Yasa‘iyáh 52
52
1Jág, jág, ai Siyyún: apní shaukat se mulabbas ho; ai Yarúshalem muqaddas shahr, apná ḳhushnumá libás pahin le: kyúṉki áge ko koí námaḳhtún yá nápák tujh meṉ kabhí dáḳhil na hogá. 2Apne úpar se gard jháṛ de; uṭhkar baiṭh; ai Yarúshalem, ai asír duḳhtar i Siyyún, apní gardan ke bandhanoṉ ko khol ḍál.
3Kyúṉki Ḳhudáwand yúṉ farmátá hai, ki Tum muft beche gaye, aur tum bezar hí ázád kiye jáoge. 4Ḳhudáwand Ḳhudá yúṉ farmátá hai, ki Mere log ibtidá meṉ Misr ko gaye, ki waháṉ musáfir hokar raheṉ; Asúríoṉ ne bhí besabab un par zulm kiyá. 5Pas Ḳhudáwand yúṉ farmátá hai, ki Ab merá yaháṉ kyá kám, háláṉki mere log muft asírí meṉ gaye haiṉ? wuh jo un par musallit haiṉ lalkárte haiṉ, Ḳhudáwand farmátá hai, aur har roz matwátir mere nám kí takfír kí játí hai. 6Yaqínan mere log merá nám jáneṉge, aur us roz samjheṉge, ki kahnewálá maiṉ hí húṉ; dekho, maiṉ házir húṉ.
7Us ke páṉw paháṛoṉ par kyá hí ḳhushnumá haiṉ jo ḳhushḳhabarí látá hai, aur salámatí kí manádí kartá hai, aur ḳhairíyat kí ḳhabar, aur naját ká ishtihár detá hai, jo Siyyún se kahtá hai, Terá Ḳhudá saltanat kartá hai. 8Apne nigahbánoṉ kí áwáz sun; wuh apní áwáz baland karte haiṉ; wuh áwáz milákar gáte haiṉ; kyúṉki jab Ḳhudáwand Siyyún ko wápas áegá, to wuh use rú ba rú dekheṉge. 9Ai Yarúshalem ke wíráno, ḳhushí se lalkáro, milkar nag̣masaráí karo, kyúṉki Ḳhudáwand ne apní qaum ko dilásá diyá; us ne Yarúshalem ká fidya diyá. 10Ḳhudáwand ne apná pák bázú tamám qaumoṉ kí áṉkhoṉ ke sámne naṉgá kiyá hai, aur zamín sarásar hamáre Ḳhudá kí naját ko dekhegí. 11Ai Ḳhudáwand ke zurúf uṭhánewálo, rawána ho, rawána ho; waháṉ se chale jáo; nápák chízoṉ ko háth na lagáo; us ke darmiyán se nikal jáo, aur pák ho. 12Kyúṉki tum na to jald nikal jáoge, aur na bhágnewále kí tarah chaloge; kyúṉki Ḳhudáwand tumhárá haráwal aur Isráíl ká Ḳhudá tumhárá chanḍáwal hogá.
13Dekho, merá ḳhádim iqbálmand hogá, wuh a‘lá o bartar aur niháyat baland hogá. 14Jis tarah bahutere tujh ko dekhkar dang ho gaye (us ká chihra har ek bashar se záid, aur us ká jism baní Ádam se ziyáda bigaṛ gayá thá), 15usí tarah wuh bahut sí qaumoṉ ko pák karegá, aur bádsháh us ke sámne ḳhámosh hoṉge; kyúṉki jo kuchh un se kahá na gayá thá, wuh dekheṉge; aur jo kuchh unhoṉ ne suná na thá wuh samjheṉge.
Currently Selected:
Yasa‘iyáh 52: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
