Yasa‘iyáh 58
58
1Galá pháṛkar chillá, dareg̣ na kar, narsinge kí mánind apní áwáz baland kar, aur mere logoṉ par un kí ḳhatá aur Ya‘qúb ke gharáne par un ke gunáhoṉ ko záhir kar. 2Wuh roz ba roz mere tálib haiṉ, aur us qaum kí mánind jis ne sadáqat ke kám kiye, aur apne Ḳhudá ke ahkám ko tark na kiyá, merí ráhoṉ ko daryaft karná cháhte haiṉ; wuh mujh se sadáqat ke ahkám talab karte haiṉ, wuh Ḳhudá kí nazdíkí cháhte haiṉ. 3Wuh kahte haiṉ, Ham ne kis liye roze rakkhe, jab ki tú nazar nahíṉ kartá; aur ham ne kyúṉ apní ján ko dukh diyá, jab ki tú ḳhayál meṉ nahíṉ látá? Dekho, tum apne roze ke din meṉ apní ḳhushí ke tálib rahte ho, aur sab tarah kí saḳht mihnat logoṉ se karáte ho. 4Dekho, tum is maqsad se roza rakhte ho, ki jhagṛá ragṛá karo, aur sharárat ke mukke máro; pas ab tum is tarah ká roza nahíṉ rakhte ho, ki tumhárí áwáz ‘álam i bálá par suní jáe. 5Kyá yih wuh roza hai jo mujh ko pasand hai? aisá din ki us meṉ ádmí apní ján ko dukh de, aur apne sir ko jháú kí tarah jhukáe, aur apne níche ṭáṭ aur rákh bichháe; kyá tú is ko roza aur aisá din kahegá, jo Ḳhudáwand ká maqbúl ho? 6Kyá wuh roza jo maiṉ cháhtá húṉ yih nahíṉ, ki zulm kí zanjíreṉ toṛeṉ, aur júe ke bandhan kholeṉ, aur mazlúmoṉ ko ázád kareṉ, balki har ek júe ko toṛ ḍáleṉ? 7Kyá yih nahíṉ, ki tú apní roṭí bhúkoṉ ko khiláe, aur miskínoṉ ko jo áwára haiṉ apne ghar meṉ láe; aur jab kisí ko naṉgá dekhe, to use pahináe; aur tú apne hamjins se rúposhí na kare? 8Tab terí raushní subh kí mánind phúṭ niklegí, aur terí sihhat kí taraqqí jald záhir hogí; terí sadáqat terí haráwal hogí, aur Ḳhudáwand ká jalál terá chanḍáwal hogá. 9Tab tú pukáregá, aur Ḳhudáwand jawáb degá, tú chilláegá aur wuh farmáegá, Maiṉ yaháṉ húṉ; agar tú us júe ko aur ungliyoṉ se ishára karne ko, aur harzagoí ko apne darmiyán se dúr karegá; 10aur agar tú apne dil ko bhúke kí taraf máil kare, aur ázurdadil ko ásúda kare, to terá núr táríkí meṉ chamkegá, aur terí tíragí do pahar kí mánind ho jáegí. 11Aur Ḳhudáwand sadá terí rahnumáí karegá, aur ḳhushksálí meṉ tujhe ser karegá, aur terí haḍḍiyoṉ ko quwwat baḳhshegá; pas tú seráb bág̣ kí mánind hogá, aur us chashme kí mánind jis ká pání kam na ho. 12Aur tere log qadím wírán makánoṉ ko ta‘mír kareṉge, aur tú pusht dar pusht kí bunyádoṉ ko barpá karegá, aur tú raḳhna ke band karnewálá aur ábádí ke liye ráh ká durust karnewálá kahláegá. 13Agar tú sabt ke roz apná páṉw rok rakkhe, aur mere muqaddas din meṉ apní ḳhushí ká tálib na ho, aur sabt ko ráhat aur Ḳhudáwand ká muqaddas aur mu‘azzam kahe, aur us kí ta‘zím kare, apná kár o bár na kare, aur apní ḳhushí aur befáida bátoṉ se dastbardár rahe; 14tab tú Ḳhudáwand meṉ masrúr hogá, aur maiṉ tujhe dunyá kí balandíoṉ par le chalúṉgá; aur maiṉ tujhe tere báp Ya‘qúb kí mírás se khiláúṉgá; kyúṉki Ḳhudáwand hí ke muṉh se yih irshád húá hai.
Currently Selected:
Yasa‘iyáh 58: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
