasl jama‘ kí hai, us meṉ se kháeṉge, aur Ḳhudáwand kí hamd kareṉge; aur wuh jo zaḳhíre meṉ láe haiṉ, use mere maqdis kí bárgáhoṉ meṉ píeṉge.
10Guzar jáo, pháṭakoṉ meṉ se guzar jáo; logoṉ ke liye ráh durust karo; aur sháhráh úṉchí aur baland karo; patthar chunkar sáf kar do; logoṉ ke liye jhanḍá khaṛá karo. 11Dekh, Ḳhudáwand ne intihá e zamín tak i‘lán kar diyá hai, duḳhtar i Siyyún se kaho, Dekh, terá najátdenewálá átá hai; dekh, us ká ajr us ke sáth aur us ká kám us ke sámne hai. 12Aur wuh muqaddas log, aur Ḳhudáwand ke ḳharíde húe kahláeṉge: aur tú Matlúba, ya‘ní G̣airmatrúk shahr kahláegí.
Currently Selected:
Yasa‘iyáh 62: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
