Yasa‘iyáh 54
54
1Ai báṉjh, tú jo beaulád thí, nag̣masaráí kar; tú jis ne wiládat ká dard bardásht nahíṉ kiyá, ḳhushí se gá, aur zor se chillá; kyúṉki Ḳhudáwand farmátá hai, ki Bekas chhoṛí húí kí aulád shauharwálí kí aulád se ziyáda hai. 2Apní ḳhaimagáh ko wasí‘ kar de; háṉ, apne maskanoṉ ke parde phailá; dareg̣ na kar: apní ḍoriyáṉ lambí aur apní meḳheṉ mazbút kar: 3is liye ki tú dahiní aur báíṉ taraf baṛhegí, aur terí nasl qaumoṉ kí wáris hogí, aur wírán shahroṉ ko basáegí. 4Ḳhauf na kar, kyúṉki tú phir pashemán na hogí; tú na ghabrá, kyúṉki tú phir ruswá na hogí; aur apní jawání ká nang bhúl jáegí, aur apní bewagí kí ‘ár ko phir yád na karegí. 5Kyúṉki terá ḳháliq terá shauhar hai; us ká nám Rabb u’l afwáj hai; aur terá fidya denewálá Isráíl ká Quddús hai; wuh tamám rú e zamín ká Ḳhudá kahláegá. 6Kyúṉki terá Ḳhudá farmátá hai, ki Ḳhudáwand ne tujh ko matrúka aur dilázurda bíwí kí tarah; háṉ, jawání kí matlúqa bíwí kí mánind, phir buláyá hai. 7Maiṉ ne ek dam ke liye tujhe chhoṛ diyá, lekin rahmat kí firáwání se tujhe le lúṉgá. 8Ḳhudáwand terá naját denewálá farmátá hai, ki Qahr kí shiddat meṉ maiṉ ne ek dam ke liye tujh se muṉh chhipáyá, par ab maiṉ abadí shafaqat se tujh par rahm karúṉgá. 9Kyúṉki mere liye yih túfán i Núh ká sá mu‘ámala hai, ki jis tarah maiṉ ne qasam kháí thí, ki phir zamín par Núh ká sá túfán kabhí na áegá, usí tarah ab maiṉ ne qasam kháí hai, ki maiṉ tujh se phir kabhí ázurda na húṉgá, aur tujh ko na ghuṛkúṉgá. 10Ḳhudáwand tujh par rahm karnewálá yúṉ farmátá hai, ki Paháṛ to játe raheṉ, aur ṭíle ṭal jáeṉ, lekin merí shafaqat kabhí tujh par se játí na rahegí, aur merá sulh ká ‘ahd na ṭalegá.
11Ai musíbatzada aur túfán kí márí aur tasallí se mahrúm; dekh, maiṉ tere pattharoṉ ko siyáh reḳhta meṉ lagáúṉgá, aur terí bunyád nílam se ḍálúṉgá: 12Maiṉ tere kunguroṉ ko la‘loṉ, aur tere pháṭakoṉ ko shabchirág̣, aur terí sárí fasíl beshqímat pattharoṉ se banáúṉgá. 13Aur tere sab farzand Ḳhudáwand se ta‘lím páeṉge, aur tere farzandoṉ kí salámatí kámil hogí. 14Tú rástbází se páedár ho jáegí: tú zulm se dúr rahegí, kyúṉki tú beḳhauf hogí; aur dahshat se dúr rahegí, kyúṉki wuh tere qaríb na áegí. 15Mumkin hai, ki wuh kabhí ikaṭṭhe hoṉ, par mere hukm se nahíṉ; jo tere ḳhiláf jama‘ hoṉge, wuh tere hí sabab se gireṉge. 16Dekh, maiṉ ne luhár ko paidá kiyá, jo koeloṉ kí ág dhauṉktá, aur apne kám ke liye hathyár nikáltá hai; aur g̣áratgar ko maiṉ hí ne paidá kiyá ki lúṭmár kare. 17Koí hathyár jo tere ḳhiláf banáyá jáe kám na áegá; aur jo zabán ‘adálat meṉ tujh par chalegí, tú use majrúm ṭhahráegí. Ḳhudáwand farmátá hai, Yih mere bandoṉ kí mírás hai, aur un kí rástbází mujh se hai.
Currently Selected:
Yasa‘iyáh 54: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
