Popular Bible Verses from Yasa‘iyáh 52

Share

Us ke páṉw paháṛoṉ par kyá hí ḳhushnumá haiṉ jo ḳhushḳhabarí látá hai, aur salámatí kí manádí kartá hai, aur ḳhairíyat kí ḳhabar, aur naját ká ishtihár detá hai, jo Siyyún se kahtá hai, Terá Ḳhudá saltanat kartá hai.

Jis tarah bahutere tujh ko dekhkar dang ho gaye (us ká chihra har ek bashar se záid, aur us ká jism baní Ádam se ziyáda bigaṛ gayá thá), usí tarah wuh bahut sí qaumoṉ ko pák karegá, aur bádsháh us ke sámne ḳhámosh hoṉge; kyúṉki jo kuchh un se kahá na gayá thá, wuh dekheṉge; aur jo kuchh unhoṉ ne suná na thá wuh samjheṉge.

Dekho, merá ḳhádim iqbálmand hogá, wuh a‘lá o bartar aur niháyat baland hogá.